Ձեր վստահելի աղբյուրը

«Նախագծի նոր լրամշակմամբ առաջարկում ենք նախորդ տարվա ռոյալթիի գումարի 25 %-ի փոխարեն միայն 2023 թվականին կանխավճարը կատարվի նախորդ տարվա ռոյալթիի 30 %-ի չափով»,-ԱԺ Տնտեսական հարցերի հանձնաժողովի նիստում հայտնեց ֆինանսների նախարարի տեղակալ Արման Պողոսյանը՝ զեկուցելով երկրորդ ընթերցման ներկայացվող «ՀՀ հարկային օրենսգրքում լրացումներ և փոփոխություններ կատարելու մասին» և «Պետական տուրքի մասին» օրենքում փոփոխություն կատարելու մասին» օրենքի նախագծերը:

Փոխնախարարը պարզաբանեց, որ օրենսդրական փոփոխություններից հետո վերանայված ռոյալթիների գծով առաջին վճարումները կկատարվեն 2024 թվականի ապրիլին, երբ կամփոփվեն 2023 թվականի հաշվետու տարին և ստացվելու է, որ եթե հատուկ կարգավորմամբ վերոնշյալ տոկոսի բարձրացումը չլինի, ապա 2023 թվականին էականորեն կրճատվելու են պետական բյուջեի մուտքրեը, որը մասսամբ վերականգնվելու է միայն 2024 թվականին:

Նա հայտնեց, որ նխագծում արված այդ փոփոխությամբ համահարթեցվում են 2023թ. և 2024թ.բյուջետային մուտքերը և վստահեցրեց, որ այս փոփոխությունը քննարկվել է ոլորտի ընկերությունների հետ, որոնք խնդրի ընկալում են ցուցաբերել:

Փաթեթի առարկան մետաղական հանքավայրեր շահագործող և արդյունահանող ընկերությունների կողմից վճարվող ռոյալթիների համակարգի վերանայումն և զուգահեռաբար մետաղական խտահանքի արտահանման համար նախատեսված պետական տուրքի կիրառությունից դուրս բերումն է:

Նախագծի հիմնավորման մեջ ասվում է. «Առաջարկվում է ռոյալթիի դրույքաչափի հաշվարկման բանաձևը վերանայել այնպես, որ՝

ա. մինչև 10 % շահութաբերության պայմաններում ռոյալթի վճարող կազմակերպությունների մոտ ռոյալթիի գծով հարկային բեռի բարձրացում չլինի: Այս մոտեցմամբ, նպատակ է դրվել ունենալ այնպիսի համակարգ, որի պայմաններում մետաղների միջազգային գների, և հետևաբար, կազմակերպությունների շահութաբերության մակարդակի նվազման պայմաններում ռոյալթիի գծով հարկային բեռը կազմակերպությունների արտադրատնտեսական գործունեության շարունակականության ապահովման տեսանկյունից չլինի խնդրահարույց,

բ. ռոյալթիի դրույքաչափի հաշվարկման գործող բանաձևում լրացվի 10 %-ից բարձր շահութաբերության պայմաններում հաշվարկվող լրացուցիչ բաղադրիչ, որի արդյունքում կհաշվարկվի հավելյալ ռոյալթի՝ 15 % դրույքաչափով: Ընդ որում, նախագծով առաջարկվում է սահմանել, որ բարձր շահութաբերության պայմաններում հաշվարկվող լրացուցիչ բաղադրիչը որոշելիս՝ շահույթը նախքան հարկումը հաշվարկելիս հաշվի է առնվում նաև ռոյալթիի դրույքաչափի հաշվարկման առաջին և երկրորդ բաղադրիչները, ինչպես նաև ռոյալթի վճարողի ֆինանսական ծախսերը»:

Ֆինանսների նախարարի տեղակալը տեղեկացրեց, որ նախագիծն առաջին ընթերցմամբ ընդունվելուց հետո հենց օրինագծի հեղինակ կառավարության կողմից որոշ փոփոխություններ են առաջարկվել:

Արման Պողոսյանի ներկայացմամբ գործող օրենսդրության կարգավորումներն այն են, որ եթե կառավարությունը որոշի աջակցել վատ վիճակում հայտնված այս կամ այն ընկերության պետական տուրքի գումարները վճարելու հարցում, ապա պետական բյուջեից տրամադրվող գումարները շահութահարկի մասով եկամուտ չեն համարվի այդ ընկերությունների համար, բայց միևնույն ժամանակ այդ պետական տուրքերը կհամարվեն ընկերությունների կողմից վճարված պետական տուքի գումարներ, թեև կառավարությունն է ամբողջությամբ կամ մասնակիորեն այդ գումարը տրամադրել:

Փոխնախարարի խոսքով՝ ստացվում է, որ աջակցություն ստացած ընկերություններն այլ հավասար պայմաններում իրավունք կստանան շահույթհարկի բազզան նվազեցնել պետական տուքի գումարների չափով, ինչն արդարացված չի լինի մյուս:

«Այդ խնդիրը լուծելու համար օրենսգրքի փոփոխություներով առաջրակվում է, որ այն գումարները, որոնք պետությունից կստացվեն հարկային պարտավորությունները կատարելու առումով և հետևաբար գործող կարգավորումներով արդեն շահութահարկով հարկվող եկամուտներ չեն, դրանք շահութահարկով հարկվող ծախս չհամարվեն, որպեսզի ընկերությունների միջև անահավասարությունն ու անարդար իրավիճակը չունենանք»,-հայտնեց փոխնախարարը:

Պատգամավորներն առաջարկեցին շահութաբերության շեմը 10%-ից բարձրացնել 15%-ի, որից հետո նոր կհարկվեն հավելյալ ռոյալթիները, ինչի հետ համաձայնեց կառավարության ներակայցուցիչը և նախագիծն այդ տեսքով ընդունվեց: