Ձեր վստահելի աղբյուրը

«Մինչև պարոն Փափազյանը հոգեբանորեն կպատրաստվի զեկույցի ներկայացմանը կուզենամ մի քանի հարցեր ներկայացնել, որոնք համարում եմ կարևոր»,-ԱԺ մշտական հանձնաժողովների համատեղ նիստում Կորոնավիրուսի դեմ պայքարի ծախսերի արդյունավետությունն ուսումնասիրած Հաշվեքննիչ պալատի եզրակացությունը ներկայացնել սկսելուց առաջ հայտարարեց պալատի նախագահ Ատոմ Ջանջուղազյանը:

Մինչ այդ Ֆինանսավարկային և բյուջետային հարցերի մշտական հանձնաժողովի նախագահ Գևորգ Պապոյանը հայտնեց, որ հաշվեքննության արդյունքները կներկայացնի պալատի 6-րդ վարչության պետ Խաչիկ Փափազյանը, սակայն նրան դահլիճից ուղղեցին՝ ասելով, որ զեկուցողը 7-րդ վարչության պետք է:

Ջանջուղազյանը հայտնեց, որ հաշվեքննիչ պալատը փորձել է արձանագրել, թե այն արդյունքները, որոնք արձանագրվել են, ինչպե՞ս են ձեռք բերվել, ինչպե՞ս է ՀՀ-ին հաջողվել հասնել այդ արդյունքներին և ինչպես են օգտագործվել ֆինանսական միջոցները՝ հիշեցնելով, որ գործընթացն սկսվել է ԱԺ քննիչ հանձնաժողովի դիմումի հիման վրա:

«Պարոն Ջանջուղազյանը բաներ ասաց, որոնց արդեն արձագանքելու կարիք կա: Օրինակ՝ սկսած նրանցի, որ հաշվեքննության մեջ արդեն գրված է, որ նրա իրականացման նպատակը ՀՀ-ում նոր կորոնավիրուսի համավարակի կանխարգելման, վերահսկման, բուժման և այլ համալիր միջոցառումների իրականացման գնահատումն է:  Չնայած պարոն Ջանջուղազյանն ասաց, թե ոնց որ այդպես չէ: Ուզում եմ հասկանալ, թե ի՞նչ ֆորմատով ենք աշխատելու: Իմ համար շատ տարօրինակ է, որ  պալատի այն անդամը, որը համակարգել է այս հաշվեքննությունն այստեղ ներկա չէ: Չգիտեմ՝ կարո՞ղ է մոլորվել է Ֆրանսիայի հրապարակում, եթե չի մոլորվել, ապա այստեղ պետք է լիներ»,-հայտարարեց ՔՊ պատգամավոր Արսեն Թորոսյանը, որի՝ առողջապահության նախարար եղած ժամանակահատվածի գործունեության հաշվեքննությունն էր ներկայացվում ԱԺ-ում:

Ջանջուղազյանը հայտնեց, որ նախատեսվող քննարկումն իրենց ոչ մի հանգրվանի չի մոտեցնի եթե բովանդակության փոխարեն անդրադառնան հարցին, թե ովքեր են այդ բովանդակությունը ձևավորել:

Նա ասաց, որ պալատը կոլեգիալ մարմին է և նրա որոշմամբ հաստատվել է այն եզրակացությունը, որը ներկայացվել է քննարկման՝ մինչ այդ էլ հրապարակվելով պալատի պաշտոնական կայքէջում:

Ատոմ Ջանջուղազյանի խոսքով՝ Խաչիկ Փափազյանն է զեկուցում, քանի որ ղեկավարել է հաշվեքննության խումբը:

«Նույն տրամաբանությամբ կարող էիք ասել, որ հաշվեքննությունը ես՝ որպես Հաշվեքննիչ պալատի նախագահ ներկայացնեմ»,-հայտարարեց պալատի նախագահը:

Արսեն Թորոսյանը հայտնեց, որ չի ասել, թե ինչո՞ւ համակարգողը չի զեկուցում, այլ ասել է, թե ինչո՞ւ ներկա չէ և պետք չէ իր խոսքերը փոխել:

Փափազյանը սկսեց ներկայացնել հաշվեքննության եզրակացությունը: