Ձեր վստահելի աղբյուրը

Արագածոտնի մարզի Նիգավան գյուղում կրակոցների հետևանքով տուժածներից երեքը տեղափոխվել են «Արմենիա» ԲԿ։ Նրանցից մեկի մոտ արձանագրվել է կենսաբանական մահը, մյուս վիճակը  ծայրահեղ ծանր է։

«Արմենիա» ԲԿ-ի վիրաբուժական գծով տնօրեն Աշոտ Կուրղինյանը  «Մեդիահաբ»-ին տված հարցազրույցում  ասել է, մահացածը և ծայրահեղ ծանր վիճակում գտնվող տուժածը վնասվածքներ են ունեցել գլխի ու պարանոցի շրջանում։

Գլխի շրջանում հրազենային վնասվածք է ստացած տուժածը վիրահատվել է։

«Սակայն ընդհանուր վիճակն ու ուղեղանյութի տուժվածությունը  մեզ բավարար հիմք չի տալիս օպտիմիստ լինել իր հարցով։ Շատ  ծանր է վիճակը»,-ասաց Կուրղինյանը։

ԲԿ տնօրենի  խոսքով, համեմատաբար կայուն, բայց ծանր, վիճակում է երրորդ տուժածը։

«Վնասված է նրա կրծքավանդակը։ Կատարվել է վիրահատություն, նա գտնվում է ռեանիմացիոն բաժանմունքում»,-նշեց նա։

Հիշեցնենք, որ ոստիկանությունը երեկ տարածել է հայտարարություն, ըստ որի հունիսի 19-ին' ժամը 19.45-ի սահմաններում, Արագածոտնի մարզի Նիգավան գյուղում մի խումբ անձանց մասնակցությամբ միջադեպ է տեղի ունեցել։ Այդ ընթացքում հնչել են կրակոցներ, նախնական տվյալներով' գործադրվել է որսորդական հրացան:

Տուժած յոթ տղամարդիկ տեղափոխվել են տարբեր բժշկական կենտրոններ: Նրանցից մեկը մահացել է: Դեպքի առթիվ քրեական գործ է հարուցվել, որի շրջանակներում ձեռնարկվում են օպերատիվ-հետախուզական ծավալուն միջոցառումներ:

«Տեղեկացնում ենք, որ միջադեպը քաղաքական ենթատեքստ չի պարունակում, ավելին' պատճառը կենցաղային է: Դեպքին առավել մանրամասն կանդրադառնանք առաջիկայում»,- ասված է ոստիկանության հայտարարությունում։

Նշենք, որ ավելի վաղ լրատվամիջոցները հայտնել էին՝ կրակողները ՔՊ-ականների հարազատներն են։ Politik.am-ի տեղեկություններով՝ ՔՊ-ականների հարազատները կրակել են երիտասարդների վրա, քանի որ նրանք հայհոյել են Նիկոլ Փաշինյանին։ 

Ըստ աղբյուրի՝ ՔՊ պատգամավոր Մաթևոս Ասատրյանի հարազատները և ՔՊ Արագածոտնի փոխմարզպետ Էդգար Փարվանյանի հորեղբոր որդին վիճաբանել են ապարանցի մի խումբ երիտասարդների հետ, ինչի հետևանքով վերոնշյալ մարդիկ կալաշնիկովով կրակել են երիտասարդների վրա։