Ձեր վստահելի աղբյուրը

Կառավարական 3-րդ շենքի դիմաց Նիկոլ Փաշինյանի հրաժարականի պահանջով բողոքի ակցիայի մասնակիցների ու ոստիկանության միջև բախումներին ակտիվորեն արձագանքել է միջազգային մամուլը։

Euronews-ը   գրել է, որ հազարավոր մարդիկ բողոքի տարբեր ակցիաներ են իրականացնում Նիկոլ Փաշինյանի դեմ՝ փակում ճանապարհներ, շրջափակում կառավարական շենքեր, խաթարում մետրոպոլիտենի աշխատանքը։

Աղբյուրը գրել է, որ նախարարությունների շենքի շրջափակման ընթացքում բախումներ են սկսկել ոստիկանների ու ակցիայի մասնակիցների միջև։ Այն հրապարակել է ոստիկանության տարածած հայտարարությունը։

Reuters-ն էլ անդրադարձել է բախումներին, նշել, որ ոստիկանությունը ձերբակալություններ է իրականացրել։ Աղբյուրը հիշեցնում է, որ Երևանում բողոքի ակցիաներն ընդդեմ Նիկոլ Փաշինյանի ակտիվացան, երբ նա հայտարարեց՝ միջազգային հանրությունը ստիպում է մի փոքր իջեցնել Արցախի կարգավիճակի նշաձողը։

Reuters -ի հրապարակումը տարածել է նաև Usnews-ը։   

Jordan news-ը հրապարակել է France-Presse գործակալության նյութը. երկուշաբթի օրը հարուրավոր ցուցարարներ երթով անցել են Երևանի կենտրոնով, մինչ կառավարության շենքերի մուտքը փակելը: Բախումները սկսել են այն բանից հետո, երբ ցուցարարները փորձել են ճեղքել ոստիկանական շղթաները և մտնել շենք, փոխանցել է AFP-ի լրագրողը:

Բողոքի ակցիայի ժամանակ խորհրդարանի փոխխոսնակ, ընդդիմության առաջնորդ Իշխան Սաղաթելյանը կառավարության աշխատակիցներին հորդորել է հեռու մնալ Փաշինյանից, որպեսզի «չկիսեն երկիրը կործանելու նրա պատասխանատվությունը»։