Ձեր վստահելի աղբյուրը

Բրիտանական Truphone հեռահաղորդակցության խումբը, որը պատկանում է ռուս գործարար Ռոման Աբրամովիչին և նրա գործընկերներին, մեկ ֆունտով կվաճառվի երկու եվրոպացի ձեռնարկատերերի, «Ռիա Նովոստի»-ի փոխանցմամբ, հայտնել է բրիտանական Financial Times թերթը՝ հղում անելով իրազեկ աղբյուրներին։

Նշվում է, որ Աբրամովիչին է պատկանում ընկերության բաժնետոմսերի 23%-ը, իսկ նրա գործընկերներ Ալեքսանդր Աբրամովին ու Ալեքսանդր Ֆրոլովին մնացած մասը։

Ըստ թերթի, 2020 թվականին Truphone-ը գնահատվել է 410 միլիոն ֆունտ ստեռլինգ, ընդ որում Աբրամովիչը և նրա գործընկերները բիզնեսում ներդրել են ավելի քան 300 միլիոն ֆունտ ստեռլինգ: Վաճառելու որոշումը կայացվել է եվրոպական երկրների կողմից գործարարի նկատմամբ պատժամիջոցներ կիրառելուց հետո։

Ըստ իրազեկ աղբյուրների՝ գործարքը կկնքվի հունիսին։ Truphone-ի նոր սեփականատերերը կդառնան գերմանացի գործարար Հաքան Քոչը և նրա բիզնես գործընկեր Պիրոս Կուսիոսը: Քոչին կպատկանի բաժնետոմսերի 90%-ը, իսկ Կուսիոսին՝ 10%-ը։

Թերթի աղբյուրները նշել են նաև, որ բիզնեսի ներկայիս սեփականատերերը պարտավորվել են ավելի քան տասը միլիոն ֆունտ ստերլինգ ներդնել ընկերությունում և որոշակի պայմանագրային պարտավորություններ են ստանձնելու։ Օրինակ՝ նրանք կվճարեն պարտքերը, ներառյալ ընկերության սեփականության կառուցվածքի մասին փաստերի խեղաթյուրման հետ կապված տուգանքը ՝ 660 հազար դոլարի չափով։

Աղբյուրները հավելում են, որ եթե բիզնեսը շահութաբեր լինի և բարձրացնի իր արժեքը, ապա ներկայիս սեփականատերերը կստանան նախնական ներդրումների մինչև մեկ երրորդը։ Սակայն եթե Աբրամովիչն այս ընթացքում մնա պատժամիջոցների տակ, ապա նա գումարը չի ստանա։