Ձեր վստահելի աղբյուրը

«Չեմ կարծում՝ հանրապետության այս նախագահից ինչ-որ ակնկալիք պետք է ունենալ: Նախագահական նստավայրը շրջափակելու խորհուրդն այն է, որ ժողովուրդն է որոշում, թե ինչը փակվի, ինչը բացվի»,- նախագահական նստավայրի մուտքերը փակելուց, ապա բացելուց հետո լրագրողների հետ զրույցում ասաց անհնազանդության ակցիային մասնակցած ՀՀ երկրորդ նախագահ Ռոբերտ Քոչարյանի որդին՝ Լևոն Քոչարյանը:

Խոսելով իշխանության ներկայացուցիչների հայտարարությունների մասին, թե ընդդիմության հանրահավաքները մարդաշատ չեն, նա ասաց. «Բնականաբար, պետք է փորձեն իրենց զանգվածին, թիմի ներսում համոզել, որ անհանգստանալու բան չկա։ Բայց, իհարկե, շատ անհանգիստ են, որովհետև տեսնում են, թե ինչպես է շատանում մարդկանց քանակը, նաև հայրենիքի համար դուրս եկած  մարդկանց վճռականությունն է շատ մեծ»:

Լևոն Քոչարյանը խնդրեց մարդկանց միանալ այս  շարժմանը, մի կողմ դնել անձնական ամբիցիաները, նախասիրությունները. «Այստեղ ինչ-որ մեկի համար չեն գալիս, մեկ հոգու կամ քաղաքական ուժին սատարելու հարց չէ։ Սեղանին է դրված մեր հայրենիքի ճակատագիրը, ուղղակի սրա շուրջ է պետք  համախմբվել։ Կողմնակի հարցերը լուծվող են, բայց հայրենիքի կորուստը չեն կարող լուծել։

Խորհուրդս է համախմբվել գաղափարի, ոչ թե ինչ-որ անձերի կամ քաղաքական ուժերի շուրջ»,-ասաց Լևոն Քոչարյանը։