Ձեր վստահելի աղբյուրը

Ապարանում արյունալի իրադարձությունների հետևանքով մահացած ու վնասվածքներ ստացած քաղաքացիների հարազատները բողոքի ակցիա են իրականացնում՝ պահանջելով արդար դատաքննություն, իսկ մինչ այդ նոր ձերբակալություններ։

«Չգիտենք, ոստիկանությունն ինչպես է աշխատում, քաղաք մտնում է զինված հանցավոր խումբ, կրակում են մարդկանց վրա, սպանում։ Ես Համիկ Միքայելյանի հորեղբայրն եմ։ Մեր պահանջն է՝ արյունահեղություն կատարածները չպետք է մտնեն Ապարան, իրենց ընտանիքներով չապրեն այստեղ, որ մենք հանգիստ ապրենք։ Ապարանցին հանգիստ ապրի»,-ասաց տղամարդը։

Նա նաև անուններ է նշում։

«Փարվանյան Էդգար, որը Արագածոտնի փոխմարզպետն է, դեպուտատը, (ՔՊ-ական Մաթևոս Ասատրյան-խմբ.) դեպուտատի ախպոր տղեն, անձամբ մասնակից են եղել, կազմակերպել են, Փարվանյանի հորեղբոր որդիները, Ռոման Փարվանյանը, կազմակերպում են, խումբը մտնում է Ապարան, ու էս այրունահեղությունը կատարվում է, Ղարիբյան Կառլենը»,-ասաց Համիկ Միքայելյանի հորեղբայրը։

Նշենք, որ կրակոցների հետևանքով զոհվածներից մեկը Համիկ Միքայելյանն է։ Հորեցբայրն ասաց՝  կատարվածի պատճառների մասին մանրամասներ չգիտի,  մեկ-երկու օր ինչ-որ հարցեր են փորձել ճշտել։

«Ես չեմ կարծում, որ խնդիրը քաղաքական է եղել։ Հիմա ես դիմում եմ Նիկոլ Փաշինյանին՝ պետք է լինի արդար դատավարություն։ Ապարանը եղել է հանդարտ վայր, բայց քանի դեռ սրանք այստեղ են, հանդարտություն չի լինի»,-ասաց Միքայեյանի հորեղբայրը։

Մյուս սպանվածի՝ Տիգրան Հարությունյանի հայրն էլ լրագրողների հետ զրույցում ասաց՝ մեկ օր առաջ վիճաբանություն է եղել, ոստիկանությունը տեղյակ է եղել։

«Վիճաբանությունը եղել է Ռոման Փարվանյանի ու Մաթևոս Ասատրյանի հարազատների՝ հորեղբոր տղաների հետ։ Ես երեկոյան եմ իմացել կրակոցների մասին, երբ իմ որդին տեղափոխվել է հիվանդանոց։ Ես զրուցել եմ վիրավորներից մեկի՝ Հրաչի ծնողի հետ, որ իմ հարևանն է։ Հրաչը պետք է զորակոչվեր բանակ, բայց թոքի վնասվածքով հիմա հիվանդանոցում է։ Մեր պահանաջն է՝ արդար դատաքննություն իրականացնել, բոլոր մեղավորները պետք է պատասխան տան, ձերբակալվեն։ Մեկ շաբաթ է անցել, մեկ մարդ է ձերբակալված։ Ովքեր այնտեղ ներկա են եղել, պետք է բոլորը ձերբակալվեն, պատասխան տան»,-ասաց սպանվածի հայրը։

Քննչական կոմիտեն ավելի վաղ հայտնել է, որ հունիսի 18-ին՝ ժամը 22:30-ի սահմաններում, Երևան քաղաքի 32–ամյա բնակիչը եղբոր հետ Ապարան քաղաքում ավտոմեքենան վարելու  ընթացքում ձայնային ազդանշան է տվել «Ինֆինիտի» մակնիշի ավտոմեքենային, շրջանցել և կանգնեցրել այն, այնուհետև մոտեցել են վարորդին և մեքենան վարելու հարցի շուրջ զրուցել նրա հետ, ինչին միջամտել են Ապարան քաղաքի մի խումբ բնակիչներ: Խոսակցությունը վերածվել է վիճաբանության, որը շարունակվել է Ապարան քաղաքի սկզբնամասում:

Նշված խոսակցությունը շարունակելու նպատակով հաջորդ օրը՝ հունիսի 19-ին,  32-ամյա տղամարդը, նրա եղբայրը մի քանի անձանց հետ գնացել են Ապարան քաղաքում գտնվող գազալցակայանի տարածք, հանդիպել են նախորդ օրը իրենց խոսակցությանը միջամտած անձանցից մեկին և ծեծի ենթարկել վերջինիս: Նույն հարցի շուրջ խոսակցությունը ժամը 19:30-ի սահմաններում շարունակվել է Նիգավան գյուղի աղբանոցին հարակից տարածքում, որի ընթացքում 32-ամյա տղամարդն իր մոտ գտնվող հրացանից կրակոցներ է արձակել իրենց հետ վիճաբանող անձանց ուղղությամբ: Արդյունքում, հրազենային վնասվածքներով Ապարանի բժշկական կենտրոն տեղափոխված երկու անձ՝ Ապարան քաղաքի 27-ամյա բնակիչներ, հիվանդանոցում մահացել են, իսկ 5 անձ տեղափոխվել են բժշկական կենտրոններ:

32-ամյա տղամարդը ձերբակալվել է: