Ձեր վստահելի աղբյուրը

Ազգային ժողով ներկայացված հայտարարության 7 կետերը բխում են Հայաստանի անկախության հռչակագրից, Սահմանադրությունից, մեր պատվից ու թասիբից։ Ֆրանսիայի հրապարակում հայտարարեց «Հայաստան» խմբակցության պատգամավոր Արամ Վարդևանյանն՝ անդրադառնալով ընդդիմադիր «Հայաստան» և «Պատիվ ունեմ» խմբակցությունների ներկայացրած «Հայ-ադրբեջանական և հայ-թուրքական հարաբերությունների կապակցությամբ» Ազգային ժողովի հայտարարության նախագիծը, որը պետք է քննարկվեր ԱԺ արտահերթ նիստում, սակայն «Քաղաքացիական պայմանագիր» կուսակցությունը տապալեց նիստը՝ չմասնակցելով դրան։

«Մենք այդ  նախագիծը ներկայացրել էինք Ազհային ժողով, բայց պատկերացրեք՝ ԱԺ-ում ներկա էին ընդդիմադիր խմբակցությունների պատգամավորներն ու վերջ»,- ասաց պատգամավորը, որի խոսքերից հետո հրապարակում հավաքվածները սկսեցին վանկարկել՝ «ամոթ», «ամոթ»։

Արամ Վարդևանյանի խոսքով՝ այդ 7 կետը քաղաքականություն չէ, այն պետության  պետականության հիմքն է։ «Ու էս մարդիկ չեն գալիս, չեն գալիս նրա համար, քանի որ վախենում են։ Բոլորս գիտենք, որ սրա լուծումը մեկն է՝ առանց Նիկոլ Հայաստան»,- նշեց պատգամավորը և նրա հետ միասին հրապարակում մարդիկ սկսեցին վանկարկել՝ «Առանց Նիկոլ Հայաստան»։

Ըստ նրա՝ եթե ԱԺ-ում այլ նախագծերի հետ կապված քվորում չլիներ, դա նորմալ կլիներ, սակայն երբ նման նախագծի դեպքում քվորում չի լինում, դա չի բխում Հայաստանի շահերից։

«Մենք պայմանավորվել ենք, որ հոգնել չկա, նահանջել չկա։ Սա պայքար է»,- հայտարարեց Արամ Վարդևանյանը։