Ձեր վստահելի աղբյուրը

«Գնալով համոզվում եմ, որ այս իշխանություններն իսկապես բանակցային գործընթացի մեջ մեր դիրքերը պաշտպանելու բանաձևը չեն գտել, չգիտեն՝ ինչպես պաշտպանել հայկական դիրքերը բանակցային գործընթացում»,- լրագրողների հետ զրույցում ասաց «Հայաստան» խմբակցության պատգամավոր, ՀՅԴ անդամ Արմեն Ռուստամյանը՝ անդրադառնալով Նիկոլ Փաշինյանի ԱԺ-ում արած երեկվա հայտարարություններին, մասնավորապես՝ «Մադրիդյան սկզբունքներն ընդունած ՀՀ կառավարությունը, որի ներկայացուցիչներն այսօր քաղաքում խցանումներ առաջացնող բոլոր երեք ուժերի ներկայացուցիչներն են, Ադրբեջանին վետոյի իրավունք է տվել ԼՂ կարգավիճակի որոշման հարցում: Փաստացի կարող ենք ասել, որ Մադրիդյան սկզբունքների նախաձեռնության հեղինակը կամ համահեղինակը հայկական կողմն է»։

Ա. Ռուստամյանն ասաց, որ Մադրիդյան սկզբունքներն ինքնին փոխզիջումային փաստաթուղթ էր, իսկ փոխզիջումը ենթադրում է մեր կողմից էլ զիջում։

«Մենք իսկապես կատարել ենք շատ գրագետ քայլ՝ մեր զիջումը համարելով այն, որ  կարելի է ևս մեկ հանրաքվե անցկացնել նույն Ղարաբաղում, մանավանդ որ վստահ էինք, որ այդ հանրաքվեի արդյունքը նույնն է լինելու։ Ակնհայտ էր, որ այդ հանրաքվեն տալու էր նույն արդյունքը, բայց արդեն ճանաչում է ունենալու միջազգային մասշտաբով, բնականաբար, դրան  գնալն ամենամեծ հաջողությունն էր։ Զարմանում եմ ուղղակի, որ, այսքան ժամանակ այդ պաշտոնին լինելով, չեն հասկացել, որ մեր կողմից գրագետ քայլ է եղել. ևս մեկ անգամ հանրաքվեի նույն արդյունքը կրկնել, բայց արդեն միջազգայնորեն ճանաչված փոխհամաձայնեցված վիճակով»,- ասաց ընդդիմադիր քաղաքական գործիչը։

Երկրորդ՝ «Ադրբեջանին վետոյի իրավունք է տվել ԼՂ կարգավիճակի որոշման հարցում»։
Սրա վերաբերյալ Ա. Ռուստամյանն ասաց.  «Երբ որ ասվում է,  որ մենք ձախողել ենք, որովհետև հանրավորություն ենք տվել Ադրբեջանին  վետո դնելու, սա խոսում է այն մասին, որ այդ  մարդիկ ընդհանրապես բանակցության իմաստը չեն հասկանում։ Բանակցությունը  նշանակում է  մի պրոցես, որը բերում է փոխհամաձայնեցված մի գործընթացով համաձայնության, այսինքն պետք է գալ փոխհամաձայնության։ Փոխհամաձայնությունը  նշանակում է  որևէ մի փաստաթուղթ կամ որևէ համաձայնություն, որտեղ կա համախոհություն։ Համախոհությունը  ենթադրում է, որ մեկը մյուսին տալիս է վետոյի հնարավորություն։ Սա ի՞նչ մի հայտնագործություն է»։

Արմեն Ռուստամյանն ասաց, որ իրենք ԼՂ ճանաչումը, որպես այդպիսին, նաև համարել են ոչ թե  պետք է լինի միակողմանի, այլ պետք է լինի միջազգայինորեն ճանաչված գործընթացով  իրականացված, ինչպես Կոսովոյի տարբերակը։

«Մենք  այդ պատճառով ենք  գնացել միջազգային ճանաչման ուղղությամբ, իսկ  միջազգային ճանաչումն առանց միջազգայնորեն ընդունվող ձևաչափով հանրաքվեի, չէր կարող տեղի ունենալ։ Ընդհակառակը, իրենք չեն կարողանում հասկանալ, որ սրանով ԼՂ ժողովրդի ուղղակի ինքնորոշման իրավունքն է ճանաչվել։ Այսինքն, չգիտեն, ինչ է նշանակում ինքնորոշման իրավունքի իրացում որպես այդպիսին։ Սա եղել է ինքնորոշման իրավունքի իրացման գործընթաց և հանրաքվեն հենց դա է փաստել, եթե դա տեղի ունենար»,- ասաց Ռուստամյանը։

Նա նաև հարցադրում արեց, եթե այդպես էր, Ադրբեջանն ինչո՞ւ Մադրիդյան սկզբունքների հիմքով չէր համաձայնվում գնալ բանակցությունների։