Ձեր վստահելի աղբյուրը

Այսօր քննվել է պրոդյուսեր Արմեն Գրիգորյանին կալանավորելու որոշման դեմ վերաքննիչ բողոքը։ Իրավապաշտպան Ռուբեն Մելիքյանը լրագրողների հետ զրույցում ասաց, որ դատարանի որոշումը կհրապարակվի երկուշաբթի ժամը 11:00-ին։

«Պրոդյուսեր Արմեն Գրիգորյանի գործը քաղաքական բնույթ ունի: Արմեն Գրիգորյանը պատասխանատվության է կանչվել Նիկոլ Փաշինյանի հակառակորդը լինելու համար։ Սա քաղաքական հետապնդում է»,- ասաց Ռուբեն Մելիքյանը։

Նա նշեց, որ իրենց բողոքի հիմքում այն է դրված, որ այս արարքը քրեականացված չէ, առանց որևէ փաստական տվյալների դատարանը որոշել է, որ Ա. Գրիգորյանը կարող է փախչել, խոչընդոտել, ինչն անընդունելի է, պնդում են, որ գործ ունեն խտրական ու քաղաքական մոտեցման հետ։

«Մենք հասկանում ենք, որ բարդ գործ է, և հուսով ենք, որ դատարանը կվերացնի այս ակնհայտ ապօրինությունը, որովհետև չի կարելի այսօր որոշել, որ երեկվա արարքը հանցագործություն է։ Նման բան ուղղակի չի լինում»,- ասաց իրավապաշտապանը։

Հիշեցնենք՝ ԱԱԾ-ն հաղորդագրության համաձայն. «ՀՀ ազգային անվտանգության ծառայության քննչական դեպարտամենտում ազգային արժանապատվությունը հրապարակայնորեն նվաստացնելու դեպքի առթիվ  հարուցված քրեական գործի շրջանակներում Արմեն Գրիգորյանը ՀՀ քրեական օրենսգրքի 226-րդ հոդվածի 2-րդ մասով նախատեսված հանցանք կատարելու համար ձերբակալվել է, միաժամանակ քննիչի կողմից միջնորդություն է ներկայացվել դատարան` նրա նկատմամբ կալանավորումը որպես խափանման միջոց կիրառելու համար»։