Ձեր վստահելի աղբյուրը

«Այսօր մեկ անգամ ևս դուք վերջ դրեցիք այն բոլոր խոսակցություններին, որ շարժումը կարող է հետքայլ ունենալ, մարդիկ կարող են հոգնել։ Վճռական, հաշվարկված քայլերով այս պայքարը հասցնելու ենք հաղթական ավարտին, Արցախը երբեք Ադրբեջանի կազմում չի լինելու, դավաճանները հեռացվելու են և վերջ»,-Ֆրանսիայի հրապարակում երթի ավարտից հետո ասաց ԱԺ փոխնախագահ, ՀՅԴ ԳՄ անդամ Իշխան Սաղաթելյանը։

Ներկայացնելով անցնող շաբաթվա ընթացքում կատարած աշխատանքները՝  նա նշեց, ստեղծել են անվտագության ու պաշտպանության կոմիտեներ, սոցիալ-տնտեսական, միջազգային կազմակերպությունների հետ աշխատանքների, քաղաքական  հանձնախմբեր։

«Առաջիկայում մենք կներկայացնենք այն մեխանիզմները, թե ինչպես մարդիկ կարող են ընդգրկվել մեր աշխատանքներում։ Օգտվելու ենք բոլոր կարող մարդկանց ներուժից՝ պայքարին նոր ուժ հաղոդելու, երկրի առաջ ծառացած խնդիրները լուծելու համար»,-ասաց նա։

Սաղաթելյանի խոսքով, երկուշաբթի օրվանից կսկսեն մարզերում «Դիմադրության» օջախների ստեղծման աշխատանքները։

«Այս ընթացքում Արցախում, Սփյուռքում դիմադրության օջախների ստեղծումը համարեք սկսված։ Կեցցե Սփյուռքը, կեցցե Արցախը, կեցցե հայ ժողովուրդը։ Եկող շաբաթվա ընթացքում շարունակվելու ենք մեր ակցիաներն ու գործողությունները։ Հաջորդ հանրահավաքը տեղի է ունենալու հունիսի 24-ին ժամը 19։30-ին Ֆրանսիայյի հրապարակում»,-նշեց նա։

Նաև որոշել են, որ յուրաքանչյուր չորեքշաբթի՝ ժամը 19։30-ին շարժման մասնակիցները, խորհրդարանական խմբակցությունների պատգամավորները կլինեն Ֆրանսիայյի հրապարկում՝ հանդիպելու քաղաքացիների հետ, զրուցելու, շփվելու նրանց հետ, լսելու առաջարկները։

«Շաբաթվա ընթացքում ակցիաների մասին տեղեկությունները կհայտնենք»,-ասաց նա։