Ձեր վստահելի աղբյուրը

«Սա խայտառակություն է։ Ժողովրդավարական բաստիոնից խոսող իշխանությունն արգելում է ժողովրդի կողմից ընտրված պատգամավորներին, 330 հազար քվե են ստացել երկու ընդդիմադիր խմբակցությունները, խնդիր բարձրաձայնեն»,- Ֆրանսիայի հրապարակում ճեպազրույցի ժամանակ ասաց ՀՅԴ ԳՄ ներկայացուցիչ Իշխան Սաղաթելյանը։

Նա նշեց, որ պատգամավորները պետք է բարձրանային նախարարության շենք, հանդիպեին նախարարներին ու ասեին՝ դիրքորոշում հայտնել փաստաթղթի վերաբերյալ։

«Քանի որ չունեն դիրքորոշում կամ այդ դիրքորոշումը  շատ նման է Ալիևի դիրքորոշմանը, այդքան համարձակություն չունեն հակադրվել Նիկոլին, ոչ էլ հակառակը՝ հակադրվել ժողովրդին, գերադասեցին ոստիկանական ուժերով օրենքի պահանջներին դեմ գնալ, թույլ չտալ, որպեսզի պատգամավորները բարձրանան շենք»,- ասաց Սաղաթելյանը։

Նա նշեց, որ իրենք ձևակերպել են պարզ, հստակ փաստաթուղթ, որի մեխը հետևյալն է՝  Արցախը  որևէ պարագայում չի լինելու Ադրբեջանի կազմում։

«Ասում ենք՝ այս փաստաթղթի հետ կապված ի՞նչ դիրքորոշում ունեք։

Արդյունքում՝ ներքին զորքեր, կարմիր ու սև բերետավորներ,  շենքի ներսում 6-րդ վարչության, ազգային անվտանգության հատուկ ջոկատայինները։  Ի՞նչ էինք անում։ Ինչո՞ւ եք այդքան վախեցել, արա։ Իրենք արա են, իրենց այդպես են պահում»,- ասաց ընդդիմադիր պատգամավորը։

Նա ասաց, որ կան մի քանի հարյուր բերման ենթարկված, կիրառվել է  բիրտ, խայտառակ ուժ, այդ թվում պատգամավորների նկատմամբ։

«Հիմա էլ փորձ են անում բերման ենթարկած տղերքի նկատմամբ գործ հարուցել։ Փոխանակ ոստիկանական ապօրինի, բիրտ գործողությունների դեմ գործ հարուցվի, հարուցվում է  այն քաղաքացիների նկատմամբ, ովքեր ընդամենը մեկ պահանջ ունեին՝ նախարարների հետ պետք է պատգամավորները հանդիպեին»,- նշեց Սաղաթելյանը։

Նա ասաց, որ առաջիկա օրերին լինելու են կրթական հաստատություններում, պետական գերատեսչություններում։

«Մեզ համար կարևոր է, որպեսզի ստեղծված իրավիճակում դիրքորոշում հայտնեն  բարձր դիրք ունեցող, ոչ միայն պետական պաշտոն զբաղեցնող, հայրենակիցները։ Իրենցից ավելի բան չենք ուզում։

Մենք չենք ասում՝ եկեք, միացեք շարժմանը։ Այդ տեքստի մեջ ընդամենը հայանպաստ, նվազագույն տեքստ է։ Մենք ներկայացրել ենք հայտարարության տեքստ, որին իշխող ուժը որևէ հակադրություն, հակադարձում, որևէ քննադատություն չունի, անխոցելի փաստաթուղթ է»,- նշեց Սաղաթելյանը։

Նա նշեց, որ իշխանություններն ընդդիմությանն ասում են՝ վախենում է գալ խորհրդարան, չունի քաղաքական օրակարգ, Արցախի հարց չկա, Հայաստանի հարց չկա, իշխանափոխության  համար պայքար է։

«Հիմա ասում ենք՝ գալիս ենք խորհրդարան, սա օրակարգ է, սա էլ Արցախի մասին հայտարարություն։  Իրենք, ըստ էության, քաղաքական փակուղու մեջ են։ Իրականում, երբ ասում եմ հունիսի 3-ն իրենց քաղաքական գերեզմանն է, դա այդպես է, դրանից հետո իրենց բոլոր փաստարկներն այլևս դառնում են անիմաստ»,- ասաց Իշխան Սաղաթելյանը։

Նա նշեց, որ այսօր ակցիայի ժամանակ ոստիկանները հարվածել են նաև պատգամավորներին. «Խփել են ինձ, Աշոտ Սիմոնյանին, Գեղամ Մանուկյանին։ Ես դրանք իմ աչքով եմ տեսել, վստահ եմ, որ մնացած պատգամավորներին՝ ևս։ Տեսա Արամ Վարդևանյանին, Աղվան Վարդանյանին, Տիգրան Աբրահամյանին։ Շատ հստակ հանձնարարություն են ունեցել, այդ կարմիր բերետավորները ղեկավարվում են հայտնի օլիգարխների կողմից։ Ակնհայտ է, որ իրենց մեջ կան ոստիկանական համազգեստով հանցագործներ, ովքեր ակնհայտ հանձնարարություններով, կոնկրետ անուններով հարձակվում են քաղաքացիների ու պատգամավորների վրա։ Եթե իրենց թվում է մարսելու են, սխալվում են»։

Սաղաթելյանի խոսքով, կյանքում որևէ իշխանություն հավերժ չի, իսկ այս իշխանությունը ոչ միայն հավերժ չէ, խիստ ժամանակավոր է, իսկ ով ինչ անում է, պետք է հասկանա, որ գալու է պատասխան տալու օրը։

Ընդդիմադիր գործիչն ասաց, որ հետևողական են լինելու այսօրվա դեպքերով, համապատասխան գրություններ, գործընթաց լինելու է, հիմա փաստաբանները, իրենց պատգամավորեն աշխատում են այդ ուղղությամբ։

«Երբ երկրում օրենք չկա, բարդակ է, ապօրինությունների շղթային վերջ չկա, շատ ժամանակ  դրա վրա հույս դնելն արդեն անիմաստ է։ Մեզ պետք է այս պայքարը դարձնել համահայաստանյան ու վերջնական վռնդենք սրանց»,- ասաց Սաղաթելյանը։

Նա տեղեկացրեց, որ այսօր ժամը 19։30-ին հավաքվելու են Ֆրանսիայի հրապարակում։

«Մեր այսօրվա հավաքը մի քիչ այլ ֆորմատով է լինելու։ Լինելու է աշխատանքային զրույց մեր քաղաքացիների հետ։ Հաճախ այդ անմիջական շփումը, քաղաքացիներին լսելը, բացատրություններ տալն ավելի կարևոր է։ Կամփոփենք մեր արած  աշխատանքներն ու կպլանավորենք վաղվա անելիքները։

Վաղը առավոտից կսկսվեն ակցիաները, երեկոյան կունենանք հանրահավաք և երթ»,- ասաց Ի.Սաղաթելյանը։