Ձեր վստահելի աղբյուրը

Ֆրանսիայի հրապարակում հանրահավաքի ժամանակ «Ունիսոն» ՀԿ նախագահ, հասարակական գործիչ Արմեն Ալավերդյանն ասաց, որ առաջին անգամ է հանրահավաքի ժամանակ ելույթ ունենում, որևէ նախընտրական միջոցառման չի մասնակցել, հեռու է քաղաքականությունից։

«Ծիծաղելի է ինձ, թե բա աթոռակռիվ և այլն։ Իմ աթոռն ունեմ, դրա համար կռիվ չեմ անում ոչ մեկի հետ»,- ասաց նա։

Ալավերդյանը դիմեց այն քաղաքացիներին, ովքեր չեն գալիս այս հրապարակ. «Չեք գալիս, որովհետև չեք սիրում Քոչարյանին, Սաղաթելյանին... Ես էլ չեմ սիրում, իսկ ինչի՞ համար պետք է սիրեմ։ Սիրում եմ ընտանիքս, հայրենիքս, ընկերներիս։ Ինչո՞ւ պետք է սիրեմ քաղաքական գործիչներին։

Իրենք սիրելու համար չեն, իրենք գործ անելու համար են, իսկ մենք պետք է պահանջենք այդ գործն անել հոգատար, սիրով, հայրենասեր կերպով։ Պետք չէ այդ բացատրությունները։ Եթե հայրենասեր եք, այստեղ կլինեք, եթե չէ՝ մնացածը լոլոներ են»։

Ա. Ալավերդյանն ասաց, որ այսօր այս հարթակից իր հիմնական ասելքն ուղղված է քաղաքացիական հասարակության ներկայացուցիչներին. «Ես ապշում եմ մեր հասարակական կազմակերպությունների մեծամասնության անտարբերության վրա։ Խոսքը գնում է  շատ տարրական բաների մասին։ Խոսքը չի գնում շարժմանը միանալու մասին։ 

Մի հատ գռեհիկ խոսք է հնչում ինչ-որ գործչի կողմից, կանանց իրավունքների պաշտպաններ ոգևորվում են, ստատուսներ են գրում Հիմա, երբ որ ոստիկանը երիտասարդ աղջկա, կներեք, մարմնի ինտիմ մասերին ձեռք է գցում, օ՞կ է ձեզ համար։ Ինչո՞ւ եք լռում։ Գոնե դատապարտեք, ասեք չի կարել։ Իսկ եթե մի տաս հոգով ծեծում են երիտասարդներին, տարեցներին, հաշմանդամություն ունեցողներին...

Նույն քաղաքացիական  հասարակության կարկառուն ներկայացուցիչներից մեկը հայտնել է, որ մեծ քարեր նետելու պատճառով վնասվել են ոստիկանները։ Ոչ մի ապացույց չտեսա։ Անկեղծորեն, ման եկա տեսանյութ, չկա։ Կա մի տեսանյութ, որտեղ դատարակ շիշ են նետում, չգիտեմ ովքեր են նետում։ Ես էլ եմ դա համարում, որ պետք չէ։ Երեկ գեներալ Յուրի Խաչատուրովը հստակ ասաց քաղաքացիներին՝ մի արեք նման բաներ, իրենք հենց դրան են սպասում։

Պետք է մի քիչ անկեղծ լինել, սկզբունքային, կրկնակի ստանդարտները չի կարելի կիրառել»։

Այնուհետև Արմեն Ալավերդյանը վանկարկեց իր նախընտրելի կարգախոսը՝ «միություն, պայքար հաղթանակ»։

Հրապարակում հավաքվածները նույնպես վանկարկեցին՝ «միություն, պայքար հաղթանակ»։