Ձեր վստահելի աղբյուրը

Մեծ Բրիտանիայի վարչապետ Բորիս Ջոնսոնը վստահության քվե է ստացել Մեծ Բրիտանիայի Պահպանողական կուսակցության պատգամավորների քվեարկության ժամանակ, գրում է Ինտերֆաքսը՝ հղում անելով The Guardian-ին։

Քվեարկության ժամանակ Ջոնսոնի օգտին քվեարկել է 211 պատգամավոր, անվստահություն հայտնելու օգտին քվեարկել է 148 պատգամավոր։ Սա նշանակում է, որ նա մնում է պահպանողականների առաջնորդն ու երկրի վարչապետը։

Անվստահություն հայտնելու համար անհրաժեշտ էր իշխող Պահպանողական կուսակցության 359 պատգամավորներից առնվազն 180-ի ձայները։

Ավելի վաղ Պահպանողական կուսակցության պատգամավորների առնվազն 15%-ը՝ 54 մարդ, Ջոնսոնին անվստահության նամակ է հղել՝ այսպես կոչված «1922 թ-ի կոմիտեի» (Պահպանողական կուսակցության պատգամավորական խումբ Համայնքների պալատում) նախագահ Գրեհեմ Բրեյդին։ Նման դեպքերում հանձնաժողովը պարտավոր է քվեարկել կուսակցության առաջնորդին վստահության հարցերի շուրջ։ Նամակների պատճառը լոքդաունի շրջանում Դաունինգ սթրիթի երեկույթներին վարչապետի մասնակցությունն է եղել։

Ջոնսոնը սկանդալների կենտրոնում էր, երբ հայտնի դարձավ, որ Մեծ Բրիտանիայում COVID-19-ի դեմ պայքարի թեժ պահին Դաունինգ սթրիթում նա երեկույթներ է անցկացնում։ Ինչպես պարզվել է, բրիտանացի առաջնորդները, մասնակցելով նման միջոցառումներին, խախտել են իրենց կողմից երկրում ներդրված սահմանափակող միջոցները։