Ձեր վստահելի աղբյուրը

«Մենք գտնվում ենք մի շենքի դիմաց, որը տիրապետում է  ՀՀ-ի առկա ամենաճշգրիտ տեղեկատվությանը ՝ այն ամենի մասին, ինչ տեղի է ունենում սահմանային ու երկրի ներսում։ Սա այն կառույցն է, որը գիտի ինչ է տեղի ունեցել 2018թ․-ի հայտնի իրադարձությունների ժամանակ, գիտի թե ովքեր և ինչ որակի մարդիկ են եկել իշխանության, տեղյակ է, թե ինչ է տեղի ունեցել 44-օրյա պատերազմի օրերին, և իհարկե, տեղակ է,թե ինչ է տեղի ունենում հետպատերազմյան ժամանակահատվածում»,- ԱԱԾ շենքի մոտ հայտարարեց «Պատիվ ունեմ» խմբակցության պատգամավոր Տիգրան Աբրահամյանը։

Պատգամավորը նաև հիշեցրեց, որ ԱԱԾ սահմանապահ զորհքերը նույնպես մասնակցել են պատերազմական գործողություններին և ունեցել են զոհեր ու վիրավորներ։

«Այն կառույցը, որը տիրապետում է, թե ինչ վիճակի է հասել Հայաստանը և տեղյակ է, թե  ինչպիսի ներքին ու արտաքին անվտանգային խոցելի  իրավիճակում են Հայաստանն ու Արցախը, այսպիսի  կրավորական կեցվածք չպետք է ընդուներ։ ԱԱԾ-ի բոլոր աշխատակիցները՝ շարքայինից ղեկավարություն, պետք է մշտապես լավ  հիշեն,թե ինչ է տեղի ունեցել իրենց գործընկեր կառույցների հետ»։

Այս համատեքստում Աբրահամյանը հիշեցրեց, 2018թ․-ից հետո այս իշխանության հետ աշխատելու պատրաստակամություն հայտնած գլխավոր ԳՇ պետերի,Պաշտպանության նախարարի և  ԱԻ նախարարի հետ կատարվածը։

«Այս կառույցի աշխատակիցները պետք է քաջ գիտակցեն՝  այս իշխանությանը մատուցած  որևէ ծառայություն, որևէ հավատարմություն ունենալու մեկ ելք ՝ բոլորդ գնալու եք Դավիթ Տոնոյանի, Անդրանիկ Փիլոյանի և ԳՇ պետերի հետևից, որոնք մտածել են ՝ այս իշխանության հետ համագործակցելով  կպահեն իրենց աթոռը։ Նրանց մի մասը  հայտնվել է անդունդի եզրին, մի մասը՝ կալանավորման մեջ։ Էլ չեմ խոսում այն մասին, որ իշխանական քարոզչամեքենան մինչև վերջ կոտրել են նրանց արժանապատվությունը»,-ասաց Աբրահամյանը։

Տիգրան Աբրահամյանի խոսքով՝ այս իրավիճակից դուրս գալ հնարավոր է, եթե լինի՝ առանց Նիկոլ Հայաստան։