Ձեր վստահելի աղբյուրը

«Երեկվա զանգվածային անկարգությունները վերագրում եմ ոստիկաններին, նրանք իրենց պահել են, մեղմ եմ ասում, վայրագի նման և հրահրել են զանգվածային անկարգություններ»,- Ֆրանսիայի հրապարակում լրագրողների հետ զրույցում  ասաց ԱԺ  «Հայաստան» խմբակցության պատգամավոր, «Վերածնվող Հայաստան» կուսակցության նախագահ Վահե Հակոբյանը՝ խոսելով երեկ Դեմիրճյան-Պռոշյան խաչմերուկում կատարված բախումների մասին։

Նրա խոսքով, ոստիկաններն են սադրել, պետք է պատասխան տան այն բոլոր քաղաքացիների համար, ովքեր տուժել են։ 

Վահե Հակոբյանն նշեց, որ հատուկ ուշադրություն պետք է դարձնել երեկվա կատարվածում այն կարմիր բերետավորներին, ովքեր խմբով են հարձակվում մեկ հոգու վրա ու դաժանաբար ծեծի ենթարկում։

«Ֆիքսել ենք, որ քաղաքացիներից մեկը, որը պարզապես փողոցն էր անցնում, նրան կարմիր լույսի տակ քիչ էր մնում վրաերթ անեին, և երբ քաղաքացին ասել է՝ ուշադիր եղեք, ի՞նչ եք անում, իջել են, ոհմակով հարձակվել են այդ երիտասարդի վրա, ծեծել։ Ծանր մարմնական վնասվածքներով տեղափոխել են ոստիկանության բաժին, թույլ չեն տվել, որ շտապ օգնությունը գա, նրան առաջին օգնություն ցուցաբերի։ Սա նիկոլզիմն է։ Երեկ այդ ջրբաժանը դրվեց ու դրվեց ոստիկանների կողմից։ Տեղի ունեցածը Նիկոլի, ոստիկանների վախերի դրսևորում էր»,- ասաց ընդդիմադիր քաղաքական գործիչը։

Հարցին՝ շատերը երեկվա միջադեպերը համեմատում են «մարտի 1»-ի հետ, Վահե Հակոբյանն ասաց. «Մեկ համեմատություն կարող եմ անել՝ երկուսի դեպքում կազմակերպիչը Նիկոլ Փաշինյանն է»։

Վահե Հակոբյանն ասաց, որ երեկ Դեմիրճյան փողոցում ներդրված սադրիչներ են եղել։

«Ոստիկանները, նույն բերետները չէին ենթարկվում իրենց անմիջական հրամանատարներին։ Դա նրանից է, որ ինչքան թափթփուկ կա լցվել են այդտեղ, ինչքան պատգամավոր իրենց գյուղի հերոսի եղբայր, եղբորորդի կա, բերել են, ֆորմա հագցրել ու գցել են ժողովրդի մեջ»,- ասաց նա։

Վահե Հակոբյանը նշեց, որ իրենք խորհրդարան վերադառնալու մեկ օրակարգ ունեն, իրենց օրակարգն է ու այդ օրակարգով են վերադառնալու։