Ձեր վստահելի աղբյուրը

ԱԺ Ֆինանսավարկային և բյուջետային հարցերի ու Առողջապահության մշտական հանձնաժողովների համատեղ նիստում Հաշվեքննաիչ պալատի 7-րդ վարչության պետ Խաչիկ Փափազյանը ներկայացրեց «ՀՀ առողջապահության նախարարությունում նոր կորոնավիրուսային համավարակով (covid-19) պայմանավորված բյուջետային ծախսերի հաշվեքննության արդյունքների վերաբերյալ» Հաշվեքննիչ պալատի ընթացիկ եզրակացությունը, որոմ բազմաթիվ խախտումներ էին արձանագրված։

Եզրակացության մեջ ՀՊ-ն 2371 դեպք է բացահայտել, երբ թեստի արդյունքները համակարգ են մուտքագրվել դրանք ստանալուց մի քանի րոպեից մինչև մի քանի օր առաջ:

Արձանագրելով, որ պետական միջոցները նպատակային և ծախսարդյունավետ ձևով չեն իրականացվել՝ ՀՊ-ն նշել էր, որ 974 մլն դրամ աշխատավարձ է տրամադրվել այն բժշկական հաստատությունների աշխատակիցներին, որոնք ներառված չեն եղել կորոնավիրուսի դեմ պայքար մղող բուժհաստատությունների ցանկում: Վերջիններիս աշխատակիցներին նաև 148 մլն դրամ պարգևավճար է հատկացվել:

Պահպանման և ֆինանսավորվող կառույցների մեջ չընդգրկվող հաստատություններին տրվել են 1.8 մլրդ դրամ շինարարության և գույքի ձեռքբերման համար: 448 մլն դրամ էլ հատկացվել է ԱՆ համակարգում չընդգրկված կառույցներում:

Ըստ եզրակացության՝ 26.5 մլրդ դրամից  3.5 մլրդը հատկացվել է ոչ թե բուժման, այլ պարգևավճարների և շինարարական աշխատանքների համար:

Վերապրոֆիլավորված ԲԿ-ներին տրվել է փաստացի կատարված աշխատավարձի ծախսերից 152 մլն դրամ ավել աշխատավարձ:

ՀՊ-ն նաև արձանագրել է, որ վերապրոֆիլավորված ԲԿ-ներում մեկ հիվանդի բուժման ծախսը կազմել է 378 հազար դրամ, իսկ ֆինանսավորողներում 173 հազար դրամ, առաջին խմբում բուժման կուրսը 9 օր է եղել, երկրորդում՝ 5 օր, այն դեպքում, երբ վերապրոֆիլավորված ԲԿ-ներում ստացիոնար բուժման համար մահճակալային ֆոնդի ծանրաբեռնվածությունը եղել է 69%, իսկ վերակենդանացման բաժանմունքներինը՝ 28 %: Ամենաթանկը եղել է Սուրբ Գրիգոր Լուսավորիչ ԲԿ-ի օրվա ծախսը՝ 74 հազար դրամ, իսկ ամենացածրը Սիսիանի բժշկական կենտրոնինն է՝13 հազար դրամ:

Ֆինանսավարկային և բյուջետային հարցերի մշտական հանձանաժողովի նախագահ Գևորգ Պապոյանը զեկուցողին հարցրեց, թե այդքան կյանքեր են փրկվել, իսկ ՀՊ-ն ոչ մի լավ նա չի՞ տեսել, որ արձանագրեր զեկույցում:

«Լավ բաները շատ են, բայց եկեք այն տրամաբանությամբ չառաջնորդվենք, որ երբ, օրինակ, ավիավթարի մասին դատողություն է արվում և ասվում՝ այսքան զոհ է եղել, ասենք՝ բայց այսքան էլ ավիափոխադրումներ են տեղի ունեցել, որոնք բարեհաջող տեղ են հասել: Դուք իրավացի եք, ընդամենը 152 մլն դրամի շեղման մասին է խոսքը՝ միայն այն գործոնով պայմանավորված, որ բավարար չափով հսկողություն չի սահմանվել նրա վրա, թե ինչու այդ նույն հաշվետվոթյունները, որ ներակայցվել են ԲԿ-ների կողմից ՊԵԿ՝ որպես աշխատավարձի հիմք հանդիսացող փաստաթղթեր, դրանցում համադրումներ չեն կատարվել: Դրա պատճառով 152 մլն դրամի շեղումներ են առաջացել 26.5 մլրդ.-ի մեջ: Բայց սա համակարգային խնդիր է, որը նշանակում է, որ հսկողության համակարգը պետք է լինի դրան համարժեք»,-արձագանքեց ՀՊ նախագահ Ատոմ Ջանջուղազյանը:

Վերջինս հայտարարեց, որ եզրակացության հիմնական մեխն այն է, որ առանց համավարակների դեմ պայքարի ռազմավարական պլանի՝ իրականացվել է խոշոր միջոցառում, որն էլ հանգեցրել է խախտումների:

Առողջապահության նախկին նախարար Արսեն Թորոսյանը հայտարարեց, որ այդ մասին կառավարության արձանագրություններ են եղել:

«Այո, արձանագրվել է և այն ավելի վատ արդյուքների է բերել՝ Պարոն Թորոսյան: Մի արձանագրային որոշմամբ սահմանկվել են ուղղություններ, որոնցով մոտավորապես 20 մլրդ դարամ էր օգտագործվելու, բայց փաստացի 26 մլրդ դրամի ծախս է եղել, որը ոչ մի կապ չունի այդ արձանագրված ուղղություններ հետ»,-պատասխանեց Ջանջուղազյանը:

Արսեն Թորոսյանն էլ հակադարձեց. «Այս արձանագրության մեջ իրավական անգրագիտություն էլ կա: Գրված է «վարչապետի արձանագրային որոշում», որը մեր Սահմանադրությամբ վաղուց նախատեսված չէ»:

Թորոսյանի հետ միասին Ատոմ Ջանջուղազյանի հետ բանավեճի մեջ մտած առողջապահության նախարար Անահիտ Ավանեսյանն էլ հայտարարեց, որ կորոնավիրուսի համաճարակին հակազդելու ռազմավարական պլան եղել է:

Ատոմ Ջանջուղազյանը պարզաբանեց, որ խոսքը չի վերաբերում կոնկրետ քովիդի համավարակին, այլ՝ ընդհանրապես համավարակներին արձագանքելու պատրաստվածությանը, որոնք տարբեր բաներ են և այն Սահմանադրությամբ ամրագրված պահանջ է հաշվեքննություն իրականացնելու համար: