Ձեր վստահելի աղբյուրը

Տավուշի մարզի Աչաջուր համայնքի բնակիչ, ԱԺ շենքի դիմաց էշով ակցիա իրականացրած Սևադա Ղուկասյանը երեկ գիշեր, դատավոր Գևորգ Պողոսյանի որոշմամբ, երկու ամսով կալանավորվել է սուտ մատնության մեղադրանքով՝ ՀՀ Քրեական օրենսգրքի 333-րդ հոդվածով: Սևադա Ղուկասյանի պաշտպան Սերգեյ Հարությունյանը Panorama.am-ի հետ զրույցում ասաց, որ այս հոդվածով քրեական գործը հարուցվել է կապված այն հանգամանքի հետ, որ դեռևս մեկ ամիս առաջ Սևադա Ղուկասյանը հաղորդում էր տվել հանցագործության մասին, որ ոստիկանների անհամաչափ, բռնի գործողությունների հետևանքով իր ատամը կոտրվել է։

«Նախաքննություն է տեղի ունեցել, գործն ԱԱԾ-ն էր քննում։ Ընթացքում ինչ-որ ձայնագրություն  է հրապարակվել, որտեղ պարզ չէ,  կոնտեքստից կտրված, մոնտաժված է Սևադայի խոսքը ու դա մեկնաբանվել է ի վնաս իրեն, թե ինքը նախօրոք է դա պլանավորել, սակայն որևէ կերպ ապացուցված չէ։ Սևադան խոսելով իր ծանոթներից մեկի հետ, ասում է՝ ատամս է կոտրվել, պլոմբն է պոկվել, գնում եմ ոստիկաններին շառ անելու, թե ինչ … նման արտահայտություն։ Բայց դա պարզ չէ՝ շառ անելն իր լեքսիկոնում բողոքելու է, հաղորդում է  տալու, քանի որ հենց նոր է կոտրվել և ինքը ոստիկանական մեքենայում է, թե նախօրոք է մտածել, թե հումոր է։ Այդ ամենը պարզ չէ, բայց մեկնաբանվեց ի վնաս իրեն»,- մանրամասնեց փաստաբանը։

Նրա խոսքով, Սևադա Ղուկասյանը բնավորությամբ կատակասեր է, օրինակ երբ գնացել էին իր տուն խուզարկության, հեռախոսով ասում էր, որ իր տանը տանկ ունի։

«Կարծում եմ՝ կամ եղել է կատակ կամ ընթացքում հնարավոր է մոնտաժված է, ոստիկանական մեքենայի միջից է խոսակցությունը եղել»,- ասաց Ս. Հարությունյանը։ 

Նա ընդգծեց, միաժամանակ նախադեպ է ստեղծվում, որ եթե լինի անհամաչափ ուժ, բռնություն ոստիկանի կողմից, քաղաքացին մտահոգվի, վախենա, արդյոք արժի դրա հետ կապված հաղորդում տալ, թե լռի, որովհետև կարող է չապացուցվելու դեպքում դա իր դեմ դուրս գա։

Դատարանի որոշումը բողոքարկելու է։ Ս.Հարությունյանն ասաց, որ կալանավորման որևէ հիմք չկար, նույնիսկ հաշվի չեն առել այն հանգամանքը, որ խնամքին ունի առողջական խնդիրներ ունեցող թոշակառու ծնողներ, անչափահաս՝ 8 տարեկան երեխա։

«Իրատեսական չէ, որ նա կարող է փախնել, խոչընդոտել քննությանը, ոչ էլ նոր հանցագործություն գործեր։ Ինչ է՝ պետք է նոր հաղորդում տա՞ր»,- նշեց փաստաբան Ս. Հարությունյանը։