Ձեր վստահելի աղբյուրը

«Հերթական մանիպուլյացիան է»,- ԵՊՀ դիմաց լրագրողների հետ զրույցում ասաց ՀՅԴ ԳՄ ներկայացուցիչ, ԱԺ փոխնախագահ Իշխան Սաղաթելյանը՝ արձագանքելով ԱԺ նախագահ Ալեն Սիմոնյանի այն հայտարարությանը, որ, ի պատասխան լրագրողի հարցին,  թե ինչու իշխանությունները նախկինի նման չեն հայտարարում, որ Արցախը չի կարող լինել Ադրբեջանի կազմում, ասել էր. «Չեմ ասում, քանի որ այն նշանակում է բանակցություններից առաջ ինչ-որ գիծ դնել՝ ասելով, որ սրանից այն կողմ չենք անցնում: Որևէ բան ասելով՝ կարող եմ կանխորոշել և սահմանափակել հայկական կողմի բանակցային հնարավորությունները: Հիմա ինչ-որ մի լավ լոզունգ կամ վերնագիր տալու համար հայտարարություններ անեմ և հետագայում այն ազդի բանակցային գործընթացի վրա՞»:

Սաղաթելյանի խոսքով, ով բանակցում է  երկրի ու ժողովրդի անունից, պարտավոր է հայտարարել այն կարմիր գծերը, որոնք երբևէ չի անցնելու։

«Սա է մեր պահանջը։  Ուրիշ բան չենք պահանջում։ Ասում ենք՝ դու մեր թիկունքում բանակցություն ես վարում առանց կարմիր գիծ ունենալու, կամ ունի՝ նշաձողն իջեցնում է։ Ասում ենք՝ երբ ժողովրդի ու պետության անունից բանակցություն ես վարում, առնվազն կարմիր գծերը պետք է ֆիքսես։ Իրենք վախենում են, քանի որ Ալիևին խոսք են տվել։ Պատերազմից անցել է 1,5 տարի, միայն  ներքին զորքերի ու ոստիկանների թիվն է  ավելացել, իսկ բանակի  թիվը կրճատվել է,- ասաց ընդդիմադիր գործիչը։

Նա նշեց, որ իրենք այս իշխանությանը քաղաքական փակուղի են մտցրել։

«Իրենք  այլևս ասելիք չունեն։ Մենք ձևակերպել ենք այն նվազագույն պահանջները,  որով հանդես պետք է գա Հայաստանի ցանկացած իշխանություն։ Իրենք  փախնում են  այդ պահանջներից, որովհետև գնում են երկիրը հանձնելու ճանապարհով։

Ասում էին՝ վախենում ենք գնալ խորհրդարան, օրակարգ չունենք, իշխանության պայքար է, ոչ թե Արցախի համար։ Ասել ենք՝ եկեք խորհրդարան, սա օրակարգը, սա էլ պահանջները։ Փախած են։ Մնացածը լոլոներ են, որ փորձում են ստեղծված իրավիճակից դուրս գալ»,- ասաց Իշխան Սաղաթելյանը։

Անդրադառնալով երեկ կառավարության շենքի մոտ տեղի ունեցած դեպքերին, նա ասաց. «Երեկ իշխանությանների կողմից կազմակերպվեց սադրանք, որն ամբողջությամբ իրականացրեց ոստիկանությունը։ Գնացել էինք կառավարության դիմաց, շատ քաղաքակիրթ ձևով ասել էինք, որ շենք չենք շրջափակում, պատգամավորները բարձրանան վերև, փոխանցեն ժողովրդի պահանջը։

Վերջին հաշվով նվազագույնը  առնվազն 330 հազար քաղաքացու անունից խոսելու  և պահանջ ներկայացնելու իրավունք, մանդատն ունենք։ Ինչ տեղի ունեցավ։ Արգելեցին պատգամավորների մուտքը, քաղաքացիները փորձեցին  բացել մուտքը, տեղի ունեցավ սադրանքը։

Պաշտոնապես 111 հոգու բերման են ենթարկել, իրականում ավելի շատ, 30-40 հոգու վրա փորձում են  գործ կարել։ Ունենք նաև ձերբակալվածներ։ Իրականում իրենք փորձում են ձերբակալությունների, կալանավորումների, տարբեր ճնշումներ բերման ենթարկելու ճանապարհով շարժման ակտիվիստներին մեկուսացնել, վախեցնել մեր քաղաքացիներին, սպառնում են, բիրտ, ոչ իրավաչափ ուժ են կիրառում»։

Իսկ թե ինչով էր պայմանավորված ոստիկանների երեկվա պահվածքը, Սաղաթելյանն ասաց, որ ինքը պայմանավորում է մայիսի 28-ին տեղի ունեցած իրադարձություններով՝ խոշոր հանրահավաք Արցախում,  բազմահազարանոց հանրահավաք Երևանում։

«Կառավարությունում նստած էն մի հոգին չդիմացավ,  շատ ուղիղ հրահանգեց ջարդել մարդկանց, ոստիկանությունն էլ դարձել է այդ մարդու ձեռքի գործիքը, այդ պատասխանատվության տակ մտավ ու արեց։ Դրանով եմ պայմանավորում։ Այլ բացատրություն չկա։ Իրենք մտածում էին, որ այս ամեն ինչը այսքան չի շարունակվի, մարդիկ կհոգնեն, կնահանջեն, բայց մայիսի 28-ին լրիվ հակառակը տեղի ունեցավ,  նյարդերը տեղի տվեց»,- ասաց Իշխան Սաղաթելյանը։