Ձեր վստահելի աղբյուրը

Արցախից տեղահանված մի քանի տասնյակ ընտանիքներ կանգնած են փողոցում հայտնվելու վտանգի առջև։ Բանն այն է, որ պատերազմի հետևանքով իրենց տները կորցրած, ապա Հայաստանի տարբեր բնակավայրերի հյուրանոցներում, համայնքային ու այլ հաստատությունների շենքերում ժամանակավորապես ապրող արցախցիները պետք է լքեն այդ կացարանները։

Կարելի է ենթադրել՝ այս շենք-շինություններում մնացել են այն մարդիկ, որոնք բարեկամ-հարազատի տանը, վարձով ապրելու հնարավորություն չեն ունեցել, ուստի կացարանից զրկելը նրանց համար սոցիալական լուրջ խնդիր է լինելու։

Հայաստանում Արցախի Հանրապետության կառավարության օպերատիվ շտաբ պետի տեղակալ Սասուն Սավադյանը Panorama.am-ի հետ զրույցում ասաց, արցախցիներին այդ շինություններից հանելու միտքը հյուրանոցի տերերի, ինչ-որ տեղ պետության մոտ ծագել է այս տարվա սկզբին, որոշվել է, որ յուրաքանչյուր հյուրանոց, հանրակացարան ծառայի իր նպատակին։

Հունիսի 1-ի դրությամբ Հայաստանում ապրում է Արցախից տեղահանված 5902 ընտանիք կամ  20 016 բնակիչ։

«Նրանք հիմնականում՝ 90 տոկոս և ավելին ապրում են վարձով կամ բարեկամի տանը։ Կան հյուրանոցներում, պետական, համայնքային հաստատություններում ապրող արցախցիներ, որոնք արդեն պետք է դուրս գան, սպասում էին երեխաների դասերն ավարտվեին ու դուրս են գալու այդ շինություններից։ Թիվը կոնկրետ ասել չեմ կարող բայց քիչ են՝ 100-150 ընտանիք»,-ասաց օպերատիվ շտաբի ներկայացուցիչը։

Տուն ու տեղից, ապրուստից զրկված մարդիկ ինչպե՞ս են հոգալու կեցության ծախսերը, առանց այդ էլ օր օրի ավելացող գնաճը դժվարեցրել է ապրուստ հայթայթելը։

«Ոնց որ հինգ հազարը, այդ հարյուր քանիսն էլ նույն ձևով էլի»,-արձագանքեց Սավադյանը։
Նրա խոսքով, շուտով Արցախում որոշում կկայացնեն, որ հուլիսի 1-ից յուրաքանչյուր ընտանիքի կտրամադրվի 40 հազար դրամի աջակցություն՝ և տան վարձի, և այլ սոցիալական խնդիրների լուծման համար։ Օպերատիվ շտաբի պետի տեղակալի խոսքով, 40 հազար դրամով կարելի է տուն վարձել, օրինակ, Մասիսի հարակից գյուղերում։

«Ես, օրինակ, տեղահանված եմ, առաջին օրվանից ապրում եմ վարձով։ Աշխատում եմ։ Կարող է՝ էդ մարդիկ ասեն՝ չեն աշխատում, բայց ներքին կարգով աշխատեն։ Եթե հինգ հազար ընտանիքն ապրում են վարձով կամ բարեկամի տանը, իրենք էլ կկարողանան, Արցախից 40 հազարականները լինելու են հենց այդ նպատակով։ Երևանից ընդամենը 5-7 կմ հեռավորության վրա գտնվող Ազատաշեն, Խաչփար գյուղերում 30 հազար դրամով էլ տներ կան, արցախցիները վարձել են ու ապրում են մի տարուց էլ շատ»,-ասց Սավադյանը։

Նրա խոսքով, հյուրանոցներում, համայնքային հաստատություններում ապրող արցախցիների կարիքների հաշվառում չի իրականացվել։

«Այդ ժամկետը տարեսկզբից հետաձգվում է։ Հիմա չեմ կարող վերջնաժամկետ նշել, թե երբ պետք է դուրս գան»,-ասաց  օպերատիվ շտաբի ներկայացուցիչը։

Ադրբեջանական զինված ուժերի կողմից Արցախի տարածքների բռնազավթման հետևանքով տեղահանված ու Հայաստանում ժամանակավորապես բնակություն հաստատած 5902 ընտանիքից 1510-ն ապրում է մայրաքաղաք Երևանում (5321 մարդ),  137 ընտանիք ապրում է Արագածոտնում,  809 ընտանիք՝ Արարատում,  280 ընտանիք՝ Արմավիրում, 196 ընտանիք՝ Գեղարքունիքում, 170 ընտանիք՝ Լոռիում, 801 ընտանիք՝ Կոտայքում, 147 ընտանիք՝ Շիրակում,  819 ընտանիք՝ Սյունիքում,  278 ընտանիք՝ Վայոց Ձորում,  66 ընտանիք՝ Տավուշում։