Ձեր վստահելի աղբյուրը

Երևանի ընդհանուր իրավասության դատարանում, դատավոր Վահե Միսակյանի նախագահությամբ, այսօր շարունակվեց ՀՀ երրորդ նախագահ Սերժ Սարգսյանի և մյուսների գործով դատական նիստը։

Դատական նիստին ներկա է Սերժ Սարգսյանը։ Երբ նա մտավ նիստերի դահլիճ, հնչեցին ծափահարություններ և «առանց Նիկոլ դատարան» վանկարկում։

Այսօրվա նիստին նախատեսված էին գործով վկաների հարցաքննությունները։ Դատավորն ասաց, որ  վկաներից Ս. Քոչարյանը ներկա չէ նիստին, որևէ պատճառ, որը դատարանին հնարավորություն կտար վկայի բացակայությունը  հարգելի համարել, դատարանին հայտնի չէ։ Դատարանը վկայի բացակայությունը համարում է ոչ հարգելի։ Վկայի փաստաբանը նույնպես ներկա չէ նիստին։

Մյուս վկայի՝ Եղիշե Վարդանյանի մասով, փաստաբանից գրություն է ստացել դատարանը,  ըստ որի այսօր կայանալիք  դատական նիստի վայրի ու ժամի մասին վերջինս ծանուցագիր չի ստացվել, տեղեկացվել է դատարանի աշխատակազմից, հայտնել է, որ այսօր չի կարող ներկա լինել, քանի որ Երևան քաղաքից դուրս է գտնվում։

«Նկատի ունենալով, որ այսօր նախատեսված էր վկայի հարցաքննության շարունակությունը, ով դատարանին անհայտ պատճառով չի ներկայացել դատարան,  դատական նիստը պետք է հետաձգվի։ Հաջորդ նիստին ոստիկանության միջոցով  հարկադիր կարգով կներկայացվի դատարան, որից հետո կշարունակենք վերջինիս հարցաքննությունը»,- ասաց դատավորը՝ հավելելով,  քանի դեռ չեն ավարտել վկա Ս. Քոչարյանի հարցաքննությունը, այլ վկայի հարցաքննությունը դատարանը նպատակահարմար չի համարում։

Այս գործով հաջորդ դատական նիստը կկայանա հուլիսի 7-ին։

Հիշեցնենք, որ քրեական գործով այս պահին մեղադրյալի կարգավիճակում է երեք անձ. Սերժ Սարգսյանից բացի մեղադրանքներ են առաջադրվել նաև Գևորգ Հարությունյանին, գործարար Բարսեղ Բեգլարյանին։

Ըստ Սերժ Սարգսյանին առաջադրված մեղադրանքի՝ «նա 2008թ․ ապրիլի 9-ից մինչև 2018թ․ ապրիլի 9-ը ընկած ժամանակահատվածում, զբաղեցնելով ՀՀ նախագահի պաշտոնը, հանդիսանալով մշտապես իշխանության ներկայացուցչի գործառույթներ իրականացնող պաշտոնատար անձ, իր պաշտոնեական դիրքն օգտագործելով, 2013թ․ հունվարի 25-ից մինչև նույն թվականի փետրվարի 7-ն ընկած ժամանակահատվածում, կազմակերպել է պաշտոնատար մի խումբ անձանց կողմից պետությունից վատնելու եղանակով առանձնապես խոշոր չափերով գումարի՝ 489,160,310 ՀՀ դրամի հափշտակության կատարում»։

Ըստ Բարսեղ Բեգլարյանին առաջադրված  մեղադրանքի՝ «նա հանդիսանալով «Ֆլեշ» ՍՊ ընկերության սեփականատեր, 2013թ․ հունվարի 25-ից փետրվարի 7-ն ընկած ժամանակահատվածում դրդել է 2013թ․ Հայաստանի Հանրապետության գյուղատնտեսության նախարարի պաշտոնը զբաղեցնող Սերգո Կարապետյանին՝ ՀՀ հողօգտագործողներին 2013թ․ գարնան գյուղատնտեսական աշխատանքների համար մատչելի գներով դիզելային վառելանյութի ձեռքբերման նպատակով պետական աջակցության ծրագրի իրականացման ընթացքում կատարել ՀՀ կառավարությանը վստահված, պահուստային ֆոնդում գտնվող առանձնապես խոշոր չափերով պետական միջոցների՝ ընդհանուր 489,160,310 ՀՀ դրամի վատնում»։

Ըստ Գևորգ Հարությունյանին առաջադրված մեղադրանքի՝ «նա 2012թ․ հունիսի 25-ից մինչև 2015թ․ հունվարի 12-ն ընկած ժամանակահատվածում զբաղեցնելով ՀՀ գյուղատնտեսության նախարարության բուսաբուծության վարչության պետի պաշտոնը, հանդիսանալով մշտապես իշխանության ներկայացուցչի գործառույթներ իրականացնող պաշտոնատար անձ, իր պաշտոնեական դիրքն օգտագրծելով, 2013թ․ հւնվարի 25-ից մինչև նույն թվականի փետրվարի 7-ն ընկած ժամանակահատվածում, օժանդակել է պաշտոնատար մի խումբ անձանց կողմից պետությունից վատնելու եղանակով առանձնապես խոշոր չափերով գումարի՝ 489,160,310 ՀՀ դրամի հափշտակություն կատարելուն»։

Հիշեցնենք, որ կորոնավիրուսի հետևանքով մահացել են գործով անցնող Սերգո Կարապետյանը և Սամվել Գալստյանը։ Դատարանի որոշմամբ, նրանց նկատմամբ քրեական հետապնդումը դադարեցվել է։