Ձեր վստահելի աղբյուրը

Նիկոլ Փաշինյանի կողմից առերևույթ պետական դավաճանություն կատարելու և պաշտոնեական լիազորություններն առերևույթ անցնելու փաստի առթիվ քրեական գործ հարուցելու պահանջով բողոքի քննությունն կշարունակվի դռնբաց։ Վերաքննիչ քրեական դատարանը, դատավոր Կարեն Բիշարյանի նախագահությամբ, բավարարել է բողոքաբեր Արծվիկ Մինասյանի և Հակոբ Մարտիրոսյանի միջնորդությունը՝ գործի քննությունը դռնբաց ռեժիմով անցկացնելու վերաբերյալ։ 

44-օրյա պատերազմում զոհված Մենուա Հովհաննիսյանի մայրը՝ Կարին Տոնոյանը գրում է.

«ՀՀ վերաքննիչ քրեական դատարանում լսվող Նիկոլ Փաշինյանի կողմից առերևույթ պետական դավաճանություն կատարելու հատկանիշով քրեական գործ հարուցելու մասին հաղորդմանը 1-ին ատյանի դատարանի կողմից պատշաճ ընթացք չտալու մասին վերաքննիչում բողոքարկման դատավարությունը նորից դռնբաց կանցկացվի:

Հիշեցնենք, որ օրեր առաջ  դատավոր Կ. Բիշարյանը ծնողների վրդովմունքի և բանավեճի մեջ մտնելու պատճառով  որոշել էր դռնփակ անցկացնել նիստերը, որը ծնողների կողմից ԲԴԽ ներկայացրած բողոքի և բողոքող կողմի միջնորդության արդյունքում չեղարկվեց և որոշումն այսօր փոխվեց. հունիսի 3-ի դատայկան նիստն արդեն կանցկացվի դռնբաց:

 Ցավոք ծնողների և ԲԴԽ նախագահ Գ. Ջհանգիրյանի մայիսի 30-ի կրկնակի հանդիպման տեսագրությունը ծնողներին չտրամադրվեց՝ տեխնիկական խոտանի պատճառաբանությամբ (որին, իհարկե, մենք բացարձակ չենք հավատում), բայց մենք դեռևս ունենք 2 պահանջ.
1. Պահանջում ենք մեզ ներկայացնել համոզիչ հիմքեր՝ դատավոր Կ.  Բիշարյանի նշանակման անկողմնակալության մասով:
2. Ծնողներին տալ, որպես տուժողների(զոհվածների) իրավահաջորդներ, շահագրգիռ կողմի կարգավիճակ:

Հուսանք այս հարցերում նույնպես կհասնենք ցանկալի և արդարացի արդյունքի»։