Ձեր վստահելի աղբյուրը

«Հայաստանի բոլոր հրապարակները մեր տրամադրության տակ են, բոլոր հրապարկներում էլ «Դիմադրության» շարժումը լինելու է։ «Դիմադրության» շարժումն ամենուր է լինելու։ Սրա վկայություններից մեկն այսօրվա նախաձեռնությունն է»,- նախքան ինքնաբուխ ակցիայի մեկնարկն ասաց ՀՅԴ ԳՄ անդամ, «Հայաստան» խմբակցության պատգամավոր Գեղամ Մանուկյանը՝ պատասխանելով հարցին, թե Ֆրանսիայի հրապարակում վրանները հավաքելուց հետո իշխանության անդամները  շահարկում են, թե «Դիմադրության» շարժումը դադարեցնում է պայքարը։

Նա նշեց, որ որևէ վայրկյան դադար չի լինելու, թող շատ չհանգստանան։

«Ավելին ասեմ՝ թող շատ անհանգստանան, քանի որ այն  կազմակերպական, կառուցվածքային վիճակը, որը հիմա ձևավորվում է, ընթացքի մեջ է, ավելի թափով է հիմա ձևավորվում,  շատ ավելի մոտեցնելու է նրանց հեռացման օրը»,- ասաց Մանուկյանը։ 

«Հայաստան» խմբակցության պատգամավոր Գեղամ Նազարյանը հրաժարվեց մեկնաբանել իշխանության անդամների նման հայտարարությունները։

«Ո՞ւմ մեկնաբանեմ։ Նրանց, ովքեր անընդհատ ստում են, խաբում են մարդկանց, երկիրը հասցրեցին այս վիճակին, մարդկանց կյանքը դարձրեցին անտանելի։ Ի՞նչ մեկնաբանեմ։ Նույն ձևով կարող են ասել հետնահանջ է, որովհետև այսօր քայլեցին ոչ թե Մաշտոցի պողոտայով, այլ Սարյանի փողոցով։ Վրաններն իրենց դերը կատարեցին։ Իշխան Սաղաթելյանը երեկ շատ ճիշտ ասաց՝ ուզենք  վրան դնել, ցանկացած հրապարակում կդնենք»,- ասաց ընդդիմադիր գործիչը։

Գ.Նազարյանն ընդգծեց՝ իրենց պայքարը շարունակվում է, որովհետև Նիկոլ Փաշինյանը դեռ հրաժարական չի տվել։

«Իսկ մենք նրա հրաժարականը պահանջում ենք, քանի որ մեր երկիր պատերազմ է բերել,  մեր տուն արյուն է բերել, իր կառավարման ընթացքում Հայաստանը շարունակում է կուրուստներ կրել։  Վկայությունը՝ Գորիս-Կապան ճանապարհի հանձնումը Ադրբեջանին, Ճակատենի  ճանապարհի հանձնումը, Հայաստանի սոցիալ- տնտեսական ծանրագույն վիճակը, օրեցօր բարձրացող գները։

Նա մենակ կարողանում է  մարդկանց վախ ներշնչել, որ գիտեք՝ եթե մենք Ադրբեջանի և  Թուրքիայի ասածները չանենք, ուրեմն պատերազմ է լինելու։ Մեզ նման  ղեկավար պետք չէ»,- ասաց Գ. Նազարյանը։

Նա թվարկեց, թե ինչ վտանգներ են տեսնում և ինչը պետք է կանխեն. «Փաշինյանն Արցախյան հարցում ասում է  նշաձողի իջեցում, ինչը նշանակում է՝ նվիրենք Արցախն Ադրբեջանին։ Վտանգը Տավուշի մարզի որոշ կարևորագույն նշանակության տարածքների հանձնումն է  Ադրբեջանին, որը կարող է լինել, վտանգը Սյունիքի մարզի շատ կարևոր տարածքի հանձնումն է, որը պետք է կանխենք։ Դա կբերի Հայաստանի կործանմանը։ Ադրբեջանն ու Թուրքիան չեն էլ թաքցնում, որ իրենց նպատակը  ոչ թե խաղաղությունն է, այլ Հայաստան չլինելը։ Կարող է անվան հետ  համաձայնվեն, որ որոշ ժամանակ դեռ մնա, բայց իրականում ուզում են այստեղ փոխել ժողովրդագրական կազմը, որ հայերը լինեն փոքրամասնություն, մեր տնտեսությունը գնալով վատթարանա,  կյանքի պայմանները վատանան, մարդիկ ստիպված արտագաղթեն։ Մենք այս ամենը հաստատ կանխելու ենք, այլ տարբերակ չունենք»։