Ձեր վստահելի աղբյուրը

«Ծուռ ակոսը մեծ եզից է»,-ժողովրդական այս խոսքով արձագանքեց գյուղատնտես Աշոտ Հարությունյանը ծիրանի արտահանման, սպառման խնդիրների վերաբերյալ Panorama.am-ի հարցին։

«Այսօր ծիրանն է, ծաղիկը, վաղը դեղձը, սալորը կլինի, խաղողը, լոլիկը, սերմացուն, պարարտանյութը, դիզվառելիքը։ Սա ի՞նչ է նշանակում, որ խնդիրները համակարգային է»,-ասաց  ոլորտի գիտակը։

Հիշեցնենք՝ երեկ հայտարարվեց Լարսի անցակետի փակվելու մասին։ Մինչ այդ օրեր շարունակ խցանումներ էին, ու արտահանվող բերքը, ծաղիկը փչանում էր։  

Հայտնի է, որ Թերեք գետը հորդառատ անձրևների պատճառով դուրս է եկել ափերից և ողողել Վրաստանի և Ռուսաստանի միջև ընկած մայրուղին։ Թե քանի օր կպահանջվի մայրուղու վնասված հատվածը վերանորոգելու և անցակետը երթևեկելի դարձնելու համար, դեռևս պարզ չէ։

Գյուղատնտես Հարություն Մնացականյանը ֆեյսբուքյան իր էջում  մասնավորապես գրել է. 

«Դիմում եմ բոլոր ընկերներիս, ֆեյսբուքյան ծանոթ ու անծանոթ օգտատերերին, ընդդիմադիր և իշխանական պատգամավորներին, կառավարության անդամներին, մտավորականներին, երգիչներին, դերասաններին, տիկտոկերներին և ինստագրամյան հայտնիներին, մի խոսքով բոլորին։

Ժողովուրդ ջան, Լարսը փակվել է և խոսակցություններ կան, որ մոտ 10 օր չի բացվելու բերքահավաքի այս պիկ սեզոնին։ Եթե առաջ գյուղացիները իրենց ծիրանը կոպեկներով էին հանձնում, հիմա ընդհանրապես չեն կարողանալու իրացնել։

Խնդրում եմ ձեզ չելենջ կամ կոչ արեք հանրությանը` գնել ծիրան, ծիրանով նկարներ զետեղեք։ Տեսե՛ք , եթե մեկ միջին վիճակագրական ՀՀ քաղաքացին ամսվա ընթացքում գնի 6 կգ ծիրան, ապա կարելի է ասել ահագին օգնած կլինի գյուղացիներին»։

Գյուղատնտես Աշոտ Հարությունյանը նշում է, որ հերթական անգամ կառավարության անգործության, ոչ կոմպտետության հետևանքով խնդրի լուծումը ընկնում է միջին վիճակագրական քաղաքացու ուսերին, որն առանց այդ էլ գնաճի պայմաններում դժվարությամբ է կարողանում լուծել ընտանիքի, օրվա ապրուստի խնդիրները։

«Հարգելով լրագրողների աշխատանքը, խղճալով մեր այգետերերին, հողօգտագործողներին՝ զուտ դրա համար եմ խնդիրների հնարավոր, օպերատիվ լուծումների մասին խոսում, որովհետև այս իշխանություններին ես այլևս ասելու բան չունեմ, ոչ էլ ակնկալիք ունեմ»,-ասաց նա։

Գյուղատնտեսի խոսքով, եղանակի կանխատեսումները թույլ են տալիս պատկերացում կազմել հնարավոր խնդիրների ու վտանգների մասին, նախորդ տարիների փորձն ու հետևանքներն էլ աչքի առաջ ունենալով, կառավարությունը պետք է  ապահովեր հզոր սառնարային տնտեսություն, որը հնարավորություն կտար մթերել ու որոշ ժամանակ պահել միրգը։

«Ես հիշում եմ, մենք օրինակ 2016-ին, երբ ծիրանի աննախադեպ բերք ունեինք,  կազմակերպեցինք նաև լաստանավային բեռնափոխադրում։ Ճիշտ է՝ քանակը շատ չէր, բայց կարողացանք նաև այդ տարբերակը գործարկել»,-ասաց գյուղատնտեսության նախկին փոխնախարարը՝ կասկած հայտնելով  պաշտոնական այն տվյալների  մասին, թե այս տարի տասն օրում 4 400 տոննայի չափ ծիրան է արտահանվել։

Նա գտնում է, որ ստեղծված իրավիճակում պետք է օգնել վերամշակողներին շուտ փչացող ծիրանի մթերումը կազմակերպելու  հարցում։

«Ես հուշել էի, պետք է կազմակերպել վերամշակող կազմակերպություններին, կառավարությունն էլ իր պահուստային ֆոնդից այս պահին պետք է կարողանա ծիրանի գնի սուբսիդավորում իրականացնել։ Մանավանդ այս տարի ծիրանի բերքը քիչ է։ Մարդիկ ծիրան ստանալու համար բազմաթիվ ծախսեր են իրականացրել, հիմա չպետք է թողել, որ այն թափի։ Հակառակ դեպքում այգետերերը հայտնվելու են սոցիալ-տնտեսական ծանր պայմաններում»,-ասաց նա՝ հիշեցնելով, որ աշխարհում պարենային անվտանգության խնդիրը գնալով լրջանում է, կարելի է ծիրանը վերածել հյութերի, ջեմի, մուրաբայի ու այլ ատադրանքի։

Հարությունյանն աշխատանքի բերումով հաճախ է լինում այգիներում։ Իշխանություններին զգուշացնում է՝ սպասվում է խաղողի մեծ բերք։

«Եթե կարկուտ չլինի, լուրջ հիվանդություններ գլուխ չբարձարացնեն, խաղողի լուրջ քանակություն է սպասվում։ Իրացման հետ խնդիր լինելու է, քանի որ այս տարի ինքնարժեքն էլ շատ բարձր է։ Հիմիկվանից պետք է այդ հարցն ուշադրության կենտրոնում պահել, այսօրվանից սկսկած թղթի վրա նախագծեն անելիքները, որպեսզի խաղողն էլ ծիրանի բախտին չարժանանա»,-ընդգծեց Աշոտ Հարությունյանը։