Ձեր վստահելի աղբյուրը

Այս պայքարն ավարտվելու է միայն մեկ դեպքում, երբ մենք կարողանանք ձևավորել հայրենանվեր իշխանություն, պրոֆեսիոնալների իշխանություն։ Կառավարության դիմաց «Դիմադրություն» շարժման ակցիայի ժամանակ հայտարարեց ռազմական բժիշկ Տարոն Տոնոյանը:

Նա դիմելով ոստիկաններին՝ ասաց, ևս մեկ անգամ հորդորում է նրանց՝ չգնալ բախման, հանկարծ չփորձեն ուժ կիրառել, կդառնան հայ ժողովրդի թիվ մեկ թշնամին։

«Խոսքս ուղղում եմ մեր ոստիկան եղբայրներին։ Ես առաջին շարքերում կանգնած ուշադիր նայում էի իրենց աչքերին, նույն տղերքն են, ում ես տեսել եմ ռազմաճակատում: 1994 թ-ի ապրիլին Աշտարակի շրջանի Կոշ գյուղից Ռոբերտին բերեցին ծանր վիրավորված, վիրահատեցի, վիրահատության կեսին անեսթեզիոլոգն ասաց՝ արյան կարիք կա։ Դուրս եմ եկել, արյուն եմ տվել, նորից եկել եմ ու վիրահատությունը շարունակել: Սիրելի եղբայրներ, սիրելի ոստիկաններ, մենք դառը պարտություն ենք կրել, պարտությունը անտեր է, սակայն մենք հնարավորություն ունենք մեր մեջքը շտկելու, բայց ճանապարհը միայն մեկն է՝ պարտություն կրած հրամանատարը չի կարող շարունակել զորքը առաջնորդել։ Մեկ վայրկյան առաջ պետք է պրծնենք Նիկոլից»,- ասաց Տարոն Տոնոյանը։

Նրա խոսքով՝ լուրեր են շրջանառում, թե այս պատերազմը «հարիֆի ջեբը» գցեցին, իսկ Փաշինյանը ելույթ է ունենում և ասում՝ ի սկզբանե գիտեին, որ Ղարաբաղը պետք է տան։ «Բա որ պիտի տան՝ ո՞նց եկար իշխանության։ Այսինքն՝ դու գիտեիր, որ պիտի տան, պահելու տարբերակը չունեիր, ապա ինչո՞ւ եկար իշխանության»,- նշեց բժիշկը։

Եւ դիմելով ոստիկաններին՝ ասաց, թե արդյոք նրանք ունեն այս հարցի պատասխան ու շարունակեց․ «Այսինքն՝ նա մտածված եկավ իշխանության, խաբելով եկավ իշխանության և այսօր ամեն ինչ անում է, որԱրցախի եղբայրներին և քույրերին միայնակ թողնի, Արցախը դատարկի»։

Տարոն Տոնոյանի խոսքով՝ ոստիկանների մեջ ևս կան պատերազմին մասնակցողներ, նրանք ունեն հարազատներ, որոնք զոհվել են և հիմա ինչպես են վերաբերվում այն մարդուն, որն ասում  է, թե կարող էր այս ամենը նույնը լիներ, բայց առանց զոհերի։

«Այդ մարդը խոստովանություն է տալիս հանցագործության մասին, իսկ դուք պաշտպանում եք հանցագործին։

Ուսադիր կրող պարոնայք սպաներ, դիմում եմ ձեզ, իհարկե, ձեր մեջ կարող են լինել մարդիկ, որոնք տանը դաստիարակություն չեն ստացել և հայրենիքի մասին գաղափար չունեն, բայց ես իմ անցած կյանքի գրեթե 60 տարիներին ունեցել եմ և ունեմ ընկերներ ձեր շրջապատում, խնդրում եմ ձեզ, ձեզանից է կախված հայրենիքը դուրս բերել այս վիճակից, դուք եք այսօր ՀՀ և Արցախի Հանրապետության ճակատագիրը որոշողը, միացե՛ք մեզ, մի պաշտպանեք մի մարդու, որը հանցագործ է, ինքը խոստովանել է այդ մասին»,- ասաց Տարոն Տոնոյանը։