Ձեր վստահելի աղբյուրը

ԲԴԽ նախագահ (լիազորությունները կասեցված) Ռուբեն Վարդազարյանն ու նրա ներկայացուցիչ, փաստաբան Արամ Օրբելյանը հիմնարար խնդիրներ են արձանագրել հունիսի 16-ին տեղի ունեցած ԲԴԽ նիստում։

Նիստն անցել է առանց Վարդազարյանի ու Օրբելյանի ներկայության, չնայած վերջինը միջնորդություն էր ներկայացրել այն հետաձգելու մասին, քանի որ Կապանում երեք դատական նիստ ուներ, որոնք ավելի շուտ էին նշանակվել, քան ԲԴԽ նիստը։

«Առաջինը պարոն Վարդազարյանի արդար դատաքննության իրավունքի պոտենցիալ խախտումն է։ Ինչո՞ւ եմ ասում պոտենցիալ, քանի որ Բարձրագույն դատական խորհուրդը դեռևս ունի հնարավորություն այս խախտումը վերացնելու , եթե գտնի քննությունը նորից իրականացնելու անհրաժեշտություն կա։ ՄԻԵԴ ստանդարտը հետևյալն է, եթե կա խախտում, որը հնարավոր է վերացնել ու վերացվում է, ապա այն չի առաջացնում հետևանքներ»,-լրագրողների հետ ընթացող հանդիպմանը հայտարարեց փաստաբան Արամ Օրբելյանը։

Փաստաբանն ասաց, դատական պրակտիկայում չի հանդիպել դեպք, երբ կողմերից  մեկը ներկա չլինի նիստին ու գոնե առաջին անգամ այն չհետաձգեն։

«Կարող եք հարցնել ցանկացած փաստաբանի, բազմաթիվ են դեպքերը, երբ Քրեական դատավարության օրենսգրքի շրջանակում բողոքարկվում են քննիչի կամ դատախազի գործողությունները, մեծ մասամբ դատախազն այդ նիստին չի գալիս, բայց նիստը միշտ հետաձգվում է, չնայած միշտ պնդում ենք, որ Դատախազությունում կան բազմաթիվ դատախազներ, մեր հարկերի հաշվին են վարձատրվում, թող բարի լինեն ուրիշ դատախազ ուղարկեն։ Տվյալ դեպքում պարոն Վարդազարյանի ներկայացուցիչ եղել եմ միայն ես, չեն եղել 8-10 հոգի, պարոն Վարդազարյանն էլ եղել է վատառողջ, չի կարողացել  ներկա գտնվել առողջական խնդիրների պատճառով»,-մանրամասնեց նա՝ ավելացնելով, որ որևէ մեկը կապ չի հաստատել Վարդազարյանի հետ՝ ճշտելու բացակայության պատճառը և արդյոք այն հարգելի՞ է, թե՞ ոչ։
Օրբելյանն ընդգծեց՝ նիստն արհեստականորեն ձգձգելու մտադրություն, ցանկություն չի ունեցել, միջնորդությանբ  էլ խնդրել է այն հետաձգել մի քանի օրով, ոչ թե ամսով։ Նիստն առանց Օրբելյանի ու Վարդազարյանի անցկացնելու հետևանքով Օրբելյանի միջնորդությունը ոչ ամբողջությամբ է ներկայացվել։

«Ես ներկայացրել էի երկու միջնորդություն, մեկով առաջարկում էի վարույթը կարճել, քանի որ այն հարուցվել է ոչ իրավասու մարմնի կողմից։ ԲԴԽ-ն խորհրդակցական սենյակում քննարկման արդյունքում որոշեց, որ կարճելու հիմքեր չկան։ Մինչդեռ մենք միջնորդության մեջ նշել էինք, որ սույն միջնորդությունը չի պարունակում ամբողջական պատասխանը և ԲԴԽ նիստում կներկայացվեն հավելյալ հիմքեր, սակայն դրանք վերջնական ձևակերպելու ու  ներկայացնելու համար գործի վարույթը չկարճելու դեպքում խնդրում ենք պատասխան ներկայացնել օրենքով նախատեսված երկշաբաթյան ժամկետում»,-ասաց Օրբելյանը՝ ավելացնելով, որ դրան ընդհանրապես արձագանք չի եղել։

Բացի այդ, նա հիշեցրեց, որ նիստից տասն օր առաջ ԲԴԽ անդամին են տրամադրվում նյութերը։

«Դատական նիստը նշանակվել է մինչև հունիսի 14-ը, երբ մեզ պետք է տրամադրվեր պատասխանը։ Տեսնում եմ ակնհայտ շտապողականություն, որի պատճառը ոչ մի կերպ չեմ կարող հասկանալ։ Պարոն Վարդազարյանի լիազորությունները կասեցված են, այսինքն որևէ որոշում ընդունելու  խնդիր չկա, որևէ շտապողականության խնդիր չկա։ Դատական նիստից հետո ինձ մոտ ենթադրություն ծագեց։ Հունիսի 21-ին՝ վաղը ՍԴ օրակարգում ներառված է հարց ՄԻՊ-ի դիմումի հիման վրա մի շարք օրենսդրական դրույթների սահմանադրականությունը որոշելու վերաբերյալ։ Դրանք այն փոփոխություններն են, որով կարգապահական պատասխանատվության ենթարկելու որոշումն ընդունելու նվազագույն շեմը 7 ձայնից իջացրեցին, հասցրեցին 5 ձայնի»,-ասաց փաստաբանը։

Նրա խոսքով, եթե ԲԴԽ-ն խորհրդակացական սենյակում որոշում կայացնի Վարդազարյանի մասով, իսկ ՍԴ-ն հակասահմանդրական ճանաչի օրենքի այդ դրույթը, առաջանալու է կազուս։

«Տեսնում ենք ակնհայտ շտապողականություն, որի հիմքերից մեկը սա է։  Խոսքը վերաբերում է ՀՀ Սահմանադրության ու Եվրոպական կոնվենցիայով նախատեսված իրավունքների սահմանփակման չարաշահման արգելքի սկզբունքին»,-ասաց նա։

Փաստաբանը շեշտեց, որ նիստի մասնակից առնվազն երեք դատավոր պարոն Վարդազարյանին հարցեր տալու խնդիր են տեսել։

«Երեք դատավոր խնդիր են տեսել Վարդազարյանին հարցնելու, այդ ի՞նքն  է ասել, ինչքը չի՞ ասել, համապատասխանում է այն իրականությանը, արդյոք այն կոնտեքսից դո՞ւրս է, թե՞ ոչ։ Կարևոր է հասկանալ, կողմի մոտեցումը»,-ասաց նա։

Վարույթի հարուցման հիմք է հանդիսացել լրատվականներից մեկում հրապարակված հարցազրույցը, որում Վարդազարյանն անդրադարձել է ՍԴ որոշմանը՝ կապված Գագիկ Ջհանգիրյանի՝ ԲԴԽ անդամ ընտրվելու դիմումին։

Անդրադառնալով անելիքներին՝  Օրբելյանն ասաց, երկու դիմում է ստորագրել՝ ներկայացնելու դատական դեպարտամենտ, թե երբ են գործի նյութերը տրամադրվել դատարանի անդամներին, խնդրել է տրամադրել արձանագրությունը, որը վերաբերում է հավելյալ ժամանակ տրամադրելու վերաբերյալ իր միջնորդությանը։

Վարդազարյանի ներկայացուցչի խոսքով, ինքն անուղղելի լավատես է, կարծում է, որ խնդիրը կլուծվի հայաստանյան դատական համակարգի շրջանակում, հակառակ դեպքում պատրաստ են իրենց իրավունքները պաշտպանել միջազգային ատյաններում։

«Մեր խնդիրն է Հայաստանի Սահմանադրության, գործող օրենքների շրջանակում իրականացնել արդարադատություն։ Ակնկալում եմ, որ ամեն դեպքում կլինի նիստի վերսկսում»,-ասաց նա՝ ավելացնելով, որ դա թույլ կտա պարզել պարոն Վարդազարյանի բացակայության պատճառները՝ արդյո՞ք այն հարգելի է, թե՞ ոչ, քննարկել միջնորդություն ու ապահովել լսված լինելու իրավունքը։

Օրբելյանն ասաց՝ իրենք ակնկալում են գործի կարճում, այլ որոշման դեպքում կբողոքարկեն որոշումը կամ դրա համար հիմք հանդիսացած իրավական ակտերը։