Ձեր վստահելի աղբյուրը

«Բավականին լավ, կառուցողական հանդիպում է եղել»,-ԱԺ-ում պատասխանելով հայ-ադրբեջանական սահմանազատման և սահմանագծման հանձնաժողովի առաջին հանդիպման մասին հարցին՝ ասաց ՏԿԵ նախարար Գնել Սանոսյանը: 

Լրագրողը հիշեցրեց, որ այդ հանդիպումից հետո թշնամու դիպուկահարից զոհվել է հայ զինծառայող և հարցրեց, թե այդ դեպքում ո՞րն է այդ հանդիպման կառուցողականը:

«Կոնկրետ տվյալ վայրի հանդիպումը եղել է կառուցողական, մասնագիտական,  նորմալ քննարկում»,-կրկնեց նախարարը և տեղեկացնելով, որ առաջին հանդիպման համար բավականին կարևոր հարցեր են բարձրացվել, աշխատանքային օրակարգ է սահմանկվել, հավելեց. «Մենք պետք է ցավով արձանագրենք, որ այն համարում էինք կառուցողական, նորից եմ կրկնում՝ այդ հանդիպումը նորմալ է անցել մեր գնահատմամբ, բայց այսօր, նման միջադեպերը խանգարում են այն ամբողջ գործընթացին, որը տեղի է ունենում և շատ դատապարտելի է, երբ, որ նորմալ աշխատանքային փուլին կարող է հաջորդել նման վարքագիծ, որի արդյունքում մեր անմեղ տղաները, զինվորները, որոնք այնտեղ սահման են պաշտպանում, նման անմտությանը զոհ են գնում»:

Գնել Սանոսյանը հայտնեց, որ կողմերն սահմանների իրենց քարտեզներն ունեն և հանդիպումների ժամանակ կբերեն աշխատանքային դաշտ:

Պատասխանելով հարցին, թե ընդդիմությունը ցանկանում էր իմանալ, թե նախարարները արդյո՞ք համակարծիք են, որ Արցախը չի կարող լինել Ադրբեջանի կազմում՝ Գնել Սանոսյանը պատասխանեց. «Ընդդիմությունն այդպես էլ չի կողմնորոշվում՝ ում մոտ, ինչ հարցով գնա:  Թող գան, քարտեզները փռենք, քննարկենք, թե որտեղ ենք ասֆալտ անում, ջրագիծ փոխում, ջրամբարներն ուր հասան: Թող գան աշխատենք, թե չէ, ժողովո՛ւրդ, կլինի, որ, օրինկա, մենք իրար հետ գնանք ինչ-որ Վարդուշի տանը հարցազրույց անենք, չի լինի, չէ՞: Ամեն նախարարություն պետք է գնալ այն հարցերով, որն առնչվում է այդ նախարարությանը, մեր նախարարություն գալիս են Արցախի հարցով, որ ի՞նչ անեն»:

Լրագրողը հիշեցրեց, որ Գնել Սանոսյանը քաղաքական պաշտոն է զբաղեցնում և պարտավոր է պատասխանել իր քաղաքական թիմի կողմնորոշման վերաբերյալ հարցին:

«Ես հիշում եմ, որ քաղաքական պաշտոն եմ զբաղեցնում, լավ հիշում եմ, թե որ թմի անդամ եմ և Արցախի հարցերում իմ անձնական տեսակետն էլ ունեմ՝ որպես մարդ և նախարար, բայց հարցեր կան, որոնց պատասխան տվողը ես չեմ: Դուք ինչո՞ւ եք ուզում շրջակա միջավայրի կամ ՏԿԵ նախարարը Արցախից խոսի, դրա համար կան համապատասխան գերատեսչություններ և, ի պատիվ մեր գործընկերների, շատ լավ աշխատում են»: