Ձեր վստահելի աղբյուրը

«Անհասկանալիորեն դատական նիստը նշանակված էր կես ժամյա ռեժիմով, որի մասին դատավորը տեղեկացրեց այն սկսվելուց հետո՝ երբ արդեն ավարտին մնացել էր 15-20 րոպե»,-Նիկոլ Փաշինյանի դեմ պետական դավաճանության հոդվածով քրեական գործ չհարուցելու որոշման դեմ բողոքի քննության դատական նիստի ավարտից հետո հայտնեց «Հայաստան» խմբակցության քարտուղար Արծվիկ Մինասյանը:

Պատգամավորը և փաստաբան Հակոբ Մարտիրոսյանը 2021 թվականի հունիս ամսին հանցագործության մասին հաղորդում էին ներկայացրել՝  պահանջելով քրեական գործ հարուցել Նիկոլ Փաշինյանի կողմից կատարված առերևույթ պետական դավաճանության փաստի առթիվ, որը մերժվել էր առաջին ատյանի դատարանի կողմից։

Արծվիկ Մինասյանը հայտնեց, որ նախորդ նիստում քննարկվել էր իրենց  միջնորդությունը որպեսզի զոհվածների և անհետ կորածների հարազատները ներգրավվեն որպես շահագրգիռ անձինք և այդ միջնորդության շրջանակներում տեղի էր ունեցել հայտնի միջադեպը, ինչ պատճառով գործը վարող ՀՀ վերաքննիչ դատարանի դատավոր Կարեն Բիշարյանն անսպասելիորեն փակ նիստ անցկացնելու որոշում կայացրեց:

«Այս նիստում ես ձայն խնդրեցի, պահանջեցի և վերջում նաև միջնորդություն ներկայացրեցի, ըստ որի՝ քանի որ նախորդ դատական նիստում կայացվել է անսպասելի որոշում, ինչի արդյունքում խաթարվել է իրական արդարադատությունը, հանրային շահը, հասարակության տեղեկացվածության իրավունքը, թափանցիկության հիմնարար կանոնը և նկատի առնելով գործի առանձնահատկությունը, տասնյակ հազարավոր տուժողների հարազատների շահագրգռվածություն այս գործում՝ հրատապ կարգով քննության առարկա դարձնել նախորդ դատական նիստում կայացրած որոշումը վերացնելու և վերականգնել դատական նիստը բաց անցկացնելու հնարավորությունը»,-ասաց պատգամավորը և լրագրողներին տեղեկացրեց, որ իր այդ միջնորդությունից հետո դատավորը, առանց որևէ հիմնավորման, հայտնել է, որ դատական նիստն այսօր ավարտում է և հաջորդ նիստը կկայանա հունիսի 1-ին ժամը 12:30-ին:

Մինասյանը նկատեց, որ թե՛ դատախազները, թե՛ դատավորը դեռևաս տրամադրված չեն որպեսզի նիստն անցկացվի բաց և հրապարակային, որովհետև դատախազների խոսքում նաև անթուլատրելի մեղադրանքներ էին հնչում, թե իբր նիստում ականջահաճո հայտարարություններ են լինում, մինչդեռ արդարադատության շահը պահանջում է, որ բոլոր հարցերին պատասխաններ տրվեն:

«Դատախազները հայտնեցին, թե զոհվածների հարազատները չեն կարող ներգրավվել որպես շահագրգիռ անձ, քանի որ Հայաստանի քրեական դատավարության օրենսգրքում նման ընթացակարգ չկա: Սա իրավական տեսանկյունից հիմնազուրկ է, որովհետև մենք ունենք Մարդու իրավունքի եվրոպական դատարանի բազմաթիվ վճիռներ, կան նաև հայկական պրակտիկայում նման որոշումներ: Անկախ նրանից, թե ո՞ր պետական մարմինն է ժամանակին սխալ թույլ տվել, կոնվենցիոնալ իրավունքը՝ տուժողի իրավունքը չի կարող ոտնահարվել, պետք է ապահովվի և վերականգնվի դատարանի, դատախազի կամ համապատասխան քննություն իրականացնող մարմնի կողմից: Մենք հետևողական առաջ ենք տանելու այն թեզը, որ մեր հայրենակիցները ոչ միայն որպես շահագրգիռ անձ ներգրավվեն այս գործին, այլև դատական նիստերն անցկացվեն բաց և հրապարակային»,-ասաց ընդդիմադիր պատգամավորը և բացատրեց, որ այդ սխալը կատարվել է, երբ քննչական մարմինները և դատախազությունը զոհվածների հարազատներին այն ժամանակ չէին ներգրավել որպես տուժողներ, եթե ժամանակին ներգրաված լինեին այսօր նման հարցեր չէին առաջանա:

Արծվիկ Մինասյանի խոսքով՝ դատարանի իրավասության ներքո է ապահովել այնպիսի դահլիճ, որտեղ աղմուկը չխանգարի նիստին, եթե կան կարգազանցներ ապա նրանց հեռացնեն դահլիճից, կամ մուտքն արգելեն:

Դատախազների խոսքում, ըստ նրա, ակնհայտ էր էմոցիոնալությունը, որոնք փորձում էին մեղադրել ծնողներին, որ վերջիններս էմոցոինալ պոռթկման արդյունքում նաև հայտարարություններ էին արել դահլիճում:

«Չի կարող այս բազմահազար մարդկանց իրավունքները ստորադասվել կամ ոտնահարվել դատախազի, կամ դատավորի՝ հաճելի լռության մեջ գործ քննելու ցանկությանը»,-հայտարարեց Մինասյանը և հասարակությանը կոչ արեց  ոտքի կանգնել՝ պաշտպանեու հերոսներին ծնած մայերի, նրանց դաստիրակած հայրեի, քույրերի և եղբայրների իրավունքները:

Հայտարարելով, որ նման ծավալի և զգայուն հարցի վերաբերյալ 30 րոպեանոց նիստի անցկացումն անթուլատրելի էր՝ Մինասյանը հայտարարեց. «Համոզված եմ, որ 299 հոդվածը, որով սահմանված է պետական դվաճանության պատիժը, անխուսափելիորեն վրա է հասնելու՝ այս դատավորի, դատախազների պայմաններում չլինի, այլ դատախազի և դատավորի պայմաններում կլինի, բայց անխուսափելի է և նման ծանր հանցագործությունները պարտակողներ նույնպես անցնելու են բոլոր գործերով»: