Ձեր վստահելի աղբյուրը

Երեկ նռնակներ են օգտագործվել, խայտառակ անհամաչափ ոստիկանական ուժ է կիրառվել ժողովրդի դեմ։ Ֆրանսիայի հրապարակում  տեղի ունեցած ասուլիսում ասաց ԱԺ «Հայաստան» խմբակցության պատգամավոր Արամ Վարդևանյանն՝ անդրադառնալով հունիսի 3-ին Պռոշյան-Դեմիրճյան խաչմերուկում տեղի ունեցած միջադեպին։

«Կարծում եմ՝ բոլորի համար պարզ է, որ Հայաստանում նման տիպի որոշումներ առանց Նիկոլ Փաշինյանի հրահանգի չէր կարող իրականացվել»,- ընդգծեց պատգամավորը՝ հավելելով, որ իշխանության ներկայացուցիչները երեկ սկսել էին մեղավորներ նշանակել կատարվածում և հիմնականում ընդդիմադիր դաշտից, սակայն, ըստ նրա, դա չի ստացվելու, քանի որ բոլորը տեսել են, թե երեկ ինչ է կատարվել։

Նրա խոսքով՝ Պռոշյան-Դեմիրճյան հատվածում անցկացվել է խաղաղ հավաք՝ այնպես, ինչպես նախորդող օրերին․ «Եթե թվում է՝ ոստիկանությունը չէր կարող ավելի շուտ հատուկ միջոցներ կիրառել, ապա չարաչար սխալվում եք։ Ուղղակի երեկ իշխանական նյարդերն այնպիսին էին, որ գիտակցում էին՝ Արցախի, Հայաստանի մասին իրենց քաղաքականության վերաբերյալ այլևս խաբելու տարբերակ չունեն, դրա համար երեկ հատուկ միջոց կիրառվեց ժողովրդի դեմ»։

Արամ Վարդևանյանը նշեց, որ հարյուրավոր քաղաքացիներ ստացել են մարմնական վնասվածքներ, ոչ բոլորն են դիմել հիվանդանոցներ։ Ըստ նրա՝ պատգամավորներից ևս ստացել են մարմնական վնասվածքներ, ունեն սալջարդեր ու կողոսկրերի վնասվածքներ, բայց չեն դիմել հիվանդանոց։

Այնուհետև պատգամավորը ներկայացրեց, թե երեկ իրականում ինչ է տեղի ունեցել։

«Ոստիկանական խմբերը՝ 7-8 ոստիկաններով, շրջապատում էին 1-2 քաղաքացու և ծեծում էին, բառացիորեն ծեծում էին։ Ասում են, թե ոստիկանները ևս մարմնական վնասվածքներ են ստացել։ Պատկերացրեք՝ տեսնում եք, թե ինչպես են 7-8 հոգով 1-2 հոգու ծեծում, ապա ի՞նչ կանեք դուք։ Ես բռնությանը դեմ եմ, իմ ընկերները դեմ են, մեր քաղաքացիների ստվար զանգվածը դեմ է դրան, բայց պատկերացրեք այդ վիճակը։ Կնոջ են ծեծել 7-8 հոգով, գլխին հարվածել են ու գցել գետնին։ Կողքից տեսնողն ի՞նչ կանի։ Ոչ մի տեղ գրված չէ, որ ոստիկանը կարող է մարդ ծեծի, ոստիկանը կարող է բերման ենթարկել, բայց ոչ ծեծել քաղաքացուն։

Մարդը վնասազերծված է, ձեռքերը ոլորելով տանում են, գալիս են 3 ոստիկան ընթացքում հարվածում են, դա ոստիկանի վարքագի՞ծ է»,- ասաց Արամ Վարդևանյանը։

Նրա խոսքով՝ ոստիկանները խոստացել էին, որ Պռոշյան հատվածը բացելու են, սակայն չարեցին, այլ արհեստականորեն այդ լարվածությունը ստեղծեցին։

«Գիտեք, որ վահաններով քաղաքացիներին ծեծում էին, վահանով փորձել են ինձ էլ հարվածել։ Մարդիկ են եղել, որոնց ատամները, քիթն են ջարդել, աչքն են վնասել սալջարդեր են ստացել։ Երեկ օպերատորներից մեկին նկարելու ժամանակ հարվածել են ու գցել գետնին, ոստիկանը վերցրել է տեսախցիկի ձողը ու դրանով սկսել է մարդկանց ծեծել։ Այն աստիճան է ծեծել, որ երկաթը վնասվել է»,- ընդգծեց Արամ Վարդևանյանը։