Ձեր վստահելի աղբյուրը

Հայատանում սխալ ագրարային քաղաքականություն է տարվում։ Այս մասին Panorama.am-ի հետ զրույցում ասաց  «Ֆերմերային շարժում» հասարակական կազմակերպության նախագահ Սարգիս Սեդրակյանը։

Նրա խոսքով՝ վարելահողերի կեսից ավելին չի մշակվում՝ տարբեր պատճառներով։ Գյողատնտեսը դժգոհեց, որ այսօր պետության ուժը գյուղացին չի զգում։ Կան բազում խնդիրներ, որոնց առջև ֆերմերները մենակ են կանգնած։

«Հայաստանը սակավահող երկիր է։ Պետք է ամեն սանտիմետրի համար դողանք, բայց այսօր հսկայական տարածքներ անտերության է մատնված, իսկ պետության հեչ պետքը չի։ Էկոնոմիկայի նախարարության  գյուղատնտեսության բաժինը գումնարներ է որ ծախսում է, ասում են՝ էս ենք անում, էն ենք անում, բայց գյուղացուն հարցնում ես, ասում է՝ ես ոչ մի բան չեմ տեսել։ Գումարներն աննպատակ ծախսում են։ Եթե պետությունը տիրություն չի անում, գյուղացին լավ հող չի մշակում։ Արդյունքում՝  ցանքատարածություններն են  կրճատվում, քանի որ շատերը թողնում ու գնում են խոպան։ Հողերը մնում են անմշակ։ 2-3 տարի հողը եթե չմշակվի, ապա սկսում է դեգրադացման պրոցեսներ»,- ասաց Սեդրակյանը։

Գյուղատնտեսը հիշեցնում է, որ ողջ աշխարհն է կանգնած պարենային անվտանգության խնդրի առջև, Հայաստանը նույնպես կկանգնի ,եթե քայլեր չձեռնարկվեն։

«Դեռ չգիտենք, թե էլ ինչ վիրուս կգա, կամ  երբ հանգուցալուծում կունենա ռուս-ուկրաինական պատերազմը։Իսկ ի՞նչ եղավ մեր մոտ։ Կարտոֆիլի գծով Հայաստանը միշտ եղել է ինքնաբավ երկիր, բայց այս տարի, կառավարության անուշադրության  պատճառով, քիչ կարտոֆիլ ունեցանք։ Արդյունքում՝ չորս երկրից կարտոֆիլ ներկրեցինք, ինչն էլ նպաստեց կարտոֆիլի գնի աճին»,- նշեց ՀԿ նախագահը։

Նա եկել է այն համոզման, որ գյուղատնտեսության ոլորտը ղեկավարում են ոլորտից  չհասկացող  մարդիկ։

«Վահան Քերոբյանի խելքը հասնո՞ւմ է, թե ինչ բան է կարտոֆիլատնկիչ, կարտոֆիլաքանդիչ։ Գնացել, տեսե՞լ է։ Մենք  սովետական տարիների տեխնիկան ենք մինչև հիմա օգտագործում, այդ մեքենաների աշխատանքային ժամկետները վաղուց անցել են։ Միայն նստելով ու իրենց պրեմիաներ ու բարձր աշխատավարձ տալով չի, պետք է կադրեր հավաքեն, գործ անեն»։

Ըստ Սեդրակյանի, ոչ թե գյուղնախարարության նախարարությունը պետք է վերացնեին, այլ դեմքով շրջվեին դեպի գյուղացին։ Գերատեսչությունն իր գործունեության արդյունքում պետք է օգտակար լիներ գյուղացուն։

«Գյուղնախարարությունը վերացրեցին, մտցրեցին Էկոնոմիկայի նախարարության մեջ։ Իբր Էկոնոմիկան իր գործը շատ է կարողանում անել, մնաց գյուղատնտեսության ոլորտով զբաղվի։ Անգրագետներին էլ բերել դրել են, չեն կարողանում կառավարել»։

«Ֆերմերային շարժում» հասարակական կազմակերպության նախագահը բերում է պարզ օրինակներ,թե որքանով է մեկ տարվա կտրվածքով հող մշակելը թանկացել գյուղացու համար.

«Կարտոֆիլ, հացահատիկ կամ այլ մշակաբույս մշակելու համար պետք է օգտագործեն պարարտանյութ, որի գինը նախորդ տարի 6-7 հազար դրամի սահմաններում էր, իսկ այս տարի 20 հազար և ավելի։ Դիզվառելիքի գինը դարձել է 15 հազար դրամ։ Թունաքիմիկատներն էլ և՛ անորակ են, և՛ թանկ։ Սրան էլ ավելացրած սերմեր, աշխատանքն և այլն»։

Սակայն խնդիրներն այսքանով չեն սահմանափակվում։ Մեծ դժվարությամբ հողն ու այգիները մշակելուց հետո կանգնում են բերքի իրացման խնդրի առջև։ Այս հարցում նույնպես գյուղացին անօգնական է։

«Միրգը, հիմնականում՝ ծիրանը, տանում են Լարսում փչանում է։ Քերոբյանն էլ գնացել էլ իբր պայմանավորվածություն է ձեռք բերել։ Պետք է կարգին քաղաքականություն վարեն վրացիների, ռուսների հետ։ Եթե ձմեռը պատճառաբանում էին,թե ձյուն է, փլվել է, մեքենաները ամիսներով կանգնած էին, հիմա էլ ձյուն չկա, հիմա ինչի՞ են կանգնած, ինչի՞ են բերքն ու ծաղիկները սահմանին փչանում»,- շարունակեց Սեդրակյանը։

Panorama.am-ի զրուցակիցը նշեց, որ մի քանի հանդիպումներ է ունեցել պատկան մարմինների հետ, ներկայացրել են գյուղացիներին հուզող բոլոր խնդիրները, բայց արձագանք չի եղել։