Ձեր վստահելի աղբյուրը

Այս տարվա ապրիլին կառավարությունը հաստատել է բնակարանների և անհատական բնակելի տների էներգաարդյունավետ վերանորոգման աշխատանքների պետական աջակցության ծրագիրը:

ՀՀ քաղաքաշինության կոմիտեի բնակարանային ֆոնդի կառավարման և կոմունալ ենթակառուցվածքների վարչության պետ Տանյա Արզումանյանն այսօր հրավիրված ասուլիսում ներկայացնելով ծրագրի մանրամասներն, ասաց, որ պետությունը մասնակի կամ ամբողջությամբ սուբսիդավորելու է վերանորոգման վարկի տոկոսադրույքը:

Մասնավորապես, ըստ նրա, սահմանամերձ բնակավայրերի քաղաքացիների համար վարկը կլինի 0 տոկոս, այսինքն՝ առանց տոկոսի, իսկ սահմանամերձ բնակավայր չհանդիսացող գյուղական բնակավայրերի համար վարկը կլինի 2%, քաղաքային բնակավայրերի համար՝ 3% տոկոս, Երևանի բնակիչների համար այն կկազմի 5%: Ըստ ծրագրի՝ բանկային տոկոսադրույքը 14 տոկոս է։
Բազմաբնակարան շենքերի բնակարանների համար նախատեսված է առավելագույնը 7 մլն դրամի վարկ, իսկ անհատական տների համար՝ 10 մլն դրամ:  Վարկի մարման առավելագույն ժամկետը 7 տարի է:

Այդ ծախսերի 20-30 տոկոսը պետք է կօգտագործվի բնակարանի էներգախնայողության համար: «Ծրագրի համաձայն՝ վերանորոգման աշխատանքները պարտադիր պետք է ունենան էներգախնայողության բաղադրիչ։ Ծրագրում չեն կարող ընդգչկվել այն տներն ու բնակարանները, որոնք վթարային են, ունեն 4-րդ աստիճանի վթարայնություն»,- ասաց Տանյա Արզումանյանը։

Կոմիտեի ներկայացուցիչը նշեց, որ էներգաարդյունավետ վերանորոգման միջոցառումները ենթադրում են՝ անհատական տների համար արտաքին պատերի ջերմամեկուսացում, տանիքի, նկուղի վերանորոգում, դռների, լուսամուտների փոխարինում, այլընտրանքային էներգիայի աղբյուրների ձեռքբերում տեղադրում՝ մասնավորապես արևային պանելներ, էներգախնայող ջեռուցման համակարգեր, այսիքն՝ ամեն ինչ, ինչը էներգախնայող է։

Կենտրոնական բանկի նախագծերի ղեկավար Դավիթ Կիրակոսյանը տեղեկացրեց, որ առաջիկայում կհրապարակեն այն բանկերի ցանկը, որոնք տրամադրեկու են վարկը։
Նրա խոսքով՝ դա լինելու է ստանդարտ վարկային պրոդուկտ, բանկերն ու վարկային կազմակերպությունները գնահատելու են հաճախորդների վարկունակությունը, այդ թվում՝ եկամուտների բավարար մակարդակ, վարկային պատմություն և այլն:

Հարցին, թե արդյոք գրավի անհրաժեշտություն կա, Դավիթ Կիրակոսյանն ասաց, որ դա պարտադիր պայման չէ, հաճախորդի վարկունակության ժամանակ արդեն բանկը կորոշի՝ գրավի անհրաժեշտություն կա, թե ոչ։

Նշվեց նաև, որ գումարը նախատեսված է տրամադրել ամբողջությամբ, ինչպես նաև փուլային տարբերակով։