Ձեր վստահելի աղբյուրը

«Ավետիք Չալաբյանի նկատմամբ հորինված քրեական գործի շրջանակներում իրականացվում է  ակնհայտ բռի և լկտի քաղաքական հետապնդում»,- ասուլիսում ասաց փաստաբան Վարազդատ Հարությունյանը։

Նա հիշեցրեց, որ 2022 թվականի  մայիսի 13-ին «Արար» հիմնադրամի համահիմնադիր, քաղաքական-հասարակական գործիչ Ավետիք Չալաբյանը հարուցված քրեական  գործի շրջանակներում ներգրավել է որպես մեղադրյալ։ Քրեական գործը  հարուցվել է հավաքներին մասնակցելու նպատակով  նյութապես շահագրգռելու դեպքի առթիվ։ Չալաբյանին մեղադրանք է առաջադրվել հենց այդ հոդվածով՝ մեկից ավելի անձանց  (2000 ուսանող) հավաքներին մասնակցելու նպատակով նյութապես շահագրգռելու դեպքի առթիվ։

Փաստաբանի ներկայացմամբ, Քրեական օրենսգրքի 163-րդ հոդվածի 2-րդ մասը,  որը փոփոխություն է  ենթարկվել 2021-ին մայիսին, նախատեսում է քրեական պատասխանատվություն՝  հավաքին մասնակցելուն հարկադրելը կամ հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելու համար։

Ավետիք Չալաբյանին մեղադրանք է առաջացրել 163-րդ հոդվածի 3-րդ մասին 2-րդ կետով՝ հավաքին մասնակցելուն հարկադրելը կամ հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելը` երկու կամ ավելի անձանց նկատմամբ։

«Նախաքննական  գաղտնիքով պայմանավորված,  բնականաբար,  կաշկանդված ենք, այս փուլում շատ մանրամասներ չենք կարող ներկայացնել քրեական գործից, որոնք շատ ավելի  ակնհայտ են դարձնում քաղաքական հետպնդումը, այնուամենայնիվ, որոշակի ազատություն ունենք, և դրա շրջանակներում շատ հանգիստ կարող ենք պնդել, որ առ այս պահը քրեական գործի  շրջանակներում վարույթն իրականացնող մարմինը ոչ միայն ձեռք չի բերել գեթ մեկ ապացույց, որ Ավետիք Չալաբյանը մեկից ավելի անձանց նյութապես շահագրգռել է հավաքներին  մասնակցելու նպատակով, այլ անգամ ձեռք չի բերել որևէ ուղղակի ապացույց, որը հիմնավորում է,  որ Չալաբյանն ընդհանրապես որևէ մեկին նյութապես շահագրգռել է հավաքին մասնակցելու նպատակով։

Նույնիսկ Ագրարային համալսարանի ՈՒԽ նախագահ Թոռնիկ Ալիյանն առերես հարցաքննության ժամանակ  որևէ կերպ չի պնդել, հակառակ հերքել է, որ Չալաբյանը իրեն երբևէ որևէ նյութական շահագրգռություն է առաջարկել որևէ հանրահավաքի կամ հավաքի մասնակցելու նպատակով»,- ներկայացրեց փաստաբանը։

Վ.Հարությունյանի խոսքով, չկա քրեական գործով այլ մասնակիցների նման պնդում։ Նա բացատրեց, թե ինչու են Չալաբյանին մեղադրանք առաջադրել հենց 163-րդ հոդվածի 3-րդ մասի 2-րդ կետով. «Ակնհայտ է, որ այս պատմության մեջ երկրորդ անձի որևէ անվանում անգամ չի հոլովվում ոչ հանրային տիրույթում, ոչ քրեական գործի շրջանակներում։

Չալաբյանին հենց այդ հոդվածով են մեղադրել շատ պարզ պատճառով, որովհետև Քրեական դատավարության օրենսգրքի իրավակարգավորումները  հնարավորություն են տալիս կալանքը որպես խափանման միջոց կիրառել բացառությամբ այն հանցագործությունների դեպքերում,  որոնց համար ազատազրկման ձևով պատիժը գերազանցում է մեկ տարի։

Քանի որ 163-րդ 2-րդ մասով նախատեսված ազատազրկման ձևով պատիժը չէր գերազանցում մեկ տարին, ուստի քրեական հետապնդում իրականացնող մարմինը Ավետիք Չալաբյանին բանտարկելու իր  նպատակին կարող էր հասնել բացառապես եթե նրան մեղագրեր  այլ հանցակազմ, որն էլ ավելի ծիծաղելի է դարձնում քրեական հետապնդում իրականացնող մարմնի կողմից իրականացվող քննությունը»։