Ձեր վստահելի աղբյուրը

«Առաջին թեզը, որ մենք պատկերացնում ենք, այն է, որ մեր երկրում դատական համակարգը պետք է լինի անկախ, անվախ ու արդար»,-«Դիմադրության» շարժման հանրահավաքին հայտնեց «Հայաստան» խմբակցության պատգամավոր Արամ Վարդևանյանը:

Նկատելով, որ պետք է ապահովվի գործադիրից քննչական մարմինների անկախությունը՝ պատգամավորն հավելեց, որ այն անհրաժեշտ է, որպեսզի պատվերով գործեր չկարվեն, այլ լինեն իրենց գործին նվիրված:

Նրա խոսքով՝ սկսած գլխավոր դատախազից, բոլոր դատախազները պետք է լինեն ապաքաղաքական:

«Ամենկարևորը՝ պետական կառավարման համակարգում պետք է լինի մեկ սկսզբունք՝ պրոֆեսիոնալիզմ, չի կարող անկիրթ, անկենսագրություն մարդն այս երկրի պատասխանատվությունն ունենա»,-ասաց բանախոսը:

Թվելով, թե պետության մեջ ինչ չի կարելի՝ Վարդևանյանն ասաց. «Չի կարելի ոստիկանին պարգևավճարով կախյալ դարձնել: Խաղաղ ցուցարարին, անչափահասին, մեր ապագա զինվորին, հայ մորը, որը զինվոր է ծնում, նրանց ծեծողներին չի կարելի դուրս չշպրտել ոստիկանության համակարգից»:

Ըստ ընդդիմադիր պատգամավորի՝ միևնույն ժամանակ արժանապատիվ ոստիկանին էլ արժանապատիվ հարգանք և պայմաններ պետք է ապահովվի:

«Չի կարելի դատավորին պատժիչ բութ գործիքի վերածել և միայն կալանավորող, կալանքը ֆետիշացնող դատավորների չի կարելի կարգել, իսկ նմաններին պետք է դուրս շպրտել համակարգից:

Չի կարելի դատավորի միջոցով վարկերի բեռի տակ հայտնված  բազմազավակ ընտանիքի վերջին բնակարանը բռնագանձել, իսկ դղյակներից միայն խոսել ու վախենալ:

Չի կարելի քննիչներին ստիպել իրենց խղճի դեմ գնալով ապօրինի գործեր կարել, իսկ դատախազներից պահանջել դրանք հաստատել:

Չի կարելի գլխավոր դատախազին վերածել վարչապետի օգնականի, կամ՝ հակառակը:

Չի կարող արդարություն ապահովող իրական դատավորի աշխատավարձը լինի ավելի ցածր, քան ոչինչ չանող ՔՊ-ական նախարարներինը՝ իրենց պարգևավճարներով:

Անթուլատրելի է, որ պետական բարձրագույն պաշտոն զբաղեցնողն առանց կրթության, առանց կենսագրության, պրոֆեսիոնալիզմի այդ պաշտոնը զբաղեցնի , դեռ ավելին՝ հայ մարդու շահն էլ չպաշտպանեն»,-անթույլատրելի երևույթները թվարկեց Վարդևանյանը և հավելեց. «Այս ամենը չի լինելու մեր վճռական պայքարի արդյունքում և այս «չիկարելիները» չեն լինելու, որովհետև մինչև վերջ պայքարելու ենք և այս իշխանությանը հեռացնելու ենք»: