Ձեր վստահելի աղբյուրը

ՌԴ-ի հացի արտադրության սուբսիդավորման ծրագիրը, որն ընդունվել է 2022 թվականի մարտին, չի համապատասխանում ճգնաժամի նոր դրսևորումներին, ինչը հանգեցրել է ձեռնարկությունների բոլոր ծախսերի կտրուկ աճին: Ռուսական «Կոմերսանտը» գրում է, որ այդ մասին հայտնել է Հացթուխների Ռուսաստանի միությունը (ՀՌՄ): Կազմակերպությունը դիմել է Պետդումա՝ 1 կգ-ի դիմաց տրամադրվող սուբսիդիայի չափը 2,5 ռուբլուց(20 դր) մինչև 7,5 ռուբլի(55 դր) ավելացնելու խնդրանքով, ինչպես նաև առաջարկում են այն ընդլայնել այլ տեսականիների վրա, ինչպես նաև տնտեսվարողներին գները բարձրացնելու հնարավորություն տալ: Սակայն փորձագետները կասկածում են, որ նույնիսկ այդ դեպքում միջոցառման արդյունավետությունը զգալիորեն կբարձրանա։

«Կոմերսանտ»-ը ծանոթացել է սուբսիդավորման կանոնները փոխելու հացաբուլկեղեն արտադրող ձեռնարկությունների՝ ՌԴ Պետդումայի ագրարային հարցերով կոմիտեի փոխնախագահ Նադեժդա Շկոլկինային ուղղված դիմումին։ Ինչպես նշվում է մայիսի 30-ի նամակում, կառավարության կողմից այս տարվա մարտին հաստատած 1 կգ արտադրանքի դիմաց 2,5 ռուբլի սուբսիդավորումն իր նաշանակությունը կորցրեց Ռուսաստանի Դաշնության դեմ արևմտյան նոր պատժամիջոցների ներդրումից հետո, ինչը հանգեցրել է հումքի, սարքավորումների, փաթեթավորման և լոգիստիկայի արժեքի բարձրացմանը: ՀՌՄ նախագահ Անդրեյ Լյալինը գրել է, որ նոր պայմաններում մի շարք ձեռնարկություններ հրաժարվել են սուբսիդիաներից, որոնք չեն կանխում շահութաբերության անկումը։ Գյուղատնտեսության նախարարության տվյալներով՝ հատկացված 2,5 մլրդ ռուբլուց արտադրողները ստացել են միայն 17,92%-ը։

ՀՌՄ-ի համաձայն՝ նոր պայմաններում 1 կգ-ի համար սուբսիդիայի չափը պետք է հասցվի առնվազն 7,5 ռուբլու(55 դր)։

Միությունը նաև առաջարկում է աջակցությունն ընդլայնել հագեցված, շերտավոր և դիետիկ արտադրանքների վրա, երկարացնել սուբսիդիա ստանալու ժամկետը և թույլատրել ստացողներին բարձրացնել գները՝ բացառությամբ աջակցության օգտագործման առաջին երկու ամիսների: Բացի այդ, ՀՌՄ-ն ավելորդ է համարում սուբսիդավորման համար դիմելու փաստաթղթերի փաթեթը, իսկ բուն գործընթացը համարում է չափից դուրս բյուրոկրատական։

Վրաստանում 2021 թվականի ամռանը դադարեցվեց մինչ այդ ներդրված ալյուրի սուբսիդավորումը: Վրաստանի Հացթուխների ասոցիացիայի ղեկավար Մալխազ Դոլիձեի խոսքով, ալյուրի սուբսիդավորման դադարեցումից հետո, տեղական շուկայում հացի գինն աճել էր 10 թեթրիով(30 դր): Ըստ «Ալիք գե»-ի այդ մասին Դոլիձեն խոսել էր «Մթավարի» մեդիա կենտրոնում:

Նրա խոսքով, չնայած հաց արտադրողները գինը բարձրացրեցին ընդամենը 10 թեթրիով, նրանք չեն կարող միջամտել վաճառքի վերջնական գնի սահմանմանը, ինչի պատճառով խանութներում հացն ավելի թնակ է վաճառվում:

Panorama.am-ը դիմեց Էկոնոմիկայի նախարարություն՝ տեղեկանալու, թե արդյո՞ք Հայաստանում ալյուրը կամ հացի արտադրությունը սուբսիդավորվում է: Նախարարության Պարենային անվտանգության և ագրովերամշակման զարգացման վարչության պետ Գևորգ Ղազարյանը հայտնեց, որ չի սուբսիդավորվում:

2022 թվականին Հայաստանում հացի գները բարձրացել են 10-30 դրամով: Ըստ մասնագետների՝ այս տարի հացահատիկի բերքի համար կան եղանակային և այլ(պարատանյութի, լոգիստիկայի գների աճ) անբարենպաստ պայմաններ և մեծ հավանականությամբ մինչև տարվա վերջ համաշխարհային շուկայում հացահատիկի գները էլ ավելի կբարձրանան:

Համատարած թանկացումների պայմաններում ՀՀ քաղաքացու սպառողական զամբյուղի թիվ մեկ սննդամթերքի թանկացումն էականորեն ազդելու է մարդկանց ապրելակերպի վրա, իսկ այն հնարավոր է մեղմել երկու ճանապարհով՝ սուբսիդավորմամբ կամ աշխատավարձերի բարձրացմամբ: ՀՀ կառավարությունը վերջինից համառորեն խուսափում, հետևաբար՝ մնում է միայն հացի կամ ալյուրի սուբսիդավորման տարբերակը:

Պատրաստեց Ա. Վարդանյանը