Ձեր վստահելի աղբյուրը

Մեծ Բրիտանիան կշարունակի ակտիվորեն աջակցել Ուկրաինային, նույնիսկ երբ աշխարհը հոգնել է ուկրաինական հակամարտությունից: ՏԱՍՍ-ի փոխանցմամբ՝ այդ մասին շաբաթ օրը Կիևից վերադառնալուց հետո հայտարարել է Մեծ Բրիտանիայի վարչապետ Բորիս Ջոնսոնը։

«Շատ կարևոր է ուղևորություններ կատարել Ուկրաինա, հատկապես կրիտիկական պահերին: Մենք անհանգստացած ենք, որ Ուկրաինայի թեմայի շուրջ մի փոքր հոգնածություն է սկսում ի հայտ գալ ամբողջ աշխարհում, բայց դուք պետք է հասկանաք, որ ուկրաինացիները լրջորեն տառապում են, այդ թվում՝ երկրի արևելքում»,-ասել է Ջոնսոնը լրագրողներին, և հավելել. «Ռուսները թիզ առ թիզ առաջ են շարժվում: Մեզ համար կարևոր է ցույց տալ, որ Ուկրաինան կարող է և հաղթելու է, այն ճշմարտություն է»:

Ուրբաթ օրը Մեծ Բրիտանիայի վարչապետը չհայտարարված այց էր կատարել Ուկրաինա։ Կիևում Ջոնսոնը հանդիպել է Ուկրաինայի նախագահ Վլադիմիր Զելենսկու հետ։ Բանակցությունների ընթացքում կողմերը քննարկել են Ուկրաինային արևմտյան սպառազինության մատակարարման և եվրոպական երկրների տարածքում ուկրաինացի զինվորականների վերապատրաստման հարցերը։