Ձեր վստահելի աղբյուրը

«Ավետիք Չալաբյանի գործով քրեական հետպանդում իրականացնող մարմինը մատնված է անգործության»,- ասուլիսում ասաց փաստաբան Վարազդատ Հարությունյանը։

Նա նշեց, որ որևէ էական քննչական գործողություն, որի մասին իրենց հայտնի է կամ իրենց մասնակցությամբ քննչական գործողություն, բացի իրենց իսկ  նախաձեռնությամբ կազմակերպված հարցաքննությունից, չի իրականացվել։

«Համ քրեական գործի քննություն չկա, համ էլ քրեական գործի արդյունավետություն չկա»,- ընդգծեց փաստաբանը։

Նա նշեց, որ Ա. Չալաբյանին մեղսագրվել է 2000 անձի  նյութապես շահագրգռելու համար, իրենք միջնորդել են քննիչին՝ խնդրելով հարցաքննել 2000 ուսանողի։

«Բնականաբար, առաջին հայացքից խելագարության կանխավարկածի է նմանվում մեր միջնորդությունը, բայց մեր միջնորդությունն  ընդամենը շարունակությունն է այն խելագարության կանխավարկածի շրջանակներում Չալաբյանին մեղասագրված արարքի նկարագրությանը»,- ասաց փաստաբանը։

Վ.Հարությունյանի խոսքով, բացի այն, որ հիմնավոր կասկած չկա, արարք չի կատարվել, նույնպես  քրեական գործի շրջանակներում, երբ ուսումնասիրել են նաև այս նորմի բովանդակությունը, հասկանալու, թե այն ինչպես են կիրառում, որն է  այս նորմի սահմանադրական գնահատականը,  համագործակցելով նաև իրավաբանական գիտությունների դոկտոր Գևորգ Դանիելյանի հետ, հասկացել են շատ պարզ մի բան՝ նորմը հակասահմանադրական է, Սահմանադրությամբ չի  հետապնդվում որևէ նպատակ, որը կապված է հավաքների  մասնակցելու համար նյութապես շահագրգռելն արգելելու մեջ։

«Սահմանադրությամբ հետապնդվում է  նպատակ՝ հարկադրանքն արգելելու մեջ, որևէ մեկին չհարկադրես, որ  ինքը մասնակցի կամ ձեռնպահ մնա մասնակցելուց, բայց  նյութապես շահագրգռելու արգելք Սահմանադրությունը որպես նպատակ չի հետապնդում, իսկ  անձի  հիմնական իրավունքներն ու ազատությունները կարելի է  սահմանափակել, միայն եթե կա սահմանադրական լեգիտիմություն»,- ասաց փաստաբանը։

Նրա խոսքով, իրենք խորը ուսումնասիրություն են արել և դատախազությանը խնդրել են այս հարցով դիմել ՍԴ: Դատախազությունից պատասխանել են մեկ նախադասություն՝ «ՍԴ դիմելու հիմքեր առկա չեն»:

Նա հայտնեց, որ սահմանադրականության հարցը բարձրաձայնելու համար դիմել են նաև ՄԻՊ-ին, սակայն մոտ 20 օր է ՄԻՊ գրասենյակից  որևէ արձագանք չեն ստացել դիմումի կապակցությամբ։

«Նամակի մեջ նաև մանրամասն  վերլուծվել է, որ Չալաբյանի նկատմամբ իրականացվում է  քաղաքական հետապնդում, որ իր  չափանիշներով տեղավորվում է  ԵԽԽՎ համապատասխան բանաձևի մեջ։  ՄԻՊ գրասենյակը ստանալով այնպիսի նամակ, որտեղ վերլուծված է քաղաքական  հետապնդման հնարավոր դեպք, անգամ չեն կապնվում մեզ հետ։ Ինչ -որ հարցեր կարող էին ունենալ չէ՞, կամ թերի բան կարո՞ղ է գրած լինեինք»,- ասա Վ.Հարությունյանը։

Ավետիք Չալաբյանի պաշտպաններից Արթուր Հարությունյանն նշեց, որ հուլիսի 1-ից ուժի մեջ մտնող Քրեական օրենսգրքում այն հոդվածը, որով քրեական հետապնդման է ենթարկվում Ավետիք Չալաբյանը, որպես այդպիսին հանցագործություն նախատեսված չէ:

«Այսինքն ստացվում է, որ ունենալու ենք մի իրավիճակ, երբ 2022-ի հուլիսի 1-ի դրությամբ պարոն Չալաբյանի նկատմամբ քրեական հետապնդումն արդարացման հիմքով դադարելու է: Նման պայմաններում վարույթն իրականացնող մարմնի կողմից  ներկայացվեց կալանավորման միջնորդություն, որը բավարարվեց: Մեր կողմից ներկայացվեց վերաքննիչ բողոքը, որը մակագրվել էր դատավոր Արմեն Դանիելյանին: Չնայած բավականին ծավալուն քննարկում իրականացվեց, այնուամենայնիվ, պարոն Դանիելյանի որոշման մեջ ևս բավարար արձագանք չկար մի շարք հանգամանքների, օրինակ հիմնավոր կասկածի վերաբերյալ մեր կողմից առաջ քաշած թեզին, որ քրեական գործում այդ հոդվածով հիմնավոր կասկածը բացակայում է»,-ասաց փաստաբանը:

Արթուր Հարությունյանի խոսքով, Արմեն Դանիելյանը չի անդրադարձել նաև այն հագնամանքին, որ մոնտաժված  ձայնագրության հրապարակումից մոտ 3 օր անց, երբ գնացել են Ավետիք Չալաբյանի բնակարանը խուզարկելու, նա եղել է քնած.  «Դժվար թե քննությունից խուսափող անձը դեպքից երեք օր հետ քնած լիներ, երբ գիտեր, որ առկա է նման ձայնագրություն և կարող են իրավական գործընթացներ սկսվել»։

Նա հայտնեց, որ վարույթ իրականացնող մարմինը ոչ դատարանին, ոչ էլ պաշտպանական կողմին տեղեկություն չի ներկայացրել, որ առկա է որևէ փաստական տվյալ, Չալաբյանը հայտնվելով ազատության մեջ, կարող է ինչ-որ ձևով խոչընդոտել վարույթ  իրականացնող մարմնի գործողությունները։

Ա. Հարությունյանը նշեց, որ հուլիսի 1-ի դրությամբ Ա. Չալաբյանը պետք է, ըստ էության,  կալանքից ազատ արձակվի, որովհետև նրա արարքն այլևս չի կարող համարվել քրեորեն հետապնդելի արարք։

Վարազդատ Հարությունյանն ասաց. «Ավետիք Չալաբյանը քաղաքական բանտարկյալ է՝ ԵԽԽՎ համապատասխան բանաձևի շրջանականերում. չկա մինչ այս պահը գեթ մեկ ապացույց, որն ուղղակիորեն հաստակ հաստատի, որ Ավետիք Չալաբյանը շահագրգռելով որևէ մեկին մասնակցելու հավաքներին։

Ավետիք Չալաբյանի նկատմամբ հետապնդումը կրում է խտրական բնույթ:

Ես ուզում եմ հիշեցնել, որ 2021-ի խորհրդարաական ընտրություններին և դրանից առաջ բազմաթիվ հրապարակումներ եղան մամուլում, որ իշող ուժը վարչական ռեսուրսների գործադրմամբ այս հրապարակը լցրեց, այն մշակույթի տունը լցրեց, կամ  վարչական ռեսուրսների գործադրմամբ ստիպել է աշխատակիցներին հանկարծ չմասնակցել ընդդիմադիր ուժերի հանրահավաքներին ու ակցիաներին, քրեական գործ չի հարուցվել»։

Նա նշեց, որ Ավետիք Չալաբյանի քաղաքական բանտարկյալ լինելու, նրա նկտամամբ  կոպիտ ընթացակարգային խախտումներով քրեական գործի և քրեական հեապնդման իրականացման վերաբերյալ դիմել են մի շարք միջազգային կազմակերպությունների։

«Անընդհատ միջնորդություններ ներկայացնելը ևս մեկ հնարավորություն է ակնառու դարձնել, որ  Հայաստանում քաղաքական գործերով արդարադատություն ակնկալելն  անիմաստ զբաղմունք է դարձել։ Ներպետական պաշտպանության բոլոր միջոցները ծառայում են գործող իշխանությունների քաղաքական պատվերներին»,-ասաց Վարազդան Հարությունյանը: