Ջհանգիրյանը կամ մանիպուլացնում է իրականությունը, կամ սխալ տեղեկատվություն են իրեն տվել. Արծվիկ Մինասյան
«Ջհանգիրը եղած կամ չեղած ինձ համար։ Ցավակցեց ծնողներիս, բայց նույնիսկ ցավակցական տոն չուներ։ Այ ստոր, այդպե՞ս են ցավակցում, շեֆիդ նման ես, որ մինչև հիմա չոքել չգիտի»,- ԲԴԽ նախագահի պաշտոնակատար Գագիկ Ջհանգիրյանի հետ հանդիպումից հետո լրագրողներին ասաց 44-օրյա պատերազմում զոհված Արցախի հերոս Դավիթ Առուշանյանի մայրը՝ Լիդա Առուշանյանը։
Նա ընդգծեց՝ Հայաստանում առայժմ արդարություն չկա, բայց լինելու է։
Հիշեցնենք, որ Վերաքննիչ քրեական դատարանում Նիկոլ Փաշինյանի կողմից պետական դավաճանության հատկանիշներով քրգործ հարուցելու պահանջով բողոքի քննությունը, դատարանի երեկվա որոշմամբ, անցկացվելու է դռնփակ։ Այս որոշումը զայրացրել է զոհված զինծառայողների հարազատներին։ Նրանք այսօր եկել էին Բարձրագույն դատական խորհուրդ՝ պահանջելով հանդիպում ԲԴԽ նախագահի պաշտոնակատար Գագիկ Ջհանգիրյանի հետ և իրենց խնդիրները բարձրաձայնելու։ Մասնավորապես, ծնողները պահանջում են՝ դատավարությունը շարունակել դռնբաց կարգով՝ թույլատրելով և ծնողներին, և լրագրողներին մասնակցել նիստերին, ապահովելով նաև այդ նիստերի հասանելիությունը հանրությանը: Թեև սկզբում Ջհանգիրյանն առաջարկել էր հանդիպել 5 ծնողի հետ, սակայն նրանք չհամաձայնեցին, պահանջեցին հենց ԲԴԽ նախագահը գա իրենց հետ հանդիպման։ Ի վերջո, 30 ծնողով մտան ԲԴԽ։
Գագիկ Ջհանգիրյանի հետ հանդիպումից մանրամաներ ներկայացրեց 44-օրյա պատերազմում զոհված Արցախի հերոս Մենուա Հովհաննիսյանի մայրը՝ Կարին Տոնոյանը։
«Հենց սկզբից մեզ պարոն Ջհանգիրյանը դիմավորեց նախաբանով, որ մենք թույլ ենք տալիս, որ մեզ՝ ծնողներիս, քաղաքական որոշ ուժեր օգտագործեն իրենց նպատակների համար։ Ես շատ խիստ պատասխանեցի այդ հարցին. մեր երկրում չի կարող լինել որևէ ուժ, որ ծնողներին դարձնի իր գործիքը, ընդհակառակը, բոլորը պետք է աջակցեն ծնողներին, եթե պետք լինի ծնողները կարող են օգտագործել ցանկացած մեկի ռեսուրսներն ու ուժերը։ Մատնանաշեցի, որ եթե դուք եք այդ տարաբաժանումները կատարում՝ նախկին, ներկա, ապա մեզ համար դուք բոլորդ նախկին եք, ապագան պատկանում է մեզ՝ ծնողներիս, և պահանջեցինք որևէ քաղաքական խոսակցություն տեղի չունենա, միայն խոսքը գնա մեր պահանջի մասին»,- ասաց Տոնոյանը։
Այնուհետև ծնողները ներկայացրել են իրենց պահանջները, մասնավորապես որ դատական նիստերն ընթանան դռնբաց։ Ջհանգիրյանը խորհուրդ է տվել դա անել դատավարական կարգով, այսինքն բողոքաբերները ներկայացնեն միջնորդություն։
«Մայիսի 30-ին իրենք կներկայացնեն միջնորդություն, դրանից հետո եթե մեր ցանկությունը չի բավարարվի, ապա մենք նորից կգանք այստեղ»,- ասաց Կարին Տոնոյանը։
Նա կարծում է, որ իրենց այսօրվա գործողությունը կթողնի դրական արդյունք, մայիսի 30-ին կունենան դրական արձագանք, հակառակ դեպքում նորից այստեղ կգան, արդեն կստիպեն կատարել իրենց պահանջները։
