Ձեր վստահելի աղբյուրը

Կառավարության այօրվա նիստում տարածքային կառավարման և ենթակառուցվածքների նախարարի տեղակալ Վաչե Տերտերյանը զեկուցեց, որ Պետական գույքի կառավարման կոմիտեին ամրացված, պետական սեփականություն հանդիսացող Երևանի Օրբելու փողոցի 23 հասցեի շենք-շինությունները և դրանց օգտագործման և սպասարկման համար հատկացված բաժնային սեփականություն հանդիսացող հողամասերը կներկայացվեն օտարման՝ մրցույթով գնահատված արժեքի 80 %-ի չափով, քանի որ առաջին մրցույթում հաղթող չի եղել։

Նիկոլ Փաշինյանի հարցին, թե 3 հեկտար տարածքի և 9905.21 քառ. մետր մակերեսով շենք-շինությունների համար ինչո՞ւ առաջին մրցույթը տեղի չի ունեցել՝ ֆինանսների նախարար Տիգրան Խաչատրյանը հայտնեց, որ պատճառը բարձր գինն է եղել:

Նախագծի մեջ ասվում է, որ մրցույթով օտարման ենթակա գույքի վաճառքի նվազագույն գինը՝ գնահատված արժեքի 80 %-ի չափով՝ 6 613 652 800  դրամ է:

«Մրցույթին մասնակցելու նախավճարը՝ գույքի վաճառքի նվազագույն գնի 5 տոկոսի չափով՝ 330 682 640 դրամ, որը մրցույթի հաղթող ճանաչված մասնակցի (այսուհետ` գնորդ) համար համարվում է գույքի վաճառքի գնի մաս և գնորդի կողմից հետագա վճարումները կատարելուց հրաժարվելու դեպքում վերադարձման ենթակա չէ ու փոխանցվում է Հայաստանի Հանրապետության պետական բյուջե»,-ասված է փաստաթղթում։