Ձեր վստահելի աղբյուրը

 «29 տարի առաջ այս օրերին համայն հայ ժողովուրդը սգում էր իր լավագույն զավակներից մեկի՝ Մոնթե Մելքոնյանի մահը։ 29 տարի շարունակ յուրաքանչյուրս մեր տեղում բացարձակ ճշմարտությամբ ենք ընդունել Մոնթեի մարգարեական խոսքերը՝ Արցախի և Հայաստանի մասին․ «Եթե կորցնենք Արցախը, մենք կշշրջենք հայ ժողովրդի պատմության վերջին էջը»։ 29 տարի  շարունակ, անկախ վայրիվերումներից, սխալներից,թերացումներից, հայության բոլոր հատվածներն առաջնորդվել է այս գիտակցությամբ,որով դաստիարակվել է նաև 90-ականների հաղթանակած սերունդը»,- Ֆրանսիայի հրապարակում ընթացող հանրահավաքի ժամանակ ասաց ԱԳՆ նախկին գլխավոր քարտուղար , արտակարգ և լիազոր դեսպան Վահագն Մելիքյանը։

Նրա խոսքով՝ ազգակործան և կանխամտածված քաղաքականության հետևանքով այսօր մենք հասել ենք ճակատագրական հանգրվանի։

Նրա գնահատմամբ՝ մոտեցել ենք վտանգի չափազանց բարձր աստիճան ունեցող կիզակետին, որի հատումն ուղղակիորեն սպառնում է ՀՀ ինքնիշխանությանը, ԱՀ գոյությանը և մեր պետականությանը։

«Սրանք լոկ բառեր չեն և չեն ասվում իրականությունն ավելի գորշ գույներով ներկայացնելու կամ, ոմանց կարծիքով, ինչ-ինչ նեղ անձնական օգուտներ քաղելու համար։Սա խիստ սառնասիրտ, կշռադատված և խորը վերլուծության ենթարկված գնահատական է,որի հետ դեռ հաշվի չեն նստում հազարավոր մեր հայրենակիցներ։ Այս վտանգի դեմն առնելու հրամայականը շատ ավելի կենսական կարևորություն ունի,քան մոլագար մեկնաբանությունները՝ «նախնիկններ, ներկաներ» հիվանդագին մրցավազքի մեջ։ Դիմադրողականության այն անկումը, որն ավելի ցայտուն դրսևորվեց 44-օրյա պատերազմից հետո  և մինչ օրս էլ շարունակում է թուլացնել մեր իմունիտետը, արդյունք են համակարգված, հստակ ծրագրված և հետևողականորեն իրականցված այն ապազգային քաղաքականության, որը միտված էր մեզ զրկելու մեր ազգային ինքնությունից, մեր արմատներից ու արժանապատվությունից»,- նշեց նա։

Դեսպանի խոսքով՝ վաղն արդեն կարող է ուշ լինել, երբ թշնամին ուղղակի կթակի յուրաքանչյուրիս դուռը։

«Բոլորս նստած ենք ժամացույցը միացված դանդաղ գործարկման ռումբի վրա»,- ասաց նա։

Ավելի մանրամասն՝ տեսանյութում։