Ձեր վստահելի աղբյուրը

Ուկրաինացի զինվորականները Դոնբասում ամեն օր ունենում են մինչև 1000 զոհ և վիրավոր: ՏԱՍՍ-ը հայտնել է, որ ըստ Axios պորտալի՝ այդ մասին հայտարարել է ուկրաինական իշխող «Ժողովրդի ծառա» կուսակցության խմբակցության ղեկավար Դավիթ Արախամիան, որն այցով գտնվում է Վաշինգտոնում։

Ըստ Axios-ի՝ ելույթ ունենալով գերմանական Մարշալի հիմնադրամի կազմակերպած կլոր սեղանի ժամանակ՝ Արախամիան նշել է, որ Ուկրաինայի Զինված ուժերը Դոնբասում օրական ունենում է 200-ից 500  սպանված։ ԱՄՆ Զինված ուժերի շտաբների պետերի կոմիտեի (CNS) նախագահ, գեներալ Մարկ Միլին չորեքշաբթի ավելի վաղ ասել էր, որ Վաշինգտոնի գնահատականներով, Ուկրաինայի Զինված ուժերի օրական կորուստները կազմում են մոտ 100 զոհ և մոտ 100-300 վիրավոր. Ուկրաինայի նախագահ Վլադիմիր Զելենսկին հունիսի սկզբին հայտնել էր օրական 60-100 զոհերի մասին։

Ինչպես նշել է Արախամիան, վերջին երկու շաբաթվա ընթացքում այս ցուցանիշները զգալիորեն աճել են։ Միևնույն ժամանակ, նրա խոսքով, Ուկրաինայի իշխանությունները նախկինում մոբիլիզացրել են մեկ միլիոն մարդու և կարող են ևս երկու միլիոն հավաքագրել Ուկրաինայի զինված ուժերում։ Բայց Կիևի գլխավոր խնդիրը, ըստ Արախամիայի, զենքի և զինամթերքի բացակայությունն է։ «Մենք ունենք հարձակման, հակահարձակման համար պատրաստված մարդիկ, բայց դրա համար մեզ զենք է պետք»,-ասել է նա։

Ըստ Axios-ի՝ Արախամիան ժամանել է Վաշինգտոն՝ ԱՄՆ իշխանությունների հետ քննարկելու Կիևին զենքի մատակարարման տեմպերի ավելացման հնարավորությունը։ Ավելի վաղ ԱՄՆ Կոնգրեսը հավանություն էր տվել Ուկրաինային 40 միլիարդ դոլարի օգնության հատկացմանը, այդ թվում՝ ռազմական։ Այնուամենայնիվ, ինչպես պնդում էր Արախամիան, այդ միջոցները շատ դանդաղ են վերածվում իրական զենքի մատակարարումների, և Կիևի գործընկերները, հատկապես Եվրոպայում, սկսում են կենտրոնանալ սեփական պաշարների համալրման վրա, այլ ոչ թե Ուկրաինա զենք և տեխնիկա փոխանցելու վրա: