Ձեր վստահելի աղբյուրը

«Ոստիկանությունը երեկ շատ սխալ է վարվել, կիրառել է բիրտ ուժ և հատուկ միջոցներ։ Ընդ որում, հատուկ միջոցներն օգտագործվել են առանց նախապես զգուշացնելու, ինչը հստակ խախտում է»,- Ֆրանսիայի հրապարակում հանրահավաքի ընթացքում լրագրողների հետ զրույցում ասաց «Հայրենիք» կուսակցության նախագահ, ԱԺ «Պատիվ ունեմ» խմբակցության ղեկավար Արթուր Վանեցյանը՝ անդրադառնալով երեկ Դեմիրճյան-Պռոշյան փողոցների խաչմերուկում ոստիկանների՝ պայքարի մասնակիցների նկատմամբ  իրականացրած գործողություններին։

Ընդդիմադիր գործիչը հիշեցրեց իր կուսակից Արսեն Բաբայանի՝ երեկվա ֆեյսբուքյան գրառումը, ըստ որի, հատուկ միջոցները ժամկետանց են և հենց դա է պատճառը, որ եղել են այդքան վնասվածք ստացածներ, այդ թվում ոստիկանների շրջանում։

Վանեցյանը վկայակոչեց նաև համացանցում տարածված տեսանյութը, երբ հատուկ միջոցի կիրառման արդյունքում կրակն ուղիղ ընկնում է ոստիկանների վրա, որոնք հսկում էին կառավարական ամառանոցների մուտքը։

«Մենք տեսանք նաև, որ ցուցարարների մեջ կային մարդիկ, որոնք չէին ենթարկվում երթի կազմակերպիչներին։ Նրանք սադրիչներ էին։ Մի տեսանյութ կա, որտեղ մի տղա քար է նետում ոստիկանների վրա։ Մինչ այս պահը հայտարարվել է 13 ձերբակալվածների մասին, և այդ տղան հայտնաբերված ու ձերբակալված չէ։ Մինչդեռ ոստիկանները հատուկ միջոցների կիրառումը պայմանավորում էին հենց նրա գործողությամբ։ Եթե մարդ է եղել, որ քար է նետել ոստիկանների վրա, ապա ո՞վ է այդ տղան։ Կարծում եմ, որ իշխանությունների կողմից ուղարկված սադրիչ է»,-ասաց Վանեցյանը։