«Հայաստան» խմբակցության պատգամավոր, բողոքաբեր Արծվիկ Մինասյանն ասաց, որ հավանաբար Գագիկ Ջհանգիրյանը տեղյակ չէ, կամ իրեն սխալ են զեկուցել, որ հենց առաջին պահից բողոքաբերները զգացել ենք դատավոր Կարեն Բիշարյանի կանխակալ մոտեցումն այս գործով և ինքնաբացարկի միջնորդություն են ներկայացրել, որը մերժել է։
«Երկրորդ միջնորդությունը վերաբերում էր տուժողների՝ նահատակված զինծառայողների ծնողները, գերեվարված անձանց հարազատները այդ գործում որպես երրորդ անձ ներգրավելուն։ Հենց այդ միջնորդության քննարկման ժամանակ միջադեպ տեղի ունեցավ, նիստին ներկա զոհված զինծառայողների հարազատներ դժգոհություն հայտնեցին։ Դատավորը գնաց խորհրդակցական սենյակ, վերադարձավ ու հրապարակեց որոշում, որ նիստերն անցկացվում են փակ։ Երբ փակ նիստում դատավորը հրապարակեց դատական այդօրվա նիստը հետաձգելու ու մայիսի 30-ին նշանակելու մասին որոշումը, ես և փաստաբան պարոն Մարտիրոսյանը միջնորդություն ներկայացրեցինք վերանայել դռնփակ անկացնելու մասին որոշումը, փոխել այն։
Այնպես որ, պարոն Ջհանագիրյանը հավանաբար կամ մանիպուլացնում է իրականությունը, կամ սխալ տեղեկատվություն են իրեն տվել, կամ չգիտեմ էլ ինչ ենթադրություն անեմ։
Այնուամենայնիվ, երկուշաբթի նորից միջնորդություն կներկայացնենք, քանի որ անհնար է պատկերացնել այս դատավարությունն առանց տուժողների իրավահաջորդների մասնակցությամբ, առանց լրատվամիջոցների ուղղակի ներգրավման այս գործընթացում»,- հայտարարեց Արծվիկ Մինասյանը։
Նա նաև ասաց, որ Գագիկ Ջհանգիրյանին ուզում է տեղեկացնել, թե ինչ է կատարվում դատարաններում։
«Իշխանությունն, ի դեմս գործադիր իշխանության ղեկավարի և իբր դատարանների անկախությունը երաշխավորող բարձագույն դատական խորհրդի, ի դեմս իր նախագահի, ամեն ինչ անում են, որպեսզի երկրում արդարադատություն չլինի, և այդ մեղավարությունն ամբողջությամբ ձեր ուսերին է»,- ասաց Արծվիկ Մինասյանը։
Հարակից հրապարակումներ`
- Զոհված զինծառայողների հարազատները մտնում են ԲԴԽ
- Կարին Տոնոյան. Այս փուլում որոշում կայացվեց նիստն անցկացնել դռնփակ, որովհետև արդեն պետք է խոսեին փաստերի մասին
- Քաղաքացիները երթով գնում են ԲԴԽ՝ միանալու զոհված զինծառայողների հարազատներին
- Խնդրում ենք լինել մեր կողքին և միասին պայքարենք հանուն արդարության. Կարին Տոնոյան
- Նիստը դռնփակ անելը մեկ նպատակ է հետապնդում՝ հանրությանը զրկել պետական դավաճանության փաստերից տեղյակ լինելուց. Փաստաբան
- Դատավոր Բիշարյանին ներկայացված ինքնաբացարկի միջնորդությունը մերժվեց
- Զոհված զինծառայողների հարազատները չեն ուզում Փաշինյանի կողմից պետական դավաճանություն կատարելու բողոքը քննի դատավոր Բիշարյանը
- Պահանջում ենք հավաստիացում՝ դատական նիստը չի ընդհատվի, դատավորը չի փախչի դահլիճից. Կարին Տոնոյան
- Մեր աղոթքները հիմա բոլորի զավակների համար են, որովհետև դրանք արդեն մեր զավակներին պետք չեն. Կարին Տոնոյան
- Մենք արդեն երկու տարի քուն ու դադար չունենք, ուզում ենք հասկանալ՝ ովքեր մեր երեխաներին տարան կործանման. Կարին Տոնոյան
- Պահանջում ենք, որ մեր գործը քննի ԱԱԾ-ն. Կարին Տոնոյան
- Դատարանը մերժեց Փաշինյանի հնարավոր դավաճանության հարցով քրգործ չհարուցելու բողոքը
