Ձեր վստահելի աղբյուրը

Թուրքական նոր ռազմական գործողությունը Սիրիայում կարող է սկսվել Հյուսիսային Իրաքում թուրքական բանակի ներկայիս անդրսահմանային գործողության ավարտից հետո: Hürriyet-ի հրապարակմանն անդրադարձել է ՏԱՍՍ-ը։ Պարբերականը չի բացառում, որ օպերացիան սկսելու հրամանը կարող է տրվել անմիջապես մահմեդական զոհաբերության գլխավոր տոնից՝ Կուրբան բայրամից հետո, որտ նշվում է հուլիսի 9-12-ը։

Ապրիլի 18-ից Հյուսիսային Իրաքում թուրքական բանակն իրականացնում է «Ճանկ-ամրոց» գործողությունը։ Մինչ օրս, ըստ Թուրքիայի պաշտպանության նախարարության, սպանվել են Թուրքիայում արգելված Քրդստանի աշխատավորական կուսակցության (PKK) ավելի քան 220 զինյալներ, հարվածներ են հասցվել նրանց հիմնական հենակետերին, զենքի ու պարենի պահեստներին։

Ըստ Hürriyet-ի՝ Թուրքիայի զինված ուժերը ցանկանում են հաջողությամբ ավարտել գործողությունը Հյուսիսային Իրաքում, ուստի սիրիական նոր օպերացիայի սկիզբը պետք է դիտարկել Իրաքում ռազմական գործողությունների դադարեցման պահից։ Թերթը գրում է, որ Թել Ռիֆաթի և Մանպիճի գործողության համար թուրքական զորքերը դեռ լիարժեքորեն պատրաստ չեն:

Hürriyet-ը հիշեցնում է Թուրքիայի նախագահ Ռեջեփ Թայիփ Էրդողանի խոսքերն այն մասին, որ Սիրիայում ցանկացած պահի կարող է գործողություններ սկսել։ «Թուրքիայի զինված ուժերը գործողություն չեն սկսի, եթե լիովին պատրաստ չլինեն դրան, պետք է սպասել Կուրբան բայրամի տոնին, որից հետո գործողությունը կարելի է սկսել ոչ թե հաշված օրերի ընթացքում, այլ՝ ժամերի»,-գրում է Hürriyet-ի սյունակագիր Աբդուլքադիր Աքսուն, որը հայտնի է թուրքական իշխանությունների հետ իր սերտ կապերով։