Ձեր վստահելի աղբյուրը

«104 տարի առաջ մեր նախնիները դուրս եկան պայքարի ու հաղթանակեցին, որ ծնվի Հայաստանի Հանրապետությունը։ Այսօր տասնյակ հազարավոր մարդիկ կրկին դուրս են եկել պայքարի։ Հայ ժողովուրդը կանգնած է գոյաբանական նույն խնդրի առաջ»,-ելույթ ունենալով Ֆրանսիայի հրապարակում՝ ասաց ՀՅԴ ԳՄ անդամ, ԱԺ փոխնախագահ Իշխան Սաղաթելյանը։

Նա ընդգծեց՝ մեր առաջ նույն ցեղասպան Թուրքիան է, նույն Ադրբեջանը՝ նույն ծրագրերով ու գործիքներով։

«Սակայն նույնն ենք նաև մենք՝ Սարդարապատ ու Բաշ Ապարան հաղթած ժողովուրդը, Արցախն ազատագրած ժողովուրդը։ Ուրեմն այս անգամ էլ թշնամու ծրագրերը դատապարտված են ու ձախողված։ Ձախողված են բոլոր նրանք, որոնք սպասարկելու են թշնամու շահը։ Սա հայ ժողովրդի գոյության, արժանապատվության, նամուսի, պետականություն ու հայրենիք ունենալու կռիվ է, սա սրբազան կռիվ է, և այն ավարտվելու է հաղթանակով»,-ասաց Սաղաթելյանն ու ելույթի այս հատվածին հետևեցին բացականչություններ, ծափահարություններ։

Դաշնակցական գործիչն ասաց՝ այս ընթացքում հայ ժողովուրդը ցույց տվեց, որ Նիկոլ Փաշինյանը լեգիտիմ չէ, չունի մանդատ բանակցություններ վարելու։

«Մենք իսկապես հսկայական գործ ենք արել, բայց մեր գլխավոր խնդիրը դեռ լուծված չէ, դավաճանը դեռ շարունակում է մնալ իշխանության ղեկին։ Մենք մեր նպատակին այսքան մոտ չենք եղել, պետք է պահպանենք տեմպը, ավելացնենք ճնշումը, և հաղթանակն անխուսափելի է լինելու»,-ասաց նա։

Սաղաթելյանի խոսքով, այսօր մեր կյանքում առաջացել է մի ջրբաժան, որի մի կողմում արժանապատվություն ունեցող մարդիկ են, որոնք պատրաստ են հանուն պետության զոհել սեփական շահերը, լծվել ծանր ու արժանապատիվ գործին, իսկ մյուս կողմում ժողովրդին, պետական շահերին դավաճանած իշխանական խունտան է, որը պատրաստ է զիջել ամեն ինչ, բացի աթոռից։

Անդրադառնալով տարբեր պատճառաբանություններով Ֆրանսիայի հրապարակ չեկող անհատներին ու ուժերին՝ Սաղաթելյանն ասաց, այս հարթակը բոլորինն է։

«Դուք այս հրապարակում չեք ինչ-որ մեկի համար, սեղանին դրված է Հայաստանի ու Արցախի գոյության հարցը։ Այսօր բոլորը պետք է լինեն Հայաստանի փրկության օրակարգի կողքին»,-նշեց նա։