Ձեր վստահելի աղբյուրը

Քաղաքի լարված մթնոլորտից, աղմուկից կտրվելու համար հաճախ ցանկություն է առաջանում հեռանալ այդ ամենից, առանձնանալ ու պարզապես մոտ լինել բնությանը։

Այդ հանգիստը կարող ենք գտնել նաև Երևանից 90 կմ հեռավորության վրա գտնվող հրաշալի մի բնաշխարհում՝ Դիլիջանում, որն իր յուրահատուկ բնությամբ, պատմամշակութային եզակի գանձերով ու դինամիկ զարգացող ներկայով գրավում է ոչ միայն հայաստանցիներին, այլև զբոսաշրջիկներին։

Կոլորտային քաղաքն իր հին ու նոր տներով, փայտյա պատշգամբներով, լայն ու նեղ փողոցներով ստեղծում է յուրահատուկ մթնոլորտ։ Զբոսաշրջիկներն այստեղ հիմնականում ցանկանում են մնալ այնպիսի հանգստյան տներում, որոնք մոտ են անտառին։

Անտառի սրտում է տեղակայված «Դիլիջան ռեզորթ & SPA» առողջարանային կենտրոնը։ 2008 թվականին հիմնովին վերանորոգվելուց հետո հյուրանոցային համալիրը համարվում է Դիլիջանի լավագույն հանգստյան տներից մեկը՝ շնորհիվ իր բացառիկ բնակլիմայական պայմանների, պրոֆեսիոնալ անձնակազմի։ Հանգստացողներին այստեղ սպասվում է անդորր, հանգստություն, թարմ օդ, համեղ սնունդ։

Ամեն ինչ՝ հանգստի համար

«Դիլիջան ռեզորթ & SPA»-ն դեռևս խորհրդային տարիներին հայտնի էր որպես առողջարանային համալիր։ Վերակառուցվելուց հետո այն ներկայանում է նոր`հանգստի և ծառայությունների համալիր տեսքով։

Հյուրանոցն ունի 70 սենյակ, բար, ռեստորան, փակ լողավազան, շոգեբաղնիք, մարզասրահ, մանկական սենյակ, կոնֆերանսների համար նախատեսված ընդարձակ սրահներ, բիլիարդի սենյակ,  խաղահրապարակ և, իհարկե, SPA կենտրոն։ Այն տրամադրում է երկտեղանի և ընտանեկան համարներ: Տարածքում առկա է անվճար Wi-Fi և ավտոկայանատեղի:

Առողջարանային համալիրին ուրույն տեսք են տալիս 2, 3 սենյականոց և երկհարկանի 12 քոթեջները։

Հյուրանոցային համալիրի գրավչության, մատուցվող ծառայությունների, կատարված աշխատանքների և առօրյայի մասին Panorama.am-ի թղթակցին պատմում է «Դիլիջան ռեզորթ & SPA» ՓԲԸ-ի տնօրեն Դիանա Միրզոյանը։

Նրա խոսքով՝ տուրիստական սեզոնը հիմնականում բացվում է մարտի վերջից և տևում է մինչև նոյեմբերի սկիզբ։ Կորոնավիրուսից առաջ, երբ Հայաստանում մեծ թափով զարգանում էր զբոսաշրջությունը, հյուրանոցը տուրիստների մեծ հոսք ուներ տարբեր երկրներից։ Այսօր էլ տուրիստների պակաս չունեն, սակայն դեռ չեն հասել մինչև կորոնավիրուսն ունեցած հոսքին։ 

Տնօրենը նշում է, որ արտերկրից ժամանած տուրիստները մարզերում հիմնականում մեկ-երկու օր են անցկացնում, իսկ հայաստանցիները հյուրանոցային ծառայություններից ավելի հաճախ օգտվում են Ամանորին և ամառվա պիկ շրջանում՝ հուլիսի կեսերից մինչև օգոստոսի վերջ։ Տնօրենն ասում է, որ դժգոհելու առիթ չունեն, աստիճանաբար հյուրերի թիվն ավելանում է, իսկ դրա համար իրենք մշտապես իրականացնում են բազմաթիվ միջոցառումներ, որպեսզի հյուրերը սիրով մնան իրենց հյուրանոցում և հեռանան ջերմ տպավորություններով։

Ի դեպ, այստեղ քիչ չեն մշտական հյուրերը, որոնք տարիներ շարունակ իրենց հանգիստն անցկացնում են հենց «Դիլիջան ռեզորթ»-ում։ Նրանց համար կարևոր է վայրը, որտեղ ուղղակի հնարավոր է զբոսնել և վայելել բնությունը, ինչպես նաև մեծ նշանակություն ունի սպասարկումը։

Հյուրանոցում ավելի հաճախ լինում են պասիվ հանգստի սիրահարները, քանի որ այստեղ լիարժեք հանգստանալու, առօրյա հոգսերից կտրվելու համար կան բոլոր պայմանները։

Դիլիջանցիները՝ նվիրված աշխատուժ

«Դիլիջան ռեզորթ & SPA» հյուրանոցային համալիրի սեփականատերը վերագործարկելով այն՝ առաջին հերթին դրել է պայման, որ այստեղ աշխատեն տեղացիները։ Տնօրենն ասում է, որ ունեն 80-90 աշխատող, որոնց 99․9%-ը Դիլիջանից են։ «Ի դեպ ստեղծման օրվանից առ այսօր անձնակազմի 80 տոկոսն անփոփոխ է, այսինքն՝ մարդիկ չեն հեռանում։ Կորոնավիրուսի ժամանակ երկու ամիս հյուրանոցը չի գործել, սակայն բոլոր աշխատատեղերը պահպանվել են և որևէ մեկն աշխատանք չի կորցրել»,- նշում է նա։

Ժամանակ առ ժամանակ աշխատակիցները վերապատրաստվում են, դա ամենակարևոր պայմանն է, որպեսզի հետ չմնան զարգացումներից։ Հրավիրում են մասնագետների և տեղում անցկացնում դասընթացները։

Դիանա Միրզոյանի խոսքով՝ հյուրանոցային ոլորտն ամեն օր զարգանում է, մեծ մրցակցություն կա, դրա համար պետք է միշտ քայլեն ժամանակին համընթաց։ Ուստի կարևոր տեղ են հատկացնում վերապատրաստմանը, և այսօր կարող են փաստել, որ իրենց հաջողությունները նաև պրոֆեսիոնալ աշխատակիցների շնորհիվ են։

«Մեզ համար ամենամեծ գնահատականը հյուրերի կարծիքն է, եթե նրանք ժպիտով են հեռանում և բարի, ջերմ խոսքեր են շռայլում անձնակազմին, ուրեմն մենք այս հարցում էլ ենք հաջողել»,- ասում է տնօրենը։

Հյուրանոցն ունի առաջարկությունների և կարծիքների գիրք, որտեղ եղած գրառումներն օգնում են աշխատանքների ճիշտ կազմակերպմանը։ «Եթե հյուրերը բացասական կարծիք են գրում, դա նշանակում է, որ համեմատում են այլ հյուրանոցների հետ, իսկ մենք պետք է այնպես անենք, որ շտկենք թերությունները»,- նշում է նա։

Չնայած գիրքը նախատեսված է ոչ դրական կարծիքների համար, դրանում քիչ չեն  շնորհակալական խոսքերը։ «Մի քանի օր այստեղ մնալուց հետո ցանկանում էի հայերեն սովորել, որ անձնակազմին շնորհակալություն հայտնեի իրենց մայրենի լեզվով։ Շնորհակալ եմ ջերմ ընդունելության համար, հուսով եմ, որ նորից կհանդիպենք»,- գրել է արտասահմանցի զբոսաշրջիկներից մեկը։

Ովքեր կարող են հանգստանալ ««Դիլիջան ռեզորթ & սպա»-ում

Շատերի մոտ տպավորություն է ստեղծվել, որ Հայաստանում հանգստանալը թանկ արժե, ուստի մարդիկ նախընտրում են իրենց հանգիստ անցկացնել հարևան Վրաստանում, որտեղ գները համեմատած ցածր են։

«Դիլիջան ռեզորթ & սպա»-ի տնօրեն ասում է, որ հյուրանոցը վարում է ճկուն գնային քաղաքականություն, ինչի արդյունքում հյուրանոցը հասանելի է տարբեր խավի մարդկանց համար։ Ըստ նրա, այսօր գործող  սոցփաթեթի շրջանակում ևս մեծ թվով մարդիկ հնարավորություն ունեն հանգստանալ իրենց մոտ։

Բացի այդ, բարձր (դեկտեմբերի վերջից՝ մինչև հունվարի 15-ը և մայիսի 1-ից` մինչև նոյեմբեր) և ցածր սեզոնների ժամանակ գնային փոփոխություններ են լինում, և մարդիկ կարող են իրենց հանգիստը կազմակերպել ավելի մատչելի գներով։

Ի դեպ, այսօր հյուրանոցում հանգստանում են նաև Ռուսաստանից ժամանած հյուրերը՝ հիմնականում ընտանիքներով։ Նրանցից ոմանք արդեն մի քանի շաբաթ է ապրում են այստեղ, բնության գրկում համատեղում են հանգիստն ու աշխատանքը, վայելում են հայկական խոհանոցը։  

Համեղ և թարմ սնունդ

«Դիլիջան ռեզորթ & SPA» հյուրանոցում մեծ ուշադրություն են դարձնում սնունդին։ Պարտադիր պայման է՝ պետք է մթերքը թարմ, էկոլոգիապես մաքուր և անվտանգ լինի։ Այստեղ հյուրերին տրվում է նախաճաշ և ճաշ։

Սնունդը հիմնականում գնում են տեղացիներից։ «Մենք նաև այս հարցում ենք աջակցում դիլիջանցիներին, որպեսզի իրենց ստեղծած բարիքները կարողանան իրացնել, իսկ մենք միշտ ունենում ենք թարմ մթերք», - ասում է Դիանա Միրզոյանը։

Խոհանոցը տարբերվում է իր բազմազանությամբ։ Հյուրերին մատուցվում է թարմ աղցաններ, հատկապես սիրված է «Դիլիջան» աղցանը, տեղում պատրաստվող բազմատեսակ խմորեղեններ, հայկական և եվրոպական խոհանոցների ճաշատեսակների ընտրանի։ Ի դեպ ճաշացանկը չի ներառում սառեցված սնունդ։

Սպա կենտրոն՝ միակը Դիլիջանում

«Դիլիջան ռեզորթ & SPA» հյուրանոցում հանգիստը լիարժեք կլինի, եթե օգտվեք նաև այնտեղ գործող նորագույն տեխնոլոգիաներով հագեցած SPA կենտրոնից։ 

Այն միակն է Դիլիջանում։ Այստեղ օգտագործում են ավստրալիական «Լիտիա» ապրանքանիշի արտադրանքը, որի պաշտոնական ներկայացուցիչը «Դիլիջան ռեզորթ & SPA»-ն է։ Այս միջոցների ստեղծման համար օգտագործվում են բացառապես բնական բաղադրիչներ։ Կենտրոնի աշխատակիցներն ունեն բժշկական կրթություն, վերապաստրաստվել են դրսի մասնագետների կողմից։

Դիանա Միրզոյանի խոսքով՝ SPA կենտրոն այցելում են ոչ միայն հյուրանոցում հանգստացողները։ Մարդիկ իմանալով կենտրոնի բարձրակարգ ծառայությունների մասին, նախընտրում են հենց այստեղի մասնագետներին վստահել իրենց մարմնի, դեմքի խնամքը։ Օրինակ, ծառայություններից հաճախ օգտվում են հարևանությամբ գտնվող Դիլիջանի միջազգային դպրոցի արտասահմանցի մանկավարժները, այցելուներն ու հյուրերը։

SPA կենտրոնում իրականացվում են մերսումներ, ցեխային պարուրումներ և բազմաթիվ այլ բուժական պրոցեդուրաներ։

Ծանոթանալով «Դիլիջան ռեզորթ & SPA»-ի գործունեության հետ, համտեսելով բազմատեսակ համեղ սնունդը, հրաժեշտ ենք տալիս Դիլիջանին և հյուրանոցին՝ անպայման կրկին վերադառնալու շատ մեծ ցանկությամբ։