Ձեր վստահելի աղբյուրը

«Մեր ակնկալիքը Եմ դեսպանից շատ պարզ է՝ հավատարիմ մնալ այն արժեքներին, որոնք տարիներ շարունակ պրոպագանդում են»,- ՀՀ-ում Եվրոպական միության գրասենյակի մոտ «Դիմադրություն» շարժման ակցիայի ժամանակ ասաց ԱԺ «Հայաստան» խմբակցության պատգամավոր Ասպրամ Կրպեյանը։

Պատգամավորի խոսքով՝  եթե երկրում ժողովրդավարական արժեքները խարխլված են, եթե բռնություն է կիրառվում, մարդու իրավունքները համատարած խախտվում են, ապա դրանց մասին առաջինը ԵՄ դեսպանությունը պետք է բարձրաձայնի։

«Իսկ թե ինչու չեն բարձրաձայնում, կարծում եմ, որ առաջնահերթություններն այլն են. երկակի ստանդարտներն ու աշխարհաքաղաքական շահերն այս պարագայում ժողովրդավարությունն ու մարդու իրավունքները ստորադասում են»,- ասաց Ասպրամ Կրպեյանը։

Լրագրողի դիտարկմանը, թե նրանք, կարծես թե, ամեն օր ժողովրդավարությունից խոսքով իշխանությունների կողքին են, պատգամավորը պատասխանեց, որ ինքը դա բնորոշում է որպես «կոյուղային ժողովրդավարություն»։

«Իրենք պաշտպանում են այդ ժողովրդավարությունը, այլ ոչ թե իրական արժեքները։ Եթե այդ արժեքների պաշտպանությամբ զբաղվեին, րոպե առաջ չէին վարանի դատապարտել իրենց քթի տակ եղած ապօրինությունները՝ խաղաղ ցուցարարների նկատմամբ բռնի բիրտ ուժ կիրառելը և այլն»,- նշեց Ասպրամ Կրպեյանը։

Հիշեցնենք, որ Նիկոլ Փաշինյանի հրաժարականի պահանջով, Հայաստանի ու Արցախի անվտանգությամբ մտահոգ քաղաքացիները, ընդդիմադիր քաղաքական ուժերի ներկայացուցիչների գլխավորությամբ ակցիա են իրականացնում ՀՀ-ում Եվրոպական միության գրասենյակի մոտ, որտեղ «Հայաստան» խմբակցության պատգամավոր Արամ Վարդևանյանն ընթերցեց ԱԺ ընդդիմադիր երկու խմբակցությունների՝ «Հայաստան» և «Պատիվ ունեմ», գրությունը, որը պետք է փոխանցվի ՀՀ-ում  ԵՄ դեսպան  Անդրեա Վիկտորինին։