Ձեր վստահելի աղբյուրը

Երևանի ընդհանուր իրավասության դատարանում, դատավոր Վահե Միսակյանի նախագահությամբ, շարունակվել է հայտնի բժիշկ, ԱԺ «Հայաստան» խմբակցության պատգամավոր Արմեն Չարչյանի վերաբերյալ քրեական գործի քննությունը։

Գործը գտնվում է ապացույցների հետազոտման փուլում։

Պաշտպան Էրիկ Ալեքսանյանը հիշեցրել է, որ քրեական գործի հարուցման համար հիմք է հանդիսացել տելեգրամյան ալիքում հրապարակված տեսանյութը, ընդ որում, ՀՔԾ մամուլի քարտուղարի զեկուցագրի հիման վրա, հետևաբար, դա չէր կարող դիտարկվել որպես օրինական առիթ՝ քրգործ հարուցելու համար։

«Նկատի ունենալով, որ անհայտ աղբյուրից ձեռք բերված ապացույցը չի կարող ճանաչվել թույլատրելի՝ պաշտպանը միջնորդություն ներկայացրեց՝ ապացույցն անթույլատրելի ճանաչելու մասին, թեև մեղադրող դատախազն առարկել էր միջնորդություն ներկայացնելուն՝ նշելով, որ մինչդատական վարույթում պաշտպանության կողմը նման միջնորդություն ներկայացվել է, որն ինքը մերժել է, պաշտպանը հակադարձեց՝ նշելով, որ մինչդատական վարույթում ներկայացվել էր քրեական գործ հարուցելու որոշումը վերացնելու մասին, այլ ոչ թե՝ անթույլատրելի ապացույց ճանաչելու մասին։ Պաշտպանը ներկայացրեց միջնորդությունը՝ նշելով, որ ի սկզբանե չի պահպանվել ապացույցի ձեռք բերման պատշաճ սուբյեկտի կանոնը։ Պաշտպանը նկատեց՝ վարույթի հարուցումն ի սկզբանե եղել է ոչ իրավաչափ, հետևաբար, ձեռք բերված ապացույցները չեն կարող դիտվել որպես թույլատրելի։

«Իմ խնդիրը չէ, որ քննիչը զեկուցագրի հիման վրա նյութեր է նախապատրաստել, հետո անհայտ աղբյուրից ձեռք բերված տեսանյութի հիման վրա հարուցել քրեական գործ, հետո նոր միայն դատախազությունն ուղարկել է իրենց այդ նյութերը»,- նշեց Ալեքսանյանը՝ պահանջելով քրեական գործով բոլոր ապացույցները ճանաչել որպես անթույլատրելի»,- գրել է «Փաստինֆո»-ն։ 

Դատախազը պահանջեց մերժել միջնորդությունը։ Միջնորդության լուծումը հետաձգվեց։

Լրագրողների հետ զրույցում Է. Ալեքսանյանն ասաց, որ միջնորդությունը ներկայացրել է  դատավարական այս փուլում, որովհետև անհրաժեշտ էր համապատասխան որոշակի  փաստական տվյալներ հետազոտել, մասնավորապես իր կողմից հրապարակված և դատարանի միջոցով հետազոտված  քրեական գործ հարուցելու մասին որոշումը, համապատասխան զեկուցագիրը։

«Սպասեցի այդ փուլիին, որովհետև եթե մինչ այդ ներկայացվեր միջնորդությունը, ողջամիտ կլիներ հետաձգել այդ միջնորդության լուծումը, որոշակի փաստական տվյալներ  հետազոտելուց հետո նոր դրան լուծում տալ։ Գտնում եմ, որ  տվյալ պարագայում  դատարանն արդեն հետազոտված ունենալով այն փաստական տվյալները, որոնք վերաբերում են այս միջնորդության  առարկային, հետաբար, կարող էր այս միջնորդության համապատասխան լուծում տար։

Մեծ հաշվով, որևէ խնդիր չենք տեսնում դատարանի որոշման առումով, դատարանն ունի հայեցողություն տվյալ պարագայում այն լուծել առկա  պայմաններում, հետագայում՝ դրան անդրադառնալով դատավաճռով։ Բայց գտնում եմ, որ այդ ողջամտության  շրջանակներում դատավարն ուներ այդ միջնորդությունը հենց այսօր լուծել։  Բայց դատարանն այսպես գտավ։ Դատարանի անաչառության հետ կապված որևէ կասկած երբեք չենք ունեցել»,- ասաց Էրիկ Ալեքսանյանը։

Հիշեցնենք, որ տելեգրամյան մի ալիքում հրապարակվել էր ձայնագրություն, համաձայն որի՝ «Իզմիրլյան» բժշկական կենտրոնի տնօրեն Արմեն Չարչյանը 2021 թ. հունիսի 18-ի առավոտյան աշխատակիցների հետ հանդիպմանը հորդորել է, որ աշխատակիցները պարտադիր կարգով մասնակցեն ընտրություններին։
Ա.Չարչյանին մեղադրանք է առաջադրվել՝ ՀՀ ՔՕ 154.2-րդ հոդվածի 4-րդ մասի 2-դ կետի հատկանիշներով (ընտրողներին կաշառք տալը, կաշառք ստանալը, ընտրությունների ժամանակ բարեգործության արգելքի խախտումը կամ ընտրողի ազատ կամքի իրականացմանը խոչընդոտելը):