Ձեր վստահելի աղբյուրը

Հանդիսավոր արարողությամբ ամփոփվել է Խաչատրյանի անվան 18-րդ միջազգային մրցույթը։ Այս մասին տեղեկացնում են մրցույթի նախաձեռնողները։

«Ժյուրիի որոշմամբ առաջին մրցանակը շնորհվել է Իտալիան ներկայացնող թավջութակահար Էտտոռե Պագանոյին, երկրորդ մրցանակակիր է ճանաչվել Ջոու Կիտամուրան (Ճապոնիա), երրորդ մրցանակին արժանացել է Իվան Սենդեցկին (Ռուսաստան)։ Առաջին մրցանակակիրը կստանա 10000 դոլարին համարժեք դրամ մրցանակ, երկրորդ մրցանակակիրը՝ 5000 դոլարին համարժեք դրամ, իսկ երրորդ տեղը զբաղեցրած երաժիշտը՝ 3000 դոլարին համարժեք դրամական պարգև։

Էտտոռե Պագանոն մրցանակաբաշխությունից հետո խոստովանել է, որ չէր սպասում, թե կհաղթի մրցույթում։

«Իհարկե, շատ տպավորված եմ և չեմ կարող նկարագրել իմ զգացմունքները»,- ասել է երիտասարդ թավջութակահարը։

Նա նաև տեղեկացրել է, որ Խաչատրյանի` թավջութակի և նվագախմբի համար գրված կոնցերտ-ռապսոդիան սովորել է հատուկ այս մրցույթին մասնակցելու համար, խոստովանել, որ հեշտ չէր, սակայն ուրախ է, որ այն հաղթանակ բերեց իրեն։

Երեկոյի ընթացքում շնորհվել են նաև հատուկ մրցանակներ։ Մասնավորապես, մրցույթի 1-ին փուլում Յոհան Սեբաստիան Բախի թավջութակի համար գրված ստեղծագործության լավագույն մեկնաբանության համար մրցանակ է տրվել Իվան Սենդեցկուն, վերջինս ստացել է նաև մրցույթի երկրորդ փուլում Արամ Խաչատրյանի Սոնատ-ֆանտազիայի լավագույն մեկնաբանության համար մրցանակը։ Մրցույթի 1-ին փուլում Դավիդ Պոպերի «Թավջութակի կատարողական բարձր վարպետության ձեռնարկի» էտյուդների լավագույն մեկնաբանության համար հատուկ մրցանակը տրվել է Ջոու Կիտամուրային։ Մրցույթի 2-րդ փուլում սոնատի լավագույն մեկնաբանության համար հատուկ մրցանակ է շնորհվել Էտտոռե Պագանոյին։

«Լավագույն նվագակցող դաշնակահար» անվանակարգում հաղթող է ճանաչվել Գայանե Ասլանյանը։ «Հանդիսատեսի համակրանք» հատուկ մրցանակին արժանացել է Միքայել Ոսկանյանը։
Մրցույթի հոգաբարձուների խորհրդի անդամ, կոմպոզիտոր Տիգրան Մանսուրյանը նշեց, որ Արամ Խաչատրյանի երաժշտության շուրջ մշտապես տոնական մթնոլորտ է և տոնականության ոգին։

«Այսօր էլ նույնն է։ Խաչատրյանի երաժշտությունը մեզ սնելու է այն դասականների ուժով, որոնց մենք ճանաչել ենք տասնամյակներ շարունակ, և որոնք զարդարում են մեր օրը»,- նշել է մաեստրո Մանսուրյանը:

Երեկոյի ընթացքում առաջին մրցանակակիր Էտտոռե Պագանոն մրցույթի պաշտոնական նվագախմբի՝ Հայաստանի պետական սիմֆոնիկ նվագախմբի հետ կատարեց Խաչատրյանի Կոնցերտ-ռապսոդիան թավջութակի և նվագախմբի համար»,- նշված է հաղորդագրությունում։

Մրցույթի նախաձեռնողները հիշեցնում են, որ Խաչատրյանի անվան 18-րդ միջազգային մրցույթն անցկացվել է հունիսի 6-ից 13-ը թավջութակ մասնագիտությամբ։ Մասնակցում էին աշխարհի 12 երկրի 18 թավջութակահարներ։ Խաչատրյանի անվան մրցույթը 2013 թվականից Ժնևում հիմնված «Միջազգային երաժշտական մրցույթների համաշխարհային ֆեդերացիայի» (WFIMC) անդամ է։ Խաչատրյանական մրցույթը կազմակերպել է «Արամ Խաչատրյան-մրցույթ» մշակութային հիմնադրամը՝ ՀՀ ԿԳՄՍ նախարարության աջակցությամբ։