Ձեր վստահելի աղբյուրը

«Պետք է հստակ լծակներ դրվեն, որովհետև՝ միլիարդներ ենք դրել ճանապարհաշինության մեջ, հետո էլ պարզվում է, որ որակով չեն արել, մենք էլ ժամանակը կորցնում ենք, նրանք վերականգնում են, մենք նորից նույն գումարը տանում վճարում ենք»,-կառավարության նիստում անդրադառնալով նորակառույց ճանապարհներում ի հայտ եկած որակի խնդիրներին՝ հայտարարեց Նիկոլ Փաշինյանը::

Նրա խոսքով՝ կառավարությունը որակի ստանդարտներն աստիճանաբար է բարձրացնում, որ շինարարների վրա անհաղթահարելի բեռ չդնեն, բայց այն ստանդարտները, որոնցով կառավարությունն այսօր ճանապարհ է կառուցում, իրենց սրտով չէ:

«Ինչո՞ւ պետք է որևէ աշխատանքի որակի պրոբլեմ լինի, ինչո՞ւ, որևէ պաշտոնյայի կաշա՞ռք են տվել, ատկա՞տ են տվել… Ինչի՞ պետք է լինի… Ի՞նչ է նշանակում՝ աշխատանքը գնանք իրականացնենք, պետությունն այդքան փող դնի, ռեսուրս օգտագործի, վերջում պարզվի, որ աշխատանքը որակյալ չէ»,-հայտարարեց Փաշինյանը և հավելեց. «Ու էդ կազմակերպությունն ասի՝ հա դե, որակյալ չէ, բա «ներողությունն» ինչի համար է, փողը տվեք կանենք: Չի  կարող այդպես լինել, մենք նաև որոշակի վարքագիծ պետք է պարտադրենք ընկերություններին: Ժամկետներ են ձգձգում, չգիտեմ՝ օբյեկտիվ սուբյեկտիվ պատճառներով: Այդ ամեն ինչը պետք է ռեյտինգավորում անցնի, որ մենք տեսնենք՝ այս ընկերության հետ կառավարությունն ուզում է գործ ունենալ, թե ոչ»:

Ֆինանսների նախարար Տիգրան Խաչատրյանը հայտնեց, որ ուշացումների համար տուգանքներ կան նախատեսված շինարարների համար:

Փաշինյանը շարունակեց՝ ասելով, որ այսօր Հայաստանում չկա շինարարական մի ընկերություն, որ չունի աշխատանք:

«Ընդհակառակը՝ այնքան շինարարություն են վերցնում, որ չեն հասցնում անել, մենք ենք իրենց հետևից ընկնում՝ խնդրողի կարգավիճակով ասելով՝ այս աշխատանքն էլ արեք… Այս ի՞նչ նձև է: Մի հատ էլ պարզվում է անորակ են անում. այսպես՝ ջուրտուքշի արա, որ մյուս աշխատանքը անենք… Այդպես չի լինի»,-հայտարարեց կառավարության ղեկավարը և հիշեց. «Էն ժամանակ, որ սարքած ճանապարհը քանդվում էր, ասում էին՝ այստեղ ենք տալիս, այնտեղ ենք տալիս, մի քիչ բարակացնում ենք, էս ենք անում… Այդ ռեժիմը պետք է վերջացնել և պետք է որակի համար լինի ծայրահեղ հսկողություն»:

ՏԿԵ նախարար Գնել Սանոսյանն էլ հայտնեց, որ 2022 թվականին 47 մլրդ դրամ է բյուջեից հատկացվել ճանապարհաշինության համար, իսկ շինարարներին գումարները վերջնական չեն տալիս, քանի դեռ թերությունները չեն շտկվում: