Ձեր վստահելի աղբյուրը

«Շատ անկեղծ պետք է ասեմ, որ չեմ մտածում, որ հնարավոր կլինի ամբողջությամբ արտացոլել հանրային ծառայության այն կոնցեպտը, որը դրվել է «Հանրային ծառայության մասին» և «Դիվանագիտական ծառայության մասին» օրենքներում»,-ԱԺ Պետական-իրավական հարցերի հանձնաժողովի նիստում հայտնեց հանձնաժողովի նախագահ ՔՊ պատգամավոր Վլադիմիր Վարդանյանը՝ զեկուցելով իր հեղինակած «Դիվանագիտական ծառայության մասին» օրենքում փոփոխություններ և լրացումներ կատարելու մասին նախագիծը:

Իր այդ պնդումը Վարդանյանը հիմնավորեց նրանով, որ դիվանագիտական ծառայությունը և դիվանագիտական ծառայության մասին օրենքը դեռևս 1818 թվականի Վիեննայի կոնգրեսից հետո ձեռք է բերել բավականին կայունություն և այդ պատճառով դրանից շատ շեղվել չի կարող:

«Չենք կարող շեղվել, քանի որ այն կարող է առաջացնել հակասություններ մեր և գործընկեր երկրների միջև՝ դիվանագիտական ծառայությունների ըմբռնման հարցում, ինչը դրական առումով չի կարող անդրադառնալ դիվանագիտական հարաբերությունների զարգացման վրա»,-հայտարարեց հանձնաժողովի նախագահը:

Վլադիմիր Վարդանյանը տեղեկացրեց, որ դեռևս 1946 թվականից հետո ՄԱԿ-ի միջազգային իրավունքի հանձնաժողովը  գտել էր, որ դիվանագիտական հարաբերությունները և իրավունքներն ընդհանրապես մոդիֆիկացման կարիք չունեն, քանի որ դրանք կմտցնեն կոշտության տարր, որը բնորոշ չէ դիվանագիտական հարաբերություններին:

ՔՊ պատգամավորը դիվանագիտական իրավունքի պատմության ծավալուն ակնարկ մատուցելուց հետո անցավ նախագծի ներկայացմանը:

Օրինագծի հիմնավորման մեջ ասվում է. «Օրենքի նախագծի ընդունմամբ արտաքին գործերի նախարարությունում «Քաղաքացիական ծառայության մասին» օրենքի համաձայն նախարարության աջակցող կառուցվածքային ստորաբաժանումներում կներդրվի քաղաքացիական ծառայության համակարգը: Գլխավոր քարտուղարը (որը դիվանագիտական պաշտոն է) կունենա տեղակալ, որը կհամարվի քաղաքացիական ծառայող և կհամակարգի աջակցող մասնագիտական կառուցվածքային ստորաբաժանումների աշխատանքը, ինչն էական նշանակություն կունենա նախարարության բնականոն գործունեության ապահովման համար:

Դիվանագիտական աստիճանների սանդղակում կիրականցվի փոփոխություն, ըստ որի՝ կփոփոխվեն երկրորդ և առաջին քարտուղարների դասային աստիճանները:

Հերթական դիվանագիտական աստիճանի շնորհման ժամկետների փոփոխության առումով հաշվի է առնվում այն հանգամանքը, որ ՀՀ արտաքին գործերի նախարարության աշխատակազմում կամ առանձնացված ստորաբաժանումներում ծառայության ժամկետն առնվազն երկու տարի է, իսկ դրանից հետո օտարերկրյա պետություններում ՀՀ դիվանագիտական ներկայացուցչություն կցորդի աստիճանով գործուղվող դիվանագետների համար խնդիրներ են առաջանում համապատասխան մարմինների հետ շփումներում՝ ելնելով այն հանգամանքից, որ բազմաթիվ երկրներում կցորդները համարվում են տեխնիկական աշխատակիցներ: Տվյալ փոփոխությունը հնարավորություն կտա օտարերկրյա պետություններում և միջազգային կազմակերպություններում ՀՀ դիվանագետներին գործուղել առնվազն երրորդ քարտուղարի դիվանագիտական աստիճանով՝ ավելացնելով աշխատանքի արդյունավետությունը»:

Վարդանյանը նաև հայտնեց, որ նախագծով կրճատվել են դիվանագիտական աստիճանները:

Ըստ օրենքի հեղինակի՝ փոփոխությունների արդյունքում հնարավոր կլինի ՀՀ ԱԳՆ-ում ձևավորել միջին դասի դիվանագետների խումբ, որը ժամանակի ընթացքում կպահպանվի և կավելանա՝ հնարավորություն տալով ՀՀ ԱԳՆ-ին առավել լայն ընտրություն ունենալ տարբեր պաշտոնների նշանակման ժամանակ: