Ձեր վստահելի աղբյուրը

Աթենքի թերթերի խմբագիրների միության  շենքում տեղի է ունեցել Հունաստանում ՀՀ դեսպանության կողմից կազմակերպված փոքրասիական աղետի 100-րդ տարելիցին նվիրված միջոցառումների շարքից ևս մեկ միջոցառում: Այս մասին տեղեկացնում են դեսպանությունից։

«Միջոցառման գլխավոր բանախոս` Հայոց ցեղասպանության թանգարան-ինստիտուտի հիմնադրամի գիտնական, Զմյուռնիայի աղետի ուսումնասիրությունների մասնագետ,  պատմական գիտությունների թեկնածու Թեհմինե Մարտոյանը հանդես է եկել «Զմյուռնիայի աղետի հայ ականատեսների չհրապարակված վկայությունները» թեմայով դասախոսությամբ:

Միջոցառմանը ներկա էին Աթենքի թերթերի խմբագիրների միության  անդամներ, Հունաստանի կառավարության պաշտոնյաներ, խորհրդարանականներ, հայ հոգևոր դասի ներկայացուցիչներ, Հունաստանում հավատարմագրված դիվանագետներ, համայնքի կազմակերպությունների բազմաթիվ ներկայացուցիչներ:

Ողջույնի խոսքով հանդես է  եկել Աթենքի թերթերի խմբագիրների միության  նախագահ տիկին Մարիա Անդոնիադուն: Ներկաներին ողջունեց ու ելույթով հանդես է  եկել  Հունաստանում ՀՀ դեսպան պարոն Տիգրան Մկրտչյանը:

Անդրադառնալով միջոցառմանը դեսպան Մկրտչյանը նշել է, որ Հունաստանում Հայաստանի Հանրապետության դեսպանության կողմից կազմակերպվող փոքրասիական աղետին` Զմյուռնիայի 100-րդ տարելիցին նվիրված միջոցառումների շարքից ս.թ. մայիսի 31-ի միջոցառումը տարբերվում է մնացած միջոցառումներից, քանի որ միջոցառման գլխավոր բանախոսը ժամանել է Հայաստանից՝ հանձին Հայոց ցեղասպանության թանգարան-ինստիտուտի հիմնադրամի գիտնական, պատմական գիտությունների թեկնածու տիկին Թեհմինե Մարտոյանի: Դեսպան Մկրտչյանը կարևորել է նաև դասախոսության թեման՝ «Զմյուռնիայի աղետի հայ ականատեսների չհրապարակված վկայությունները», բնութագրելով այն որպես եզակի: Դեսպանն ընդգծել է, որ խոսքը գնում է մինչ այժմ չհրապարակված և մեծ արժեք ներկայացնող հայերի վկայությունների մասին՝ նշելով, որ այդ վկայությունները մեծ կարևորություն ունեն ոչ միայն հայ ժողովրդի, այլև Հունաստանի պատմության համար: Դեսպանն արձանագրել է, որ խոսքը գնում է ինչպես 1922 թվականից առաջ, այնպես էլ 1922 թվականի և դրանից հետո Զմյուռնիայի քրիստոնյա բնակչության` հայերի և հույների ճակատագրերի, ընդհանուր պատկերի և զարգացումների մասին:

Անդրադառնալով դասախոսությունում ներկայացված վկայություններին, հուշերին, ապա դեսպան Մկրտչյանը նշել է, որ Օնիկ Ղազերյանի «Կենսագրական նոթերը» և Միքայել Բարթիկյանի «Արնաշաղախ Իզմիրը»  կարևոր տեղեկություն են տալիս Զմյուռնիայի հայերի և հույների խաղաղ կյանքից, առօրյայից, այդ քրիստոնյա քաղաքի  անցուդարձից, բայց նաև տեղեկացնում` հայերի և հույների նկատմամբ ատելություն սերմանելու, զանգվածային բռնությունների, ծրագրված սպանությունների, բռնի տեղահանության և քաղաքի մահմեդականացման վերաբերյալ։

Ավարտելով իր խոսքը դեսպան Մկրտչյանը հույս է հայտնել, որ կհաջողվի նաև հունարեն թարգմանաբար ներկայացնել այդ հուշերը` այն հասանելի դարձնելով նաև Հունաստանի լայն շրջանակների համար»,- նշված է հաղորդագրությունում